ԲԵՏԱ

Հարթակը մշակման փուլում է․ ձեր կարծիքը կօգնի մեզ բարելավել այն:

Ինչպե՞ս գրանցել բիզնես Հայաստանում

Բիզնեսի տեսակը որոշելուց հետո հաջորդ քայլը բիզնեսի գրանցումն է։ Բիզնեսը գրանցելու համար նախ անհրաժեշտ է ընտրել դրա կազմակերպաիրավական ձևը, որից էլ կախված է լինելու հետագայում բիզնեսի համար վճարվող հարկատեսակները, մասնակիցների ընտրությունը, նրանց իրավունքներն ու պարտականությունները, բիզնեսի գործունեության սահմաններն ու հնարավորությունները։ 

Բիզնեսի գրանցման առանձնահատկությունները

Բիզնեսը գրանցելու համար անհրաժեշտ է դիմել՝

  • Իրավաբանական անձանց պետական ռեգիստրի գործակալություն (ք. Երևան, Կոմիտաս 49),
  • Իրավաբանական անձանց պետական ռեգիստրի գործակալության տարածքային գրասենյակներ,
  • ՀՀ-ում գործող բանկեր (նախքան դիմելը անհրաժեշտ է բանկից ճշտել՝ արդյոք տվյալ բանկը իրականացնում է այդ գործառույթը),
  • Հայփոստի մասնաճյուղեր։ 

Ուշադրություն
Ֆինանսական, բանկային, վարկային և ապահովագրական ոլորտի ընկերություն գրանցելու համար անհրաժեշտ է դիմել ՀՀ կենտրոնական բանկ։

Իրավաբանական անձանց գրանցումը տևում է՝

  • 1 աշխատանքային օր, եթե հիմնադիրները ֆիզիկական անձինք են և չեն օգտվում օրենքով նախատեսված փաստաթղթերի նմուշային ձևերից,
  • 2 աշխատանքային օր, եթե հիմնադիրների թվում կա իրավաբանական անձ, և նրանք չեն օգտվում օրենքով նախատեսված փաստաթղթերի նմուշային ձևերից,
  • գրանցվում է անմիջապես, եթե գրանցող անձը փաստաթղթերը իրավաբանական անձանց պետական ռեգիստրի գործակալություն ներկայացնելիս օգտվում է օրենքով նախատեսված փաստաթղթերի նմուշային ձևերից։ 

Հիմնադիրներից պահանջվող տվյալները կարող են տարբերվել՝ կախված նրանց քաղաքացիությունից և ֆիզիկական կամ իրավաբանական անձ լինելու հանգամանքից։


ՀՀ քաղաքացի լինելու դեպքում հիմնադիրը պետք է ներկայացնի՝

  • անձնագիր կամ նույնականցման քարտ,
  • հանրային ծառայությունների համարանիշ։


ՀՀ քաղաքացի չլինելու դեպքում հիմնադիրը պետք է ներկայացնի՝

  • անձը հաստատող փաստաթղթի պատճենը՝ նոտարական հաստատմամբ հայերեն թարգմանությամբ,
  • հանրային ծառայությունների համարանիշ։


Եթե հիմնադիրը ՀՀ-ում գրանցված իրավաբանական անձ է, պետք է ներկայացվի՝

  • իրավաբանական անձի կառավարման լիազորված մարմնի համապատասխան որոշումը նոր
  • իրավաբանական անձ հիմնադրելու մասին և հիմնադիր իրավաբանական անձի անվանումն ու պետական գրանցման համարը:


Եթե հիմնադիրը օտարերկրյա իրավաբանական անձ է, պետք է ներկայացվի՝ 

  • իրավաբանական անձի կառավարման լիազորված մարմնի համապատասխան որոշումը նոր իրավաբանական անձ հիմնադրելու մասին, իրավաբանական անձի անվանումը և պետական գրանցման համարը։ Բոլոր փաստաթղթերը պետք է թարգմանված լինեն հայերեն՝ նոտարական վավերացմամբ։

Հայաստանում բիզնեսը հնարավոր է գրանցել ինչպես առցանց եղանակով, այնպես էլ ֆիզիկապես։ 

  • Առցանց եղանակով այժմ հնարավոր է գրանցել միայն ԱՁ և ՍՊԸ, եթե գրանցողն ունի նույնականացման քարտ և թվային ստորագրություն։
  • Ֆիզիկապես բիզնես գրանցել կարող են բոլորը, այդ թվում՝ օտարերկրյա քաղաքացիները։ 
Առցանց գրանցել սահմանափակ պատասխանատվությամբ ընկերություն (ՍՊԸ)
Սկսել
Ֆիզիկապես գրանցել սահմանափակ պատասխանատվությամբ ընկերություն (ՍՊԸ)
Իմանալ ավելին
Առցանց հաշվառվել որպես անհատ ձեռնարկատեր (ԱՁ)
Սկսել

Բիզնեսի ֆիրմային անվանումը

Ֆիրմային անվանումը այն անունն է, որի ներքո իրավաբանական անձը իրականացնում է տնտեսական գործունեություն և տարբերվում է այլ իրավաբանական անձանցից։

Անվանումը պետք է պարունակի իրավաբանական անձի կազմակերպման իրավական ձևին բնորոշող բառեր՝ օրինակ ՍՊԸ, ԲԲԸ և այլն, ինչպես նաև հատուկ, հասարակ կամ մտացածին առնվազն մեկ անուն։

Այն կարող է պարունակել նաև իրավաբանական անձի գործունեության վայրը կամ բնույթը նկարագրող այլ բառեր։  

Անվանման հասանելիությունը հնարավոր է ստուգել իրավաբանական անձանց ռեգիստրի կայքում որոնման համակարգի միջոցով։

Անվանումը հասանելի լինելու դեպքում այն հնարավոր է ամրագրել մինչև 6 ամիս ժամկետով, որի ընթացքում կարելի է նախապապատրաստել գրանցման փաստաթղթերը, իսկ բիզնեսը գրանցելիս օգտագործել արդեն ամրագրված անվանումը։

Նախընտրած անվանման գրանցումը կարող է մերժվել, եթե այն՝

  • նման է այլ իրավաբանական անձանց անվանմանը կամ պարունակում է հայհոյանքներ ու վիրավորական բառեր,
  • ներառում է ՀՀ պետական կառավարման մարմինների անվանումներ,
  • պարունակում է ՀՀ պատմական կամ որևէ հանրահայտ անձի լրիվ կամ կրճատ անունը և ներկայացվել է առանց այդ անվան օգտագործման թույլտվության։
  • Ընկերության ֆիրմային անվանման մեջ հանրահայտ անձի անուն կիրառելու դեպքում բիզնեսը գրանցելիս անհրաժեշտ է ներկայացնել տվյալ անձի գրավոր համաձայնությունը։
  • Անձի մահացած լինելու դեպքում համաձայնությունը պետք է տան նրա ժառանգությունը ստացած բոլոր ժառանգները։
  • Եթե անձը մահացել է և ժառանգներ չունի, իր լրիվ կամ կրճատ անունը ֆիրմային անվանման մեջ կարող է օգտագործվել Պետական ռեգիստրի գործակալության կողմից տրված թույլտվության հիման վրա, եթե այդ անձի համբավը ձեռք է բերվել այնպիսի ոլորտում, որը համընկնում է տվյալ իրավաբանական անձի գործունեության հիմնական ոլորտին:

ՀՀ բնակավայրերի (վարչատարածքային միավորներ) անվանումներն օգտագործվում են համապատասխանաբար մարզպետի կամ համայնքի ղեկավարի կողմից տրված թույլտվության հիման վրա:

  • «Հայ», «Հայաստան», «հայկական» բառերը և դրանց թարգմանությունները ընկերության ֆիրմային անվանման մեջ կարող են ընդգրկվել միայն ֆիրմային անվանման գրանցման հայտի հիման վրա, որին կից պետք է ներկայացվի տարեկան 600,000 ՀՀ դրամի չափով սահմանված պետական տուրքի վճարման անդորրագիրը կամ դրա 20-նիշանոց ծածկագիրը և համապատասխան հավաստագիր: Անվանման գրանցման հայտի ներկայացումն ու պետական տուրքի առաջին վճարումը կատարվում է բիզնեսի գրանցման պահին։ 
  • Գրանցվելուց հետո յուրաքանչյուր հաջորդ տարվա ընթացքում տվյալ անվանումներն օգտագործելու համար պետք է նախօրոք վճարել պետական տուրքը և վճարման անդորրագիրը կամ դրա 20-նիշանոց ծածկագիրը մինչև այդ տարվա ավարտը ներակայացնել ՀՀ իրավաբանական անձանց պետական ռեգիստրի գործակալություն:
  • Նշված բառերի օգտագործման թույլտվության տրամադրման տարվա սկիզբը համարվում է ֆիրմային անվանման գրանցման կամ դրա փոփոխության օրը:
  • Այս բառերի օգտագործումը առանց պետական տուրքի վճարման հնարավոր է, եթե դրանք հիմնադրի անվանման մաս են։  
Ֆիզիկապես դիմել ֆիրմային անվանման մեջ ՀՀ բնակավայրի անուն օգտագործելու թույլտվության համար
Իմանալ ավելին

Էլեկտրոնային ստորագրության ստացումը

Էլեկտրոնային ստորագրությունը նույնականացման քարտի կամ բջջային ID SIM քարտի միջոցով թվային փաստաթղթերի վավերացման եղանակ է, որն ունենալով՝ հնարավոր է առցանց եղանակով գրանցել կազմակերպություն, հաշվառվել հարկային համակարգում, հաստատել էլեկտրոնային փաստաթղթեր և այլն։

Բիզնես գրանցելիս էլեկտրոնային ստորագրության կիրառությունն ունի մի շարք առավելություններ․  

  • հավաստում է ստորագրողի հեղինակային իրավունքը տվյալ փաստաթղթի նկատմամբ,
  • կեղծելի չէ, քանի որ ստորագրված է հեղինակի նույնականացման քարտով,
  • եզակի է և նախատեսված միանգամյա օգտագործման համար․ ստեղծվելով էլեկտրոնային փաստաթղթի բովանդակության հիման վրա՝ կիրառվում է բացառապես տվյալ փաստաթղթի համար,
  • նրանով ստորագրված փաստաթուղթը փոփոխելի չէ, քանի որ փաստաթղթում կատարված ցանկացած փոփոխություն անվավեր է դարձնում ստորագրությունը։

Էլեկտրոնային ստորագրությունը ճիշտ կիրառելու համար կարող եք այցելել ekeng.am և ծանոթանալ տարբեր ձևաչափի ֆայլեր ստորագրելու վերաբերյալ ուղեցույցներին։

Առցանց ստանալ էլեկտրոնային ստորագրություն
Սկսել

Կնիք ունենալը պարտադիր չէ

Ձեռնարկատիրական գործունեություն իրականացնելիս կնիք ունենալը պարտադիր չէ։ Ցանկության դեպքում այն հնարավոր է ձեռք բերել մասնավոր կազմակերպություններից 8,000-12,000 ՀՀ դրամով:

Ապրանքային նշանի գրանցումը

Ապրանքային նշանը տառ, թիվ, պատկեր կամ հոլոգրամ է, որը հնարավոր է պատկերել գրաֆիկորեն։

Ապրանքային նշան գրանցելու նպատակը որևէ ֆիզիկական կամ իրավաբանական անձի արտադրած ապրանքներն ու ծառայությունները մյուսներից տարբերակելն է։

Դառնալով գրանցված ապրանքային նշանի սեփականատեր անձը՝   

  • կունենա իր ապրանքներն ու ծառայությունները ուրիշ ապրանքներից տարբերելու և տվյալ նշանի օգտագործման թույլտվությունը վճարի դիմաց ուրիշներին տալու բացառիկ իրավունք,
  • կխթանի իր բիզնեսի զարգացումը՝ սպառողների շրջանում դառնալով ճանաչելի և ավելացնելով բիզնեսի եկամտաբերությունը,
  • կկանխի անբարեխիղճ մրցակցությունը՝ այլ արտադրողների կողմից կեղծ կամ իր ապրանքին շատ նման ապրանքի արտադրությունն ու վաճառքը,
  • կկարողանա դատական կարգով արգելել այդպիսի ապրանքի իրացումը, պահանջել և ստանալ կրած վնասի դրամական փոխհատուցում։
  • Ապրանքային նշան կարող են գրանցել ինչպես անհատ ձեռնարկատերերը, այնպես էլ իրավաբանական անձինք:
  • Այլ երկրների քաղաքացիները ՀՀ միջազգային պայմանագրերին համապատասխան կամ փոխադարձության սկզբունքով և ՀՀ քաղաքացիներին համահավասար իրավունքներով կարող են ձեռք բերել և տնօրինել ապրանքային նշանը։
Առցանց գրանցել ապրանքային նշան
Սկսել
Այս էջը օգտակա՞ր էր