Թեթև մարդատար ավտոմեքենա վարելու համար անհրաժեշտ է ունենալ «B» կարգի վարորդական վկայական, որը կարող են ստանալ 18 տարին լրացած անձինք։
ԲԵՏԱ
Հարթակը մշակման փուլում է․ ձեր կարծիքը կօգնի մեզ բարելավել այն:
Ինչպե՞ս ստանալ վարորդական իրավունք
Վարորդական վկայական ստանալու համար դու պետք է 2 փուլով որակավորման քննություններ հանձնես՝
- տեսական քննություն՝ տեսական գիտելիքների ստուգում,
- գործնական քննություն` գործնական վարման հմտությունների և վարքագծի ստուգում։
Ընդ որում՝ որակավորման քննություններ պետք է հանձնես նաև այն դեպքում, երբ բալերդ սպառվեն, և զրկվես վարորդական իրավունքից։ Այս մասին առավել մանրամասն տեղեկություններ կգտնես «Ինչպե՞ս երթևեկել Հայաստանում» ուղեցույցում։
Ուշադրություն
Արցախցիները, ովքեր չունեն ՀՀ քաղաքացիություն, նույնպես կարող են ձեռք բերել վարորդական իրավունք կամ հաշվառել տրանսպորտային միջոցները՝ գրանցված լինելով ՀՀ-ում իրենց բնակության վայրում։
Վարորդական վկայականը և դրա կարգերը
Մոտոցիկլ վարելու համար անհրաժեշտ է ունենալ «A» կամ «A1» կարգի վարորդական վկայական, որը կարող են ստանալ 18 տարին լրացած անձինք։
9-ից 16 նստատեղ ունեցող ավտոբուս վարելու համար անհրաժեշտ է ունենալ «D» կամ «D1» կարգի վարորդական վկայական, որը կարող են ստանալ 21 տարին լրացած անձինք (ՀՀ Զինված ուժեր և այլ զորքեր զորակոչված լինելու դեպքում՝ 19 տարին լրացած անձինք), ովքեր ունեն «B» կամ «C» կարգի կամ «C1» ենթակարգի վարորդական իրավունք։
16-ից ավելի նստատեղ ունեցող ավտոբուս վարելու համար անհրաժեշտ է ունենալ «D» կարգի վարորդական վկայական, որը կարող են ստանալ 21 տարին լրացած անձինք (ՀՀ Զինված ուժեր և այլ զորքեր զորակոչված լինելու դեպքում՝ 19 տարին լրացած անձինք), ովքեր ունեն «B» կամ «C» կարգի կամ «C1» ենթակարգի վարորդական իրավունք։
Տրանսպորտային միջոցներ վարելու համար սահմանված պահանջները ներկայացված են ստորև․
| Տրանսպորտային միջոցի կարգը/ենթակարգը | Վարորդական վկայական ստացողի նվազագույն տարիքը | Պահանջվող հավելյալ վարորդական իրավունքի կարգը/ենթակարգը |
| «AM» | 16 տարեկան | - |
|
«A», «B», «C» կարգ «A1», «B1», «C1» ենթակարգ |
18 տարեկան | - |
|
«D» կարգ «D1» ենթակարգ |
21 տարեկան կամ 19 տարեկան ՀՀ զինված ուժեր և այլ զորքեր զորակոչված լինելու դեպքում |
«B» կամ «C» կարգ կամ «C1» ենթակարգ |
| «BE», «CE», «DE» կարգ | 19 տարեկան | «B», «C» կամ «D» կարգ |
| «C1E», «D1E» ենթակարգ | 19 տարեկան | «C1» կամ «D1» ենթակարգ |
| «T» | 20 տարեկան | - |
1) «AM» ենթակարգ` մոպեդ և դրան համարժեք տեխնիկական բնութագրեր ունեցող քվադրոցիկլ
2) «A1» ենթակարգ` ոչ ավելի, քան 125 սմᶾ աշխատանքային ծավալով և ոչ ավելի, քան 11 կՎտ (կամ 15 ձիաուժ) առավելագույն հզորությամբ շարժիչով մոտոցիկլեր (թեթև մոտոցիկլեր)
3) «A» կարգ` մոտոցիկլեր, բացառությամբ «A1» ենթակարգին վերաբերող տրանսպորտային միջոցների
4) «B1» ենթակարգ` տրիցիկլեր և քվադրոցիկլեր
5) «B» կարգ`
ա. ոչ ավելի, քան 3500 կգ թույլատրելի առավելագույն զանգված կամ բացի վարորդի նստատեղից` ոչ ավելի, քան 8 նստատեղ ունեցող ավտոմոբիլներ, բացառությամբ «A» կարգին վերաբերող տրանսպորտային միջոցների,
կամ
բ. ոչ ավելի, քան 3500 կգ թույլատրելի առավելագույն զանգված կամ բացի վարորդի նստատեղից` ոչ ավելի, քան 8 նստատեղ ունեցող ավտոմոբիլ, բացառությամբ «A» կարգին վերաբերող տրանսպորտային միջոցների` կցորդված կցորդով, որի թույլատրելի առավելագույն զանգվածը չի գերազանցում 750 կգ-ը,
կամ
գ. ոչ ավելի, քան 3500 կգ թույլատրելի առավելագույն զանգված կամ բացի վարորդի նստատեղից` ոչ ավելի, քան 8 նստատեղ ունեցող ավտոմոբիլ, բացառությամբ «A» կարգին վերաբերող տրանսպորտային միջոցների` կցորդված կցորդով, որի թույլատրելի առավելագույն զանգվածը գերազանցում է 750 կգ-ը, սակայն չի գերազանցում ավտոմոբիլի զանգվածը առանց բեռնվածության, իսկ այդպիսի շարժակազմի ընդհանուր թույլատրելի առավելագույն զանգվածը չի գերազանցում 3500 կգ-ը
6) «C1» ենթակարգ`
ա. բեռնատար ավտոմոբիլներ, բացառությամբ «D» կարգին վերաբերող տրանսպորտային միջոցների, որոնց թույլատրելի առավելագույն զանգվածը գերազանցում է 3500 կգ-ը, սակայն չի գերազանցում 7500 կգ-ը,
կամ
բ. բեռնատար ավտոմոբիլներ, բացառությամբ «D» կարգին վերաբերող տրանսպորտային միջոցների, որոնց թույլատրելի առավելագույն զանգվածը գերազանցում է 3500 կգ-ը, սակայն չի գերազանցում 7500 կգ-ը` կցորդված կցորդով, որի թույլատրելի առավելագույն զանգվածը չի գերազանցում 750 կգ-ը
7) «C» կարգ`
ա. բեռնատար ավտոմոբիլներ, բացառությամբ «D» կարգին վերաբերող տրանսպորտային միջոցների, որոնց թույլատրելի առավելագույն զանգվածը գերազանցում է 3500 կգ-ը,
կամ
բ. բեռնատար ավտոմոբիլներ, բացառությամբ «D» կարգին վերաբերող տրանսպորտային միջոցների, որոնց թույլատրելի առավելագույն զանգվածը գերազանցում է 3500 կգ-ը` կցորդված կցորդով, որի թույլատրելի առավելագույն զանգվածը չի գերազանցում 750 կգ-ը
8) «D1» ենթակարգ`
ա. ուղևորներ փոխադրելու համար նախատեսված և բացի վարորդի նստատեղից` ավելի քան 8, սակայն ոչ ավելի, քան 16 նստատեղ ունեցող ավտոմոբիլներ (ավտոբուսներ)
կամ
բ. ուղևորներ փոխադրելու համար նախատեսված և բացի վարորդի նստատեղից` ավելի քան 8, սակայն ոչ ավելի, քան 16 նստատեղ ունեցող ավտոմոբիլներ (ավտոբուսներ)` կցորդված կցորդով, որի թույլատրելի առավելագույն զանգվածը չի գերազանցում 750 կգ-ը
9) «D» կարգ`
ա. ուղևորներ փոխադրելու համար նախատեսված և բացի վարորդի նստատեղից` ավելի քան 8 նստատեղ ունեցող ավտոմոբիլներ (ավտոբուսներ)
կամ
բ. ուղևորներ փոխադրելու համար նախատեսված և բացի վարորդի նստատեղից` ավելի քան 8 նստատեղ ունեցող ավտոմոբիլներ (ավտոբուսներ)` կցորդված կցորդով, որի թույլատրելի առավելագույն զանգվածը չի գերազանցում 750 կգ-ը
10) «BE» կարգ`
ա. «B» կարգի ավտոմոբիլ` կցորդված կցորդով, որի թույլատրելի առավելագույն զանգվածը գերազանցում է 750 կգ-ը և գերազանցում է ավտոմոբիլի զանգվածն առանց բեռնվածության,
կամ
բ. «B» կարգի ավտոմոբիլ` կցորդված կցորդով, որի թույլատրելի առավելագույն զանգվածը գերազանցում է 750 կգ-ը, իսկ այդպիսի շարժակազմի ընդհանուր թույլատրելի առավելագույն զանգվածը գերազանցում է 3500 կգ-ը
11) «C1E» ենթակարգ` «C1» ենթակարգի ավտոմոբիլ` կցորդված կցորդով, որի թույլատրելի առավելագույն զանգվածը գերազանցում է 750 կգ-ը, սակայն չի գերազանցում ավտոմոբիլի զանգվածն առանց բեռնվածության, իսկ այդպիսի շարժակազմի ընդհանուր թույլատրելի առավելագույն զանգվածը չի գերազանցում 12000 կգ-ը
12) «CE» կարգ` «C» կարգի ավտոմոբիլ` կցորդված կցորդով, որի թույլատրելի առավելագույն զանգվածը գերազանցում է 750 կգ-ը
13) «D1E» ենթակարգ` «D1» ենթակարգի ավտոմոբիլ` կցորդված կցորդով, որը նախատեսված չէ ուղևորներ փոխադրելու համար, և որի թույլատրելի առավելագույն զանգվածը գերազանցում է 750 կգ-ը, սակայն չի գերազանցում ավտոմոբիլի զանգվածը առանց բեռնվածության, իսկ այդպիսի շարժակազմի ընդհանուր թույլատրելի առավելագույն զանգվածը չի գերազանցում 12000 կգ-ը
14) «DE» կարգ` «D» կարգի ավտոմոբիլ (ավտոբուս)` կցորդված կցորդով, որի թույլատրելի առավելագույն զանգվածը գերազանցում է 750 կգ-ը
15) «T» կարգ` տրոլեյբուս:
Որակավորման առաջին փուլ
Տեսական քննություն
Առցանց հերթագրվել տեսական քննությանը
Սկսել
Տեսական քննությունը հանձնելու համար պետք է այցելես հաշվառման-քննական բաժին (ՀՔԲ)։ Քննությունն անցկացվում է համակարգչով և տևում է 30 րոպե։
Պատահականության սկզբունքով կազմվում է հոգեբանական 3 և գիտելիքների ստուգման 20 հարց պարունակող հարցաշար, ընդ որում՝ գիտելիքների ստուգման թեստի հարցերին թույլատրվում է պատասխանել միայն հոգեբանական թեստի բոլոր հարցերին ճիշտ պատասխանելու դեպքում։
Քննությունը հաջողությամբ հանձնելու համար անհրաժեշտ է ճիշտ պատասխանել գիտելիքների ստուգման 20 հարցերից առնվազն 18-ին։
Գիտելիքների ստուգման հարցերը ներառում են՝
-
15 հարց՝ ՀՀ ճանապարհային երթևեկության կանոններից (ՀՀ կառավարության՝ 28․06․2007 թվականի N 955-Ն որոշման հավելված 1),
-
2 հարց՝ տրանսպորտային միջոցների շահագործումն արգելող պայմանների մասին (ՀՀ կառավարության՝ 28․06․2007 թվականի N 955-Ն որոշման հավելված 2),
-
2 հարց՝ «Ճանապարհային երթևեկության անվտանգության ապահովման մասին» ՀՀ օրենքից,
-
1 հարց՝ առաջին բուժօգնության վերաբերյալ։
Տեսական քննությունը հնարավոր է հանձնել հայերեն, ռուսերեն, անգլերեն և արաբերեն։
Տեսական քննությունը հաջողությամբ հանձնելու համար դու պետք է տիրապետես ճանապարհային երթևեկության կանոններին՝ սահմանված ՀՀ կառավարության 2007 թվականի հունիսի 28-ի N 955-Ն որոշմամբ, և «Ճանապարհային երթևեկության անվտանգության ապահովման մասին» ՀՀ օրենքին, ծանոթ լինես ճանապարհային երթևեկության նշաններին։
Գիտելիքներդ ստուգելու համար կարող ես օգտվել տեսական քննությունների հարցաշարերից, որոնք պարունակում են 1,116 հարց։
Քննությանը կարող ես պատրաստվել ինչպես ինքնուրույն, այնպես էլ ավտոդպրոց հաճախելով։
Տեսական քննությանը ներկայանալիս պետք է ունենաս անձը հաստատող փաստաթուղթ, որը կարող է լինել`
- անձնագիր կամ նույնականացման քարտ,
- կացության քարտ,
- ապաստան հայցողի անձը հաստատող վկայական,
- կոնվենցիոն ճամփորդական փաստաթուղթ և այլն։
Նախքան քննասենյակ մտնելը հաշվառման-քննական բաժնում վճարային տերմինալի միջոցով պետք է վճարես տեսական քննության մասնակցության վճարը՝ 3,000 դրամ (վճարումը հնարավոր է կատարել նաև առցանց) իսկ հաշվառման-քննական բաժնում հերթագրման համակարգի առկայության դեպքում (Երևան, Կոտայք, Արտաշատ) պետք է նաև վերցնես հերթի կտրոն։
Անձը հաստատող փաստաթուղթը, հերթի և վճարման կտրոնները պետք է ներկայացնես համապատասխան աշխատակցին, ով փաստաթղթերդ ստուգելուց հետո քեզ կգրանցի, կտրամադրի հերթական համար և կլուսանկարի։ Հաշվի առ, որ հետագայում վարորդական վկայականիդ համար հենց այդ լուսանկարն է օգտագործվելու։
Քեզ կտրամադրվի եզակի հերթական համար պարունակող արձանագրություն։ Այն պետք է քեզ մոտ պահես և ներկայացնես ամեն անգամ քննություն հանձնելիս՝ մինչև վարորդական վկայական ստանալը։
Արձանագրությունը քեզ մոտ չլինելու դեպքում քննությունից առաջ կարող ես դիմել հաշվառման-քննական բաժնի աշխատակցին, ով քեզ կտրամադրի նոր արձանագրություն՝ եզակի համարով։
Տեսական քննությունը հաջողությամբ չհանձնելու դեպքում այն կարող ես վերահանձնել ձախողված առաջին քննության օրվանից ոչ շուտ, քան 7 օր անց։ Դրա համար միևնույն եղանակով պետք է՝
-
նշված օրը ներկայանաս քննության,
-
կատարես վճարում,
-
հանձնես տեսական ևս մեկ քննություն։
Երկրորդ փորձից տեսական քննությունը դրական չհանձնելու դեպքում յուրաքանչյուր հաջորդ տեսական քննությանը կարող ես մասնակցել բացասական հանձնված վերջին քննության օրվանից ոչ շուտ, քան մեկ ամիս անց։
Տեսական քննությունը հաջողությամբ հանձնելուց հետո 12 ամսվա ընթացքում պետք է հերթագրվես և հանձնես նաև գործնական քննություն։ Նշված ժամկետը լրանալուց հետո գործնական քննությունը չհանձնելու դեպքում անհրաժեշտ կլինի ևս մեկ անգամ տեսական քննություն հանձնել։
Որակավորման երկրորդ փուլ
Գործնական քննություն
Առցանց հերթագրվել գործնական քննությանը
Սկսել
Գործնական քննության ընթացքում քննությունն անցկացնողը նստում է քո կողքին (բացառությամբ մոպեդի, մոտոցիկլի, տրիցիկլի և քվադրոցիկլի՝ «A» կարգի, «AM», «A1» և «B1» ենթակարգերի տրանսպորտային միջոցների), տալիս է հրահանգներ ավտոմեքենան վարելու, կայանելու, շրջադարձ կատարելու և այլ գործողությունների մասին։
Գործնական քննությունն անցկացվում է՝
-
մոպեդի, մոտոցիկլի, տրիցիկլի և քվադրոցիկլի («A» կարգի, «AM», «A1» և «B1» ենթակարգերի տրանսպորտային միջոցների) դեպքում՝ ավտոդրոմում կամ ավտոհրապարակում, իսկ դրանց բացակայության դեպքում` ճանապարհային երթևեկության իրական պայմաններում,
-
թեթև մարդատար ավտոմեքենայի («B» կարգի տրանսպորտային միջոցների) դեպքում՝ ճանապարհային երթևեկության իրական պայմաններում,
-
բեռնատար ավտոմեքենայի, ավտոբուսի և կցորդով կցորդված ավտոմոբիլի («C», «D», «BE», «CE» և «DE» կարգերի ու «C1», «D1», «C1E» և «D1E» ենթակարգերի տրանսպորտային միջոցների) դեպքում՝ ավտոդրոմում և ճանապարհային երթևեկության իրական պայմաններում:
Ավտոդրոմում կամ ավտոհրապարակում անցկացվող գործնական քննությունը տևում է`
-
15 րոպե՝ մոպեդի և դրան համարժեք քվադրոցիկլի («AM» ենթակարգի տրանսպորտային միջոցների) դեպքում,
-
25 րոպե` մոտոցիկլի, տրիցիկլի և քվադրոցիկլի («A» կարգի և «A1» և «B1» ենթակարգերի տրանսպորտային միջոցների) դեպքում,
-
45 րոպե` բեռնատար ավտոմեքենայի, ավտոբուսի և կցորդով կցորդված ավտոմոբիլի («C», «D», «BE», «CE», «DE» կարգերի և «C1», «D1», «C1E» և «D1E» ենթակարգերի տրանսպորտային միջոցների) դեպքում։
Ճանապարհային երթևեկության իրական պայմաններում անցկացվող գործնական քննությունը տևում է՝
-
25 րոպե` կցորդով և առանց կցորդի թեթև մարդատար ավտոմեքենայի («B» և «BE» կարգերի տրանսպորտային միջոցների) դեպքում, իսկ ավտոդրոմի կամ ավտոհրապարակի բացակայության դեպքում՝ նաև մոպեդի, մոտոցիկլի, տրիցիկլի և քվադրոցիկլի («A» կարգի, «AM», «A1» և «B1» ենթակարգերի) դեպքում,
-
45 րոպե` կցորդով և առանց կցորդի բեռնատար ավտոմեքենայի և ավտոբուսի («C», «D», «CE», «DE» կարգերի և «C1», «D1», «C1E» և «D1E» ենթակարգերի տրանսպորտային միջոցների) դեպքում։
Տրանսպորտային միջոցների կարգերի և ենթակարգերի մասին առավել մանրամասն տեղեկատվություն կարող ես գտնել «Որո՞նք են տրանսպորտային միջոցների կարգերը և ենթակարգերը» բաժնում։
Գործնական քննությանը կարող ես պատրաստվել ինքնուրույն կամ հաճախելով ավտոդպրոց՝ կախված տրանսպորտային միջոցի տեսակից․ մոպեդ, մոտոցիկլ, տրիցիկլ, քվադրոցիկլ, թեթև մարդատար և բեռնատար մեքենաներ («A», «B» և «C» կարգերի ու «AM», «A1», «B1» և «C1» ենթակարգերի տրանսպորտային միջոցներ) վարելու վարորդական վկայական ստանալու համար որակավորման քննություններին կարող են մասնակցել ինքնուս անձինք:
Գործնական քննությանը ներկայանալիս պետք է ունենաս անձը հաստատող փաստաթուղթ, որը կարող է լինել`
- անձնագիր,
- կացության քարտ,
- ապաստան հայցողի անձը հաստատող վկայական,
- կոնվենցիոն ճամփորդական փաստաթուղթ և այլն։
Նախքան քննությունը սկսելը հաշվառման-քննական բաժնում տեղադրված վճարային տերմինալների միջոցով կամ բանկային փոխանցմամբ պետք է վճարես գործնական քննության մասնակցության վճարները՝ 3,000 դրամ և 10,000 դրամ։ Բանկային փոխանցման դեպքում անհրաժեշտ է 3,000 դրամը փոխանցել 90005163218 հաշվեհամարին, իսկ 10,000 դրամը՝ 900013150033 հաշվեհամարին։
Վճարումը կատարելուց հետո պետք է վերցնես հերթի կտրոն և հետևես սրահի աշխատակիցների ուղղորդումներին։ Այնուհետև պետք է հերթի կտրոնով մոտենաս գործնական քննության անցկացման վայր և սպասես քո հերթին։
Գործնական քննությունը հաջողությամբ չհանձնելու դեպքում այն կարող ես վերահանձնել ձախողված առաջին քննության օրվանից ոչ շուտ, քան 7 օր անց։ Դրա համար միևնույն եղանակով պետք է՝
-
նշված օրը ներկայանաս քննության,
-
կատարես վճարում,
-
գործնական քննությունը հանձնես ևս մեկ անգամ։
Երկրորդ փորձից գործնական քննությունը դրական չհանձնելու դեպքում յուրաքանչյուր հաջորդ գործնական քննությանը կարող ես մասնակցել բացասական հանձնված վերջին քննության օրվանից ոչ շուտ, քան մեկ ամիս անց։
Վարորդական վկայականի տրամադրումը և դրա վերաթողարկումը
Գործնական քննությունը հաջողությամբ հանձնելու դեպքում վարորդական վկայականը կստանաս նույն օրը՝ դրա համար վճարելով 12,000 դրամ։ Վճարումը կարող ես կատարել առցանց կամ տեղում՝ վճարային տերմինալի միջոցով։
Ազգային վարորդական վկայականը տրվում է 10 տարի ժամկետով, ինչից հետո անհրաժեշտ կլինի վերաթողարկել այն։
Դու կարող ես վերաթողարկել վարորդական վկայականդ, եթե՝
- կորցրել ես այն,
- լրացել է վկայականիդ գործողության ժամկետը։
Եթե կորցրել ես վարորդական վկայականդ կամ լրացել է վկայականիդ գործողության ժամկետը և ցանկանում ես վերաթողարկել այն, ապա կարող ես ստանալ նոր վարորդական վկայական՝ համապատասխան դիմումը ներկայացնելուց հետո 1 աշխատանքային օրվա ընթացքում։
Նկատի ունեցիր՝ թե՛ կորստի, թե՛ ժամկետը լրանալու դեպքում նոր վարորդական վկայականը տրամադրվում է առանց որակավորման քննություններ հանձնելու։ Քննություն հանձնելու կարիք կառաջանա այն դեպքում, եթե որոշես փոխել քո վարորդական վկայականի կարգը։
-
անձը հաստատող փաստաթուղթ, որը կարող է լինել՝
-
անձնագիր կամ նույնականացման քարտ,
-
կացության քարտ,
-
ապաստան հայցողի անձը հաստատող վկայական,
- կոնվենցիոն ճամփորդական փաստաթուղթ և այլն,
-
-
դիմում անձնագիրը վերաթողարկելու մասին,
-
տեղեկանք հաշվառման հասցեիդ վերաբերյալ, եթե անձնագրումդ բացակայում է հաշվառման հասցեն,
-
12,000 դրամ պետական տուրքի վճարումը հավաստող անդորրագիր։
Առցանց դիմել հաշվառման հասցեի մասին տեղեկանք ստանալու համար
Սկսել
Առցանց հերթագրվել նոր վարորդական վկայական ստանալու համար
Սկսել
Անհրաժեշտ փաստաթղթերը ներկայացնելուց և լուսանկարվելուց հետո կստանաս 20-օրյա ժամկետ ունեցող ժամանակավոր վարորդական վկայական, որը հետագայում կփոխարինվի նոր վկայականով։
Ուշադրություն
Ժամանակավոր վարորդական վկայականը տրվում է միայն այն դեպքում, եթե նոր վարորդական վկայական ստանալու համար դիմելու պահի դրությամբ դիմումատուն հաշվառված չէ թմրաբանական կամ հոգեբուժական հաստատություններում, տրանսպորտային միջոցներ վարելու իրավունքից զրկված անձանց ցանկում։
Նոր վարորդական վկայականը ստանալուց հետո ժամանակավոր վկայականը վերադարձնելու ես։
Ինչպե՞ս են օտարերկրյա քաղաքացիները ստանում վարորդական իրավունք
Օտարերկրյա քաղաքացիները ՀՀ վարորդական վկայական ստանալու քննություններ հանձնում և վարորդական վկայական են ստանում նույն կերպ, ինչ ՀՀ քաղաքացիները:
Հայաստանում վարորդական վկայական ստանալու համար օտարերկրա քաղաքացիները բացի անձը հաստատող փաստաթղթից ներկայացնում են նաև այլ անհրաժեշտ փաստաթղթեր, որոնք կախված են նրանց ՀՀ-ում բնակվելու կարգավիճակից։
Օտարերկրյա քաղաքացիները ՀՀ վարորդական վկայական ստանալու համար ներկայացնում են հետևյալ փաստաթղթերը․
- ՀՀ-ում կացության իրավունք ունեցող օտարերկրացիները՝ կացության քարտ,
- փախստական (ապաստան հայցող) անձինք՝ փախստականի վկայականը,
- ժամանակավոր պաշտպանություն ստացած փախստականները՝ ժամանակավոր ապաստանի վկայական:
Տեսական քննությունը հնարավոր է հանձնել հայերեն, ռուսերեն, անգլերեն և արաբերեն։
Հնարավո՞ր է Հայաստանում վարել այլ երկրի վկայականով
Այո՛։ Հայաստանում հնարավոր է մեքենա վարել օտարերկրյա վարորդական վկայականով, եթե այն համապատասխանում է «Ճանապարհային երթևեկության մասին» Վիեննայի կոնվենցիայի պահանջներին։
Այնուամենայնիվ, եթե վարորդը ՀՀ երկքաղաքացի է, ապա Հայաստանում մեքենա վարելու համար նա պարտադիր պետք է ունենա ՀՀ ազգային վարորդական վկայական։ ՀՀ երկքաղաքացիները կարող են ազգային վարորդական վկայական ստանալ առանց վարորդական տեսական և գործնական քննություններ հանձնելու՝ 1 աշխատանքային օրվա ընթացքում։
Ըստ «Ճանապարհային երթևեկության մասին» Վիեննայի կոնվենցիայի պահանջների՝ վարորդական վկայականի վրա պետք է նշված լինի․
-
վարորդական վկայականի գրանցման համարը,
-
փոխադրամիջոցի առաջին գրանցման ամսաթիվը,
-
վկայականի տիրոջ անունը, ազգանունը և բնակության վայրը,
-
գրանցման պետության տարբերանշանը,
-
"Certificat d’immatriculation" գրառումը։
Վիեննայի կոնվենցիայով սահմանված են նաև վարորդական վկայականին վերաբերող այլ պահանջներ։ Տեղեկանալու համար, թե արդյոք օտարերկրյա վարորդական վկայականը համապատասխանում է Կոնվենցիայի պահանջներին, անհրաժեշտ է դիմել Ճանապարհային ոստիկանության հաշվառման-քննական բաժին (ՀՔԲ)։
- ՀՀ երկքաղաքացիները Հայաստանում վարելու համար պարտադիր պետք է ունենան ՀՀ ազգային վարորդական վկայական։
- Օտարերկրացիները կարող են վարել իրենց երկրի ազգային վարորդական վկայականով, եթե Հայաստանի և տվյալ երկրի միջև կա ազգային վարորդական վկայականները ճանաչելու փոխհամաձայնություն։
Այս դեպքում օտարերկրացիները կարող են իրենց ազգային վարորդական վկայականով վարել Հայաստանում, եթե անգամ իրենց երկրի վարորդական վկայականը չի համապատասխանում Վիեննայի կոնվենցիայի պահանջներին (օրինակ՝ Հայաստանի և Արաբական Միացյալ Էմիրությունների քաղաքացիների դեպքում)։ - Օտարերկրացիները կարող են վարել իրենց երկրի ազգային վարորդական վկայականով, եթե ունեն միջազգային վարորդական վկայական, որը համապատասխանում է Վիեննայի կոնվենցիայի պահանջներին։ Վարելիս անհրաժեշտ է ունենալ և՛ ազգային, և՛ միջազգային վկայականները։
ՀՀ երկքաղաքացիների վարորդական վկայականի ստացումը
Երկքաղաքացիները պետք է այցելեն նախընտրելի հաշվառման-քննական բաժին (ՀՔԲ) և ներկայացնեն ազգային վարորդական վկայական ստանալու դիմում, որին կից անհրաժեշտ է ներկայացնել հետևյալ փաստաթղթերը`
- անձնագրի պատճենը,
- այլ պետության վարորդական վկայականի պատճենը,
- պետական տուրքի վճարման անդորրագիր։
Երկքաղաքացիները ՀՀ ազգային վարորդական վկայական ստանալու համար փաստաթղթերը հաշվառման-քննական բաժին (ՀՔԲ) են ներկայացնում են 2 փուլով։
Դիմում ներկայացնելիս՝
- անձը հաստատող փաստաթղթի պատճենը,
- այլ պետության վարորդական վկայականի պատճենը։
Վարորդական վկայականը ստանալիս՝
- ՀՀ և օտարերկրյա պետության անձնագրերի բնօրինակները,
- օտարերկրյա վարորդական վկայականի բնօրինակը,
- պետական տուրքի վճարման անդորրագիր։
Ուշադրություն
ՀՀ ազգային վարորդական վկայականը ստանալիս Ճանապարհային ոստիկանությունը օտարերկրյա վարորդական վկայականի բնօրինակը պարզապես լուսապատճենում է արխիվացման նպատակով․ այն վերադարձվում է դիմողին և չի կորցնում իրավական ուժը։
ՀՀ ազգային վկայականը երկքաղաքացիներին տրամադրվում է 1 աշխատանքային օրվա ընթացքում։
Դիմումը ներկայացնելուց հետո Ճանապարհային ոստիկանությունն իրականացնում է օտարերկրյա պետության վարորդական վկայականի վավերականության ստուգում։ Եթե վավերականությունը հաստատվում է, անձը հեռախոսազանգի կամ գրության միջոցով տեղեկացվում է, որ պետք է այցելի հաշվառման-քննական բաժին՝ ՀՀ ազգային վարորդական վկայական ստանալու համար։
Օտարեկրացիների (ՀՀ երկքաղաքացի չհանդիսացող) վարորդական վկայականի փոխանակումը
- Եթե օտարերկրյա վարորդական վկայականը համապատասխանում է Վիեննայի կոնվենցիայի պահանջներին, ապա օտարերկրացին կարող է Հայաստանում վարել այդ վկայականով։
Ցանկության դեպքում հնարավոր է օտարերկրյա վարորդական վկայականը փոխարինել հայկականով։ - Եթե օտարերկրյա վարորդական վկայականը չի համապատասխանում Վիեննայի կոնվենցիայի պահանջներին, ապա օտարերկրացին պետք է ստանա ՀՀ ազգային վարորդական վկայական՝ հանձնելով տեսական և գործնական քննություններ։
Ուշադրություն
Եթե օտարերկրացին փոխանակում է իր երկրի ազգային վարորդական վկայականը հայկականով, իր երկրի ազգային վարորդական վկայականը կորցնում է իրավական ուժը։
- Եթե օտարերկրյա վարորդական վկայականը համապատասխանում է Վիեննայի կոնվենցիայի պահանջներին, ապա օտարերկրացին կարող է ըստ ցանկության իր վարորդական վկայականը փոխանակել հայկականով՝ առանց քննություններ հանձնելու։
Այս դեպքում օտարերկրյա վարորդական վկայականն իր իրավական ուժը կկորցնի։ - Եթե օտարերկրյա վարորդական վկայականը չի համապատասխանում Վիեննայի կոնվենցիայի պահանջներին, ապա օտարերկրացին պետք է ստանա ՀՀ ազգային վարորդական վկայական՝ հանձնելով տեսական և գործնական քննություններ։
Օտարերկրյա վարորդական վկայականը հայկականով փոխանակելու համար օտարերկրացիները պետք է դիմեն Ճանապարհային ոստիկանության նախընտրելի հաշվառման-քննական բաժին (ՀՔԲ)։
Անհրաժեշտ է նկատի ունենալ, որ օտարերկրյա վարորդական վկայականը պետք է համապատասխանի Վիեննայի կոնվենցիայի պահանջներին, հակառակ դեպքում փոխանակումը հնարավոր չի լինի և անհրաժեշտ կլինի հանձնել տեսական և գործնական քննություն՝ ՀՀ վարորդական վկայական ստանալու համար։
Փոխանակումը տևում է 2-4 ամիս․ Ճանապարհային ոստիկանությունը վկայականի օրինականությունը ստուգելու նպատակով հարցում է ուղարկում այն երկրի լիազոր մարմնին, որի ազգային վարորդական վկայականը պետք է փոխանակվի հայկականով։ Վավերականությունը ստուգելուց հետո վկայականը փոխանակվում է հայկականով։
Ուշադրություն
Նկատի ունեցիր, որ վարորդական վկայականի փոխանակման դեպքում հանձնում ես քո ազգային վարորդական վկայականը և ունենում ես միայն ՀՀ վարորդական վկայական։ Այսինքն՝ օտարերկրյա վարորդական վկայականը կորցնում է իր օրինական ուժը։
Օտարերկրյա վարորդական վկայականը ՀՀ վարորդականով փոխանակելիս անհրաժեշտ է ՀՀ ճանապարհային ոստիկանություն ներկայացնել․
- անձը հաստատող փաստաթուղթ,
- օտարերկրյա վարորդական վկայականի բնօրինակը,
- ՀՀ-ում օրինական հիմքով բնակվելը կամ գտնվելը հաստատող փաստաթուղթ, մասնավորապես՝
- կացության իրավունք ունենալու դեպքում՝ կացության քարտ,
- փախստական (ապաստան հայցող) անձ լինելու դեպքում՝ փախստականի վկայական,
- ժամանակավոր պաշտպանություն ստացած փախստական լինելու դեպքում՝ ժամանակավոր ապաստանի վկայական,
- քաղաքացիություն չունեցող անձ լինելու դեպքում՝ կոնվենցիոն ճամփորդական փաստաթուղթ։
Օտարերկրացիներին ՀՀ վարորդական վկայականը տրամադրվում է 2-4 ամսվա ընթացքում։ Այդ ընթացքում ստուգվում է տվյալ երկրի վարորդական վկայականի վավերականությունը, ինչից հետո օտարերկրյա քաղաքացին ստանում է ՀՀ վարորդական վկայական, իսկ իր ազգային վարորդական վկայականը կորցնում է իրավական ուժը։
Այո՛։ Եթե օտարերկրյա քաղաքացին Հայաստանում մեքենա է վարում իր երկրի վարորդական վկայականով, որը չի համապատասխանում Վիեննայի կոնվենցիայի պահանջներին, ապա նա տուգանվում է 10,000 դրամի չափով։
Ամրագրել այց օտարերկրյա վարորդական վկայականը հայկականով փոխանակելու համար
Սկսել
Ինչպե՞ս ստանալ միջազգային վարորդական վկայական
Գործող ազգային վարորդական վկայական ունենալու դեպքում առանց տեսական կամ գործնական քննությունների մասնակցելու կարող ես ձեռք բերել նաև միջազգային վարորդական վկայական, որը թույլ կտա քեզ ավտոմեքենա վարել արտասահմանում։ Վկայականը կտրամադրվի մեկ աշխատանքային օրվա ընթացքում։
Միջազգային վկայականը ստանալու համար պետք է ներկայանաս նախընտրելի հաշվառման քննական ստորաբաժանում և ներկայացնես դիմում, ընդ որում՝ հաշվառման քննական բաժնում նախապես հերթագրվելու անհրաժեշտություն չկա։
Մոպեդ, մոտոցիկլ, տրիցիկլ, քվադրոցիկլ և թեթև մարդատար ավտոմեքենա («A» և «B» կարգերի ու «AM», «A1» և «B1» ենթակարգերի տրանսպորտային միջոցներ) վարելու իրավունքի միջազգային վարորդական վկայականները տրվում են 18 տարին լրացած անձանց, իսկ բեռնատար ավտոմեքենա, ավտոբուս և կցորդով կցորդված ավտոմոբիլ («C», «D», «BE», «CE» և «DE» կարգերի ու «C1», «D1», «C1E» և «D1E» ենթակարգերի տրանսպորտային միջոցներ) վարելու միջազգային վարորդական վկայականները` 21 տարին լրացած անձանց։
Տրանսպորտային միջոցների կարգերի և ենթակարգերի մասին առավել մանրամասն տեղեկատվություն կարող ես գտնել «Որո՞նք են տրանսպորտային միջոցների կարգերը և ենթակարգերը» բաժնում։
Միջազգային վարորդական վկայականը ստանալու համար անհրաժեշտ է հաշվառման քննական նախընտրելի բաժին ներկայացնել՝
-
Անձը հաստատող փաստաթուղթը և դրա կրկնօրինակը,
-
3x4 չափսի մեկ գունավոր լուսանկար,
-
վարորդական վկայական տալու համար օրենքով սահմանված պետական տուրքի (12,000 դրամ) վճարման անդորրագիրը: Վճարումը հնարավոր է կատարել՝
-
առցանց (անհրաժեշտ է հաշվի առնել, որ առցանց վճարելու դեպքում հնարավոր է նախատեսվածից երկար սպասել վկայականը ստանալու համար, քանի օր փոխանցված գումարը հաշվին հասանելի կդառնա մի քանի օրվա ընթացքում),
-
հաշվառման-քննական բաժնում տեղադրված վճարային տերմինալով,
-
-
գործող ազգային վարորդական վկայականը և դրա պատճենը։
Միջազգային վարորդական վկայականը տրամադրվում է 3 տարի ժամկետով, բայց ոչ ավելի, քան ազգային վարորդական վկայականի գործողության ժամկետը:
Այս էջը օգտակա՞ր էր