Ստորև ներկայացված քայլերն անհրաժեշտ է կատարել «Շարունակել» կոճակը սեղմելուց հետո.

Բնակարանի սեփականության իրավունքի պետական գրանցման համար անհրաժեշտ է․

• այցելել e-cadastre.am,
• նույնականացվելուց հետո մուտք գործել, ստուգել անձնական տվյալները, տրամադրել էլեկտրոնային փոստի հասցե, որից հետո էջի ձախ հատվածում ընտրել «Պետական գրանցում» բաժինը, ապա սեղմել «Իրավունքի պետական գրանցում» կոճակը,
• բացված էջում ընտրել գործարքի տեսակը,
• նշել անշարժ գույքի հասցեն (որոնումը հնարավոր է կատարել նաև անշարժ գույքի վկայականի համարով կամ կադաստրային ծածկագրով՝ լրացնելով համապատասխան դաշտերը (կադաստրային ծածկագիրը տվյալ անշարժ գույքին տրվող եզակի համար է)), այնուհետև սեղմել «Հաջորդը» կոճակը,
• նշել դիմումի կատարման ժամկետը, կցել անհրաժեշտ փաստաթղթերը, կատարել վճարումը և հանձնել դիմումը։ 

Ներկայացվող պահանջները

Հիպոթեքային վարկով ձեռք բերված բնակարանի դեպքում իրավունքի պետական գրանցումը տեղի է ունենում միայն շենքի ավարտական ակտի հանձնումից հետո։

Պահանջվող փաստաթղթերը

Բնակարանի սեփականության իրավունքի գրանցման համար անհրաժեշտ է ներկայացնել․

• անձնագիր կամ նույնականացման քարտ (լիազորված անձանց դեպքում՝ նաև լիազորագրեր),
• բնակարանի վաճառքի պայմանագիրը,
• բնակարանի արժեքի վճարման անդորրագիրը,
• անշարժ գույքի գնման իրավունքի վկայականը,
• սեփականության իրավունքի պետական գրանցման համար կատարված վճարման անդորրագիրը։

Տրամադրման կարգը և ժամկետը

Անշարժ գույքի նկատմամբ իրավունքների պետական գրանցումը կատարվում է պետական գրանցման դիմումը ներկայացնելուց հետո 4 աշխատանքային օրվա ընթացքում։

Վճարման չափը և կարգը

Բնակարանաի սեփականության իրավունքի գրանցման համար գանձվում է պետական գրանցման ծառայության վճար՝ 25,000 դրամ, պետական տուրքի վճար՝ 1,000 դրամ։ Իրավունքի վկայականը տրամադրվում է 4 աշխատանքային օրվա ընթացքում։

Դիմողի ցանկությամբ անշարժ գույքի նկատմամբ իրավունքների ծագման, փոփոխման, փոխանցման պետական գրանցումը կարող է կատարվել նաև արագացված կարգով․

• 50,000 դրամ՝ 3 աշխատանքային օրում,
• 75,000 դրամ՝ 2 աշխատանքային օրում,
• 150,000 դրամ՝ 2 ժամում։

Առցանց ներկայացված դիմումի և կից փաստաթղթերի իսկությունը հաստատվում է ներկայացնող անձի  էլեկտրոնային ստորագրությամբ։

Դիմումի հետ ներկայացված փաստաթղթերի իսկության համար պատասխանատվությունը կրում են փաստաթղթերը ներկայացրած անձինք:

Իրավունքի պետական գրանցումից հետո տրամադրվում է անշարժ գույքի նկատմամբ իրավունքի պետական գրանցման վկայական, որն ուղարկվում է գնորդի նշած էլեկտրոնային փոստի հասցեին։

Վկայականի իսկությունը և վավերականությունը հնարավոր է ստուգել Կադաստրի կոմիտեի կայքի միջոցով՝ «Փաստաթղթերի դիտում» դաշտում լրացնելով վկայականի համարը և գաղտնաբառը:

Հղում օրենսդրությանը

• «Գույքի նկատմամբ իրավունքների պետական գրանցման մասին» ՀՀ օրենք
• «Պետական տուրքի մասին» ՀՀ օրենք

Օրենսդրական ակտերը հնարավոր է գտնել arlis.am-ում։