Բնակարանի նկատմամբ սեփականության իրավունքի պետական գրանցման համար գնորդը և վաճառողը պետք է ֆիզիկապես դիմում ներկայացնեն Կադաստրի կոմիտեի ցանկացած սպասարկման գրասենյակում (անկախ գույքի գտնվելու վայրից)։

Ներկայացվող պահանջները

Հիպոթեքային վարկով ձեռք բերված բնակարանի դեպքում իրավունքի պետական գրանցումը տեղի է ունենում միայն շենքի ավարտական ակտի հանձնումից հետո։

Անհրաժեշտ փաստաթղթերը

Բնակարանի սեփականության իրավունքի պետական գրանցման համար անհրաժեշտ է ներկայացնել․

• անձնագիր կամ նույնականացման քարտ (լիազորված անձի դեպքում՝ նաև լիազորագիր),
• բնակարանի վաճառքի պայմանագիրը,
• բնակարանի արժեքի վճարման անդորրագիրը,
• անշարժ գույքի գնման իրավունքի վկայականը,
• սեփականության իրավունքի պետական գրանցման համար կատարված վճարման անդորրագիրը։
  
  

Տրամադրման կարգը և ժամկետը

Անշարժ գույքի նկատմամբ իրավունքների պետական գրանցումը կատարվում է պետական գրանցման դիմումը ներկայացնելուց հետո 4 աշխատանքային օրվա ընթացքում։

Ներկայացված դիմումը և կից փաստաթղթերը մուտքագրվում են դիմողի ներկայությամբ և գրանցվում են դիմումների հաշվառման մատյանում, որից հետո դիմողին տրամադրվում է ստացական՝ նշելով դիմումի մուտքագրման օրը, ժամը, րոպեն, մուտքի համարը, դիմողի տվյալները, դիմումով ներկայացվող պահանջը և դիմումին կից ներկայացված փաստաթղթերի ցանկը:

Դիմողին տրամադրվում է նաև դիմումի մուտքագրման «բանալի» և գաղտնաբառ, որոնցով նա հնարավորություն ունի Կադաստրի պետական կոմիտեի պաշտոնական կայքէջում հետևելու դիմումի ընթացքին:

Վճարման չափը և կարգը

Բնակարանի սեփականության իրավունքի գրանցման համար գանձվում է պետական գրանցման ծառայության վճար՝ 25,000 դրամ, պետական տուրքի վճար՝ 1,000 դրամ։ Իրավունքի վկայականը տրամադրվում է 4 աշխատանքային օրվա ընթացքում։

Դիմողի ցանկությամբ անշարժ գույքի նկատմամբ իրավունքների ծագման, փոփոխման, փոխանցման պետական գրանցումը կարող է կատարվել նաև արագացված կարգով․

• 50,000 դրամ՝ 3 աշխատանքային օրում,
• 75,000 դրամ՝ 2 աշխատանքային օրում,
• 150,000 դրամ՝ 2 ժամում։

Հղում օրենսդրությանը

• «Գույքի նկատմամբ իրավունքների պետական գրանցման մասին» ՀՀ օրենք
• «Պետական տուրքի մասին» ՀՀ օրենք

Օրենսդրական ակտերը հնարավոր է գտնել arlis.am-ում։