Ժամանակավոր կացության կարգավիճակը տրվում է յուրաքանչյուր օտարերկրացու, եթե նա հիմնավորում է, որ գոյություն ունեն ՀՀ տարածքում մեկ տարի և ավել ժամկետով իր բնակվելը հիմնավորող հանգամանքներ։ 

ՀՀ-ում անձի մեկ տարի և ավել ժամկետով բնակվելը հիմնավորող հանգամանքներ կարող են լինել՝

• ուսումը,

• աշխատանքի թույլտվության առկայությունը,

• ՀՀ-ում ժամանակավոր կացության կարգավիճակ ունեցող օտարերկրացու ամուսինը, ծնողը կամ զավակը լինելը, 

• ՀՀ քաղաքացու կամ ՀՀ-ում մշտական կամ հատուկ կացության կարգավիճակ ունեցող օտարերկրացու ամուսինը կամ մերձավոր ազգականը (ծնող, զավակ, եղբայր, քույր, տատ, պապ, թոռ) լինելը,

• ձեռնարկատիրությամբ զբաղվելը,

• ազգությամբ հայ լինելը։

Ժամանակավոր կացության կարգավիճակը տրվում է մինչև 1 տարի ժամկետով, և այն յուրաքանչյուր անգամ հնարավոր է երկարաձգել ևս 1 տարով։ 

ՀՀ-ում ժամանակավոր կացության կարգավիճակ ստանալու համար անհրաժեշտ է դիմել ՀՀ Միգրացիայի և քաղաքացիության ծառայության Օտարերկրացիների իրավական կարգավիճակի որոշման վարչություն՝ նախապես ամրագրելով այց։

Հասցե՝ Թաիրովի 14, Երևան

Աշխատանքային օրեր՝ Երկ, Երք, Չրք, Հնգ 09։00-17։00, Ուրբ՝ 10։00-17։00 

Ժամանակավոր կացության կարգավիճակ ստանալու համար անհրաժեշտ է Միգրացիայի և քաղաքացիության ծառայության Օտարերկրացիների վարչություն ներկայացնել հետևյալ փաստաթղթերը՝

• դիմում-հարցաթերթիկ (լրացվում է տեղում),

• 35 x 45 մմ չափսի երեք գունավոր լուսանկար,

• անձնագիրը, անձնագրի պատճենը և անձնագրի՝ նոտարական կարգով վավերացված հայերեն թարգմանությունը,

• ՀՀ-ում կացության կարգավիճակ ստանալու (կացության կարգավիճակը երկարաձգելու) հանգամանքը հիմնավորող փաստաթղթեր, 

• առողջական վիճակի մասին տեղեկանք,

• պետական տուրքի վճարման անդորրագիրը: Ժամանակավոր կացության կարգավիճակ ստանալու համար պետական տուրքը կարելի է վճարել տեղում՝ POS տերմինալի կամ առցանց՝ Պետական վճարումների էլեկտրոնային համակարգի միջոցով, ինչպես նաև ցանկացած բանկում՝ հաշվեհամարին փոխանցում կատարելով (գանձապետական հաշվեհամար՝ 900005162111)։

Ուշադրություն
Լիզորված անձի անունից և անչափահասի համար դիմելու դեպքերում կարող են պահանջվել հավելյալ փաստաթղթեր։

Ժամանակավոր կացության կարգավիճակը հաստատող փաստաթուղթը ժամանակավոր կացության քարտն է, որը տրվում է անձին, եթե բավարարվում է ժամանակավոր կացության կարգավիճակ ստանալու նրա դիմումը։ 

Ժամանակավոր կացության կարգավիճակ տրամադրելու կամ մերժելու որոշում կայացնելու գործընթացը կատարվում է դիմումը ներկայացնելու օրվանից 30-օրյա ժամկետում։ Այս ժամկետը կարող է երկարաձգվել ևս 30 օր։

Ժամանակավոր կացության քարտի վավերականության ժամկետը երկարաձգելու դիմումը պետք է ներկայացնել անձնագրային բաժանմունք (տարածված է նաև ОВИР անվանումը) քարտի ժամկետը լրանալուց առնվազն 30 օր առաջ։

• Մինչև 1 տարի ժամանակավոր կացության քարտի տրամադրման պետական տուրքը 105,000 դրամ է։
• Մինչև 1 տարի ժամանակավոր կացության քարտի երկարաձգման պետական տուրքը նույնպես 105,000 դրամ է։
• Փոխադարձության սկզբունքի համաձայն՝ ԱՄՆ քաղաքացիների համար մինչև 1 տարի ժամանակավոր կացության քարտի տրամադրման պետական տուրքը 85,000 դրամ է։
• ԱՄՆ քաղաքացիների համար 5 տարվա ընթացքում կացության քարտը կրկին տալու կամ երկարաձգելու համար պետական տուրքը 1,000 դրամ է։

Ժամանակավոր կացության կարգավիճակի համար սահմանված պետական տուրքը հնարավոր է վճարել բանկերում կամ տեղում՝ վճարային տերմինալի կամ առցանց՝ Պետական վճարումների էլեկտրոնային համակարգի միջոցով։

Ուշադրություն
2026 թվականի նոյեմբերի 1-ից ժամանակավոր կացության կարգավիճակ ստանալու համար պետական տուրքը կլինի 150,000 դրամ։

Ժամանակավոր կացության կարգավիճակը անվճար տրամադրվում է հետևյալ անձանց․

• անչափահասներին (մինչև 18 տարեկան անձանց),
• ՀՀ քաղաքացու մերձավոր ազգականներին (ամուսին, երեխա, հայր, մայր, քույր, եղբայր),
• Հայաստանի ուսումնական հաստատություններում սովորող օտարերկրացի ուսանողներին, դասավանդող մանկավարժներին և դասախոսներին,
• ՀՀ-ին մարդասիրական կամ տեխնիկական օգնություն տրամադրելու նպատակով ՀՀ ժամանող անձանց,
• ՀՀ Նախագահի, Ազգային ժողովի և Կառավարության կողմից աշխատանքի հրավիրված օտարերկրյա մասնագետների և նրանց ընտանիքի անդամներին,
• դիվանագիտական անձնագրերով ՀՀ մուտք գործող անձանց, ինչպես նաև ՀՀ-ում օտարերկրյա պետությունների դիվանագիտական ներկայացուցչությունների և հյուպատոսական հիմնարկների աշխատակիցներին ու նրանց ընտանիքի անդամներին,
• ՀՀ Նախագահի, Ազգային ժողովի նախագահի, սահմանադրական դատարանի նախագահի, վարչապետի կամ արտաքին գործերի նախարարի, մարդու իրավունքների պաշտպանի հրավերով Հայաստանի Հանրապետություն այցելող պաշտոնական անձանց և պատվիրակությունների անդամներին,
• ազգությամբ հայ այն օտարերկրյա քաղաքացիներին, որոնց մշտական բնակության օտարերկրյա պետությունում ստեղծվել է քաղաքացիների կյանքին կամ առողջությանը սպառնացող  արտակարգ իրավիճակ,
• փախստականի կարգավիճակ ստացած անձի` ՀՀ ժամանող մերձավոր ազգականներին։