Մինչև երկու տարեկան երեխայի խնամքի նպաստը ստանալու համար նախ անհրաժեշտ է առցանց դիմում ներկայացնել, որի հաստատումից հետո այցելել բանկ՝ առաջին ամսվա նպաստը ստանալու համար։

Առցանց դիմում ներկայացնելու համար անհրաժեշտ է՝

• գրանցվել online.ssa.am-ում,

• այցելել «Կենսաթոշակի և նպաստների առցանց դիմումներ» բաժին,

• ընտրել «Մուտքագրել մինչև 2 տարեկան երեխայի խնամքի նպաստի դիմում» ենթաբաժինը,

• լրացնել անհրաժեշտ տվյալները և ներկայացնել դիմում։

Գրանցման ընթացքում դիմողի կողմից նշված էլեկտրոնային փոստի հասցեին կուղարկվի գրանցումը հաստատող հաղորդագրություն։

Դիմումի գործընթացն ավարտելու համար անհրաժեշտ է՝ 

• բացել գրանցումը հաստատող հաղորդագրությունը և անցնել հղումով,
• մուտք գործել անձնական էջ՝ մուտքագրելով էլեկտրոնային փոստի հասցեն և գաղտնաբառը,
• բացվող պատուհանում լրացնել անհրաժեշտ տվյալները,
• «Վճարող կազմակերպություններ» դաշտում ընտրել այն բանկը, ուր ցանկալի է այցելել նպաստը ստանալու համար,
• սեղմել «Ուղարկել» կոճակը։
  
  

Դիմումը ուղարկելուց հետո էլեկտրոնային փոստին կուղարկվի հաղորդագրություն դիմումի հաստատման կամ մերժման մասին։ 

Ներկայացվող պահանջները

Մինչև 2 տարեկան երեխայի խնամքի նպաստ կարելի է ստանալ՝

• մինչև 3 տարեկան երեխայի խնամքի արձակուրդում գտնվելու և նախքան երեխայի 2 տարեկանը լրանալը նպաստ ստանալու համար դիմելու դեպքում,
• գյուղական բնակավայրում հաշվառված լինելու և նպաստին դիմելու օրվա դրությամբ առնվազն 1 տարի անընդմեջ այդ հասցեում բնակվելու դեպքում։

Օտարերկրյա քաղաքացիների համար լրացուցիչ պահանջ է սահմանվում՝ երեխայի ծննդյան օրվա դրությամբ առնվազն 3 տարի անընդմեջ ՀՀ-ում բնակության վայրի հասցեով հաշվառված լինելը։

Պահանջվող փաստաթղթերը

Առաջին ամսվա նպաստը ստանալու համար անհրաժեշտ է ֆիզիկապես այցելել բանկ՝ ներկայացնելով անձը հաստատող փաստաթուղթ։

Եթե առաջին ամսվա նպաստը ֆիզիկապես ստանալու է խնամակալը, ապա անհրաժեշտ է ներկայացնել նաև՝

• խնամակալության մասին փաստաթուղթ,
• ծնողի կողմից տրված լիազորագիր՝ խնամքի նպաստը կանխիկ եղանակող դիմողին վճարելու վերաբերյալ։ Լիազորագիրը պետք է վավերացված լինի նոտարի կողմից։ 

Աջակցության չափը

Եթե երեխան ծնվել է մինչև 2023 թ․-ի հունվարի 1-ը, նպաստը կազմում է՝

• 31,600 ՀՀ դրամ, եթե դիմողը գտնվում է մինչև 2 տարեկան երեխայի խնամքի արձակուրդում, 

• 31,600 ՀՀ դրամ, եթե դիմողը բնակվում է գյուղում և չի աշխատում,

• 63,200 ՀՀ դրամ, եթե դիմողը բնակվում է գյուղում և գտնվում է մինչև 2 տարեկան երեխայի խնամքի արձակուրդում:

Եթե երեխան ծնվել է 2023 թ․-ի հունվարի 1-ից հետո, նպաստը կազմում է՝

• 37,500 ՀՀ դրամ, եթե դիմողը գտնվում է մինչև 2 տարեկան երեխայի խնամքի արձակուրդում,

• 31,600 դրամ ՀՀ, եթե դիմողը չի գտնվում մինչև 2 տարեկան երեխայի խնամքի արձակուրդում,

• 69,100 ՀՀ դրամ, եթե դիմողը բնակվում է գյուղում և գտնվում է մինչև 2 տարեկան երեխայի խնամքի արձակուրդում։

Տրամադրման ժամկետը և կարգը

Դիմումի հաստատումից հետո 10 աշխատանքային օրվա ընթացքում անձը հաստատող փաստաթղթով անհրաժեշտ է այցելել բանկ առաջին ամսվա նպաստը առձեռն ստանալու համար։ Երկրորդ և հաջորդ ամիսների նպաստները տրամադրվում են դիմողի բանկային հաշվեհամարին փոխանցման միջոցով։ 

Հղում օրենսդրությանը

«Պետական նպաստների մասին» ՀՀ օրենք

ՀՀ կառավարության՝ 2023 թվականի նոյեմբերի 30-ի N 2069-Ն որոշում

Իրավական ակտերը հնարավոր է գտնել arlis.am-ում։