Բաժնետիրական ընկերություն գրանցելու համար անհրաժեշտ է իրավաբանական անձանց պետական ռեգիստրի գործակալության տարածքային գրասենյակներ ներկայացնել անհրաժեշտ փաստաթղթերը, որոնք թվարկված են ստորև։

ՀՀ քաղաքացիները պետք է ներկայացնեն՝ 

• անձնագիր կամ նույնականացման քարտ,
• իրավաբանական անձ հիմնադրելու մասին Հիմնադրի որոշումը,
• եթե հիմնադիրները մեկից ավելի են, Հիմնադիրների ժողովի արձանագրությունը` ստորագրված բոլոր հիմնադիրների կամ ժողովի նախագահի և քարտուղարի կողմից,
• բաժնետիրական ընկերության կանոնադրությունը` հաստատված հիմնադրի (հիմնադիրների) կամ հիմնադիր ժողովի կողմից,
• տեղեկություններ ընկերության գործադիր մարմնի ղեկավարի կամ նրա ժամանակավոր պաշտոնակատարի մասին (անձնագրային տվյալներ, հանրային ծառայությունների համարանիշ կամ նշում անձի՝ սոցիալական քարտից հրաժարվելու մասին, համապատասխան տեղեկանքի համարը, էլ․ փոստի հասցեն):

Եթե հիմնադիրների կազմում առկա է ՀՀ-ում գրանցված իրավաբանական անձ, ապա անհրաժեշտ է ներկայացնել դրա կառավարման լիազորված մարմնի որոշումը, իրավաբանական անձի անվանումը և պետական գրանցման համարը։

Այլ երկրների քաղաքացիները պետք է ներկայացնեն՝ 

• բոլոր հիմնադիրների անձնագրերը և դրանց պատճենները՝ թարգմանված և նոտարի կողմից վավերացված։

Այլ երկրներում գրանցված իրավաբանական անձինք պետք է ներկայացնեն՝ 

• տվյալ երկրի առևտրային գրանցամատյանից քաղվածք այն մասին, որ իրավաբանական անձը գրանցված է այդ երկրում, կամ իրավաբանական անձի իրավական կարգավիճակը հաստատող փաստաթուղթ, նրա հիմնադիր փաստաթղթերը (կամ համապատասխան քաղվածքները)` վավերացված և հայերեն թարգմանված։

Ըստ բաժնետիրական ընկերության նախընտրելի տեսակի՝ բաց կամ փակ, պետք է կիրառել ԲԲԸ-ի կամ ՓԲԸ-ի նմուշային փաստաթղթերը։

Գրանցման քաղվածքը կամ մերժումը ուղարկվում է տրամադրված էլ․ փոստի հասցեին։ Քաղվածքում նշվում են ընկերության պետական հաշվառման համարը և հարկ վճարողի հաշվառման համարը (ՀՎՀՀ), որը նրա նույնականացման կոդն է։

Ուշադրություն
Բաժնետիրական ընկերությունների ռեեստրը պետական գրանցումից հետո պարտադիր պետք է հանձնվի վարելու ՀՀ կենտրոնական դեպոզիտարիային, ուստի անհրաժեշտ է գրանցման վկայականը ներկայացնել դեպոզիտարիայի հաշվի օպերատորներին (ՀՀ կենտրոնական դեպոզիտարիայի հաշվի օպերատորների ցանկը ներկայացված է պաշտոնական կայքում)։