Թղթային QR տոմս ֆիզիկապես հնարավոր է գնել TelCell տերմինալների միջոցով կամ Երևանի մետրոպոլիտենի կայարանների դրամարկղերից։ 

TelCell տերմինալի միջոցով տոմս գնելու համար անհրաժեշտ է՝

• տերմինալի գլխավոր էջում ընտրել «Ուղետոմս» բաժինը,
• ընտրել ծառայության տեսակը՝ «Տրոլեյբուս», «Օդանավակայան», «Ավտոբուս կամ մետրո», իսկ տրանսպորտային քարտը լիցքավորելու համար՝ «Լիցքավորել տրանսպորտային քարտը»,
• մուտքագրել հեռախոսահամարը (լրացնելը պարտադիր չէ, սակայն այն նշելու դեպքում գործարքի առավելագույն սահմանաչափը գերազանցող մուտքագրված գումարը կփոխանցվի նշված հեռախոսահամարի հաշվին),
• նշել ուղետոմսերի քանակը (առավելագույնը՝ 10 ուղետոմս),
• մուտքագրել կանխիկ գումարը, սեղմել «Վճարել» կոճակը և վերցնել ուղետոմսը։

Թղթի վրա պատկերված QR կոդն անհրաժեշտ կլինի մոտեցնել երթուղային տրանսպորտում տեղադրված սարքին։

TelCell տերմինալի միջոցով թղթային QR տոմս գնելու դեպքում ուղետոմսը հնարավոր կլինի տեսնել նաև տվյալ հեռախոսահամարով գրանցված TelCell Wallet դրամապանակում։

Վճարման չափը և կարգը

2025 թվականի հունվար ամսին երթուղային տրանսպորտի մեկ տոմսի արժեքը 100 դրամ է, իսկ 10 տոմս ներառող փաթեթի արժեքը՝ 1,000 դրամ։ Տերմինալով գնելիս վճարումը կատարվում է ուղետոմս գնելու վերջին էջում, իսկ մետրոպոլիտենի դրամարկղերից գնելիս՝ տեղում։