Երեխայի ծնունդի պետական գրանցումը կատարում է ՀՀ արդարադատության նախարարության քաղաքացիական կացության ակտերի գրանցման գործակալությունը (ՔԿԱԳ, տարածված է նաև ռուսերեն անվանումը՝ ЗАГС):

• Երեխայի ծնունդը գրանցելու համար դիմումը ներկայացվում է ՔԿԱԳ գործակալություն սպասարկման կենտրոնների և բժշկական հաստատությունների միջոցով:

• Միաժամանակ երկու կամ ավելի երեխաների ծննդյան դեպքում յուրաքանչյուր երեխայի ծնունդի պետական գրանցումը կատարվում է առանձին:

Երեխայի ծննդյան վկայականը ստանալու համար անհրաժեշտ է՝ 

• ծնունդի մասին բժշկական փաստաթղթի քաղվածքը, որը կտրամադրի բժիշկը,

• եթե երեխայի ծնողները ամուսնության մեջ են, ապա ծնողների ամուսնության պետական գրանցումը հավաստող փաստաթուղթը կամ ամուսնության ակտային գրանցման տվյալները,

• եթե երեխայի ծնողների ամուսնությունը հաստատող փաստաթուղթը տրված է այլ երկրում, անհրաժեշտ է ներկայացնել փաստաթղթի հայերեն թարգմանությունը՝  լիցենազավորված թարգմանչի կողմից,

• երեխայի ծնողի մահվան դեպքում՝ մահվան պետական գրանցումը հավաստող փաստաթուղթը կամ մահվան ակտային գրանցման տվյալները,

• երեխայի ծնողների ամուսնալուծության դեպքում՝ ամուսնալուծությունը հավաստող փաստաթուղթը կամ ամուսնալուծության ակտային գրանցման տվյալները,

• բժշկական հաստատությունից դուրս և առանց բժշկական օգնության տեղի ունեցած ծննդի դեպքում`  ԴՆԹ-ի որոշումը և երեխայի տարիքն ու սեռը հաստատող փաստաթուղթը, որը տրամադրվում է բժշկական կազմակերպության կամ երեխայի բնակության վայրի խնամակալության և հոգաբարձության մարմնի կողմից,

• սուրոգատ (փոխնակ) մոր օգնությամբ ծննդաբերության դեպքում՝ փոխնակ մոր հետ կնքված պայմանագիրը և երեխայի, նրա կենսաբանական մոր և փոխնակ մոր ԴՆԹ-ի որոշումը,

• երեխայի ծնողների անձը հաստատող փաստաթղթերը,

• եթե փաստաթղթերի բնօրինակներն այլ լեզվով են, պետք է ներկայացնել նաև դրանց հայերեն թարգմանությունը՝ վավերացված արտոնագրված թարգմանչի կողմից։ 

Հայրության ճանաչման համար որպես պետական հիմք կարող են լինել երեխայի մոր և երեխայի նկատմամբ իրեն հայր ճանաչող անձի համատեղ դիմումը, երեխայի նկատմամբ իրեն հայր ճանաչող անձի դիմումը կամ «Նոտարիատի մասին» ՀՀ օրենքով սահմանված նոտարական ակտը կամ դատարանի համապատասխան վճիռը։

Հայրության ճանաչման պետական գրանցման համար անհրաժեշտ են՝ 

• երեխայի նկատմամբ իրեն հայր ճանաչող անձի և երեխայի մոր համատեղ դիմումի դեպքում՝ նրանց անձը հաստատող փաստաթղթերը,

• երեխայի ծնունդի գրանցման մասին վկայականը կամ ակտային գրանցման տվյալները, եթե հայրության ճանաչման գրանցումը կատարվում է երեխայի ծնունդի պետական գրանցումից հետո,

• երեխայի մոր հղիությունը հաստատող բժշկական տեղեկանքը (տրվում է բժիշկի կողմից), եթե հայրության ճանաչման մասին դիմումը ներկայացվում է մինչև երեխայի ծնվելը,

• հայր ճանաչողի անձը հաստատող փաստաթուղթը, երեխայի մոր բացակայության մասին իրավասու մարմնի տված փաստաթուղթը (մոր մահվան վկայականը կամ տեղեկանքը, նրան անգործունակ ճանաչելու կամ մահացած կամ անհայտ բացակայող ճանաչելու կամ նրան ծնողական իրավունքներից զրկելու մասին դատարանի՝ օրինական ուժի մեջ մտած վճիռը) և երեխայի կենսաբանական հայր հանդիսանալու վերաբերյալ ԴՆԹ-ի որոշումը,

• չափահաս լինելու դեպքում՝ անձի համաձայնությունը իր նկատմամբ հայրություն ճանաչելու վերաբերյալ,

• տասը տարին լրացած երեխայի համաձայնությունը, եթե հայրության ճանաչման պետական գրանցման հետևանքով նախատեսվում է փոխել նաև նրա անունը կամ ազգանունը,

• նոտարի կողմից հաստատված ակտը կամ դատարանի՝ օրինական ուժի մեջ մտած համապատասխան վճիռը և դիմողի անձը հաստատող փաստաթուղթը: 

Եթե փաստաթղթերի բնօրինակներն այլ լեզվով են, պետք է ներկայացնել նաև դրանց հայերեն թարգմանությունը՝ վավերացված արտոնագրված թարգմանչի կողմից։