Բնակության վայրում հաշվառվելու (գրանցվելու) համար անհրաժեշտ է այցելել այն անձնագրային բաժանմունք, որը սպասարկում է քո բնակության վայրի անձնագրային ծառայությունը՝ ներկայացնելով․

• սահմանված ձևի դիմում, որը տրամադրվում է տեղում,
• անձը հաստատող փաստաթուղթ, 
• տվյալ հասցում բնակվելու իրավունքը հավաստող փաստաթղթեր (օրինակ՝ սեփականության վկայական)։

Բնակության իրավունքը հավաստող փաստաթղթերն են՝

• բնակարանի սեփականության կամ օգտագործման իրավունքի վկայական,
• վարձակալության պայմանագիր՝ նոտարական հաստատմամբ,
• սեփականատիրոջ համաձայնությունը՝ առանց վարձակալության պայմանագրի,
• դատարանի` օրինական ուժի մեջ մտած վճիռ,
• ոստիկանության կողմից տրված փաստացի բնակվելը հավաստող փաստաթուղթ (քանի դեռ բնակելի տարածության սեփականատիրոջ կողմից հաշվառման վերաբերյալ գրավոր առարկություն չի ստացվել),
• զինապարտների դեպքում՝ զինվորական գրքույկ կամ կցագրման վկայական,
• օրդեր,
• պայմանագիր։

ՀՀ քաղաքացի լինելու դեպքում՝ 

• անձնագիր,
• բնակարանի սեփականության իրավունքի վկայական,
• ՀՀ արական սեռի քաղաքացիները ներկայացնում են նաև կցագրման վկայական կամ զինվորական գրքույկ։

Օտարերկրյա քաղաքացի լինելու դեպքում՝

• անձնագիր՝ նոտարական հաստատմամբ հայերեն թարգմանությամբ,
• բնակարանի սեփականության իրավունքի վկայական։ 

Անկախ քաղաքացիությունից՝ նախընտրելի բնակության վայրի հասցում հաշվառվելու համար պետք է ներկայացնել՝

• անձնագիր (այլ երկրի անձնագրի դեպքում՝ նաև դրա նոտարական վավերացմամբ հայերեն թարգմանությունը),
• սեփականատիրոջ անձնագրի պատճենը (այլ երկրի անձնագրի դեպքում՝ նաև դրա նոտարական վավերացմամբ հայերեն թարգմանությունը),
• բնակելի տարածքի վարձակալության պայմանագիրը՝ նոտարական վավերացմամբ, ընդ որում՝ այն ներկայացնելու դեպքում բնակարանի սեփականատերը կարող է չներկայանալ,
• արական սեռի ՀՀ քաղաքացիներ լինելու դեպքում՝ նաև կցագրման վկայական կամ զինվորական գրքույկ։

Անկախ քաղաքացիությունից՝ տվյալ տարածքում բնակվող անձինք գրանցվելու համար պետք է ներկայանան այդ բնակելի տարածքի սեփականատիրոջ հետ՝ ներկայացնելով հետևյալ փաստաթղթերը՝

• իրենց և սեփականատիրոջ անձնագրերը (այլ երկրի անձնագրի դեպքում՝ նաև նոտարական վավերացմամբ հայերեն թարգմանությունը),
• բնակարանի սեփականության իրավունքի վկայականը, բնակարանի սեփականատիրոջ համաձայնությունը,
• սեփականատիրոջ բացակայության դեպքում՝ նրա կողմից տրված համաձայնությունը նոտարական հաստատմամբ,
• այլ սեփականատերերի առկայության դեպքում՝ նրանց տված գրավոր համաձայնությունը։ 

Անգործունակ կամ սահմանափակ գործունակ ճանաչված քաղաքացու դիմումը ստորագրում է նրա խնամակալը կամ հոգաբարձուն:

Այն անձը, որը ՀՀ քաղաքացի է, սակայն Հայաստանում մշտական բնակության վայր չունի և մշտապես կամ առավելապես բնակվում է այլ պետությունում, ՀՀ անձնագիր ստանալիս գրանցվում է տվյալ պետությունում իր բնակության վայրի հասցեով:

Հայաստանի Հանրապետությունում կացության կարգավիճակ, փախստականի կարգավիճակ, ժամանակավոր կամ քաղաքական ապաստան ստացած անձը պետք է դիմի հաշվառվելու՝ համապատասխան կարգավիճակը ստանալուց հետո 15-օրյա ժամկետում:

Ո՛չ․ բնակության վայրի հասցեում փոփոխություն լինելու դեպքում (բնակարանի կամ տան համարի փոփոխություն, փողոցի, թաղամասի, համայնքի, բնակավայրի անվանափոխում և այլն) ՀՀ բնակիչը հաշվառման մասին նոր դիմում չի ներկայացնում:

Գրանցման դիմումը կարող է մերժվել, եթե համաձայնություն չեն ներկայացրել՝

• բնակելի տարածքի սեփականատերը,
• պետական և տեղական ինքնակառավարման մարմինների բնակելի ֆոնդի տներում բնակվելու դեպքում՝ վարձակալներն ու նրանց հետ համատեղ բնակելի մակերեսի իրավունք ունեցող չափահաս անձինք,
• մեկուսացված բնակելի տարածության սեփականատերը, եթե այդ տարածությունը զբաղեցնող վարձակալի տարածքում այլ քաղաքացիներ են բնակվում (բացառությամբ այն դեպքերի, երբ անչափահաս երեխաները բնակվում են ծնողների մոտ, կամ ամուսինները կամ անաշխատունակ ծնողները բնակվում են երեխաների մոտ),
• խնամակալի զբաղեցրած բնակելի տարածությունում բնակվելիս` խնամակալը կամ հոգաբարձուն: