ՀՀ քաղաքացիություն հնարավոր է ստանալ մի շարք հիմքերով, ինչպիսիք են՝

• ազգությամբ հայ լինելը,
• ՀՀ քաղաքացի զավակ կամ ծնող ունենալը,
• ՀՀ-ում 3 տարի մշտական բնակվելը,
• ՀՀ քաղաքացի ամուսին ունենալը,
• քաղաքացիությունը վերականգնելը,
• փախստականի կարգավիճակ ունենալը (այդ թվում՝ ԼՂ-ից բռնի տեղահանված անձինք)
• քաղաքացիություն չունենալը,
• ծնողների (կամ նրանցից մեկի)՝ նախկինում ՀՀ քաղաքացիություն ունենալը։

Նշված հիմքերից որևէ մեկով ՀՀ քաղաքացիություն ձեռք բերելուց հետո անհրաժեշտ է դիմել քաղաքացիությունն ու ինքնությունն ապացուցող փաստաթուղթ՝ ՀՀ քաղաքացու անձնագիր ստանալու համար։

ՀՀ քաղաքացիություն ձեռք բերելու դեպքում 18-ից 37 տարեկան տղամարդիկ պետք է անցնեն երկամյա զինվորական ծառայության, իսկ 37-58 տարեկան ՀՀ քաղաքացի տղամարդիկ պետք է հաշվառվեն զինվորական պահեստազորում՝ զորահավաքի դեպքում զինվորական ծառայության կանչվելու հավանականությամբ։

ՀՀ բնակության վայրի հասցում կարող են հաշվառվել․

• ՀՀ քաղաքացիները,
• օտարերկրյա քաղաքացիները,
• քաղաքացիություն չունեցող անձնինք։

ՀՀ քաղաքացիությունը դադարեցնելու համար անհրաժեշտ է ներկայացնել դիմում քաղաքացիության գործերի էլեկտրոնային կառավարման համակարգի միջոցով:

Անչափահասի ՀՀ քաղաքացիությունը դադարեցնելու համար կարող է դիմել ծնողը կամ օրինական ներկայացուցիչը՝ գրանցվելով համակարգում և ներկայացնելով դիմում իր անձնական էջից։

• Ժամանակավոր կացության կարգավիճակը հնարավորություն է տալիս օտարերկրացինեերին 1 տարի ժամկետով օրինական հիմքով բնակվել Հայաստանում։
• Մշտական կացության կարգավիճակը հնարավորություն է տալիս օտարերկրացիներին օրինական հիմքով բնակվել Հայաստանում 5 տարի ժամկետով և օգտվել անվճար առողջապահական ծառայությունից։

Ժամանակավոր և մշտական կացության կարգավիճակները բնակության իրավունքի տեսակներ են, որոնք օտարերկրացիներին հնարավորություն են տալիս օրինական հիմքով բնակվել ՀՀ-ում՝ համապատասխանաբար մինչև 1 և 5 տարի ժամկետներով և կարգավիճակը երկարաձգելու հնարավորությամբ։