Իրավաբանական անձինք մեկ այցի ընթացքում կարող են հաշվառվել առավելագույնը 3 ավտոմեքենա։

«Ամրագրել այց» կոճակը սեղմելուց հետո անհրաժեշտ է․

• «Հաշվառման քննական ծառայություններ» պատուհանում սեղմել «Մուտք» կոճակը և լրացնել հանրային ծառայությունների համարանիշը (նույնականացման քարտի հակառակ կողմի 10 նիշանոց թիվը կամ սոցիալական քարտի համարը) և հեռախոսահամարը,

• նշել ծառայության տարբերակը՝ «Ֆիզիկական անձանց տրանսպորտային միջոցների գրանցում, հաշվառում (վերահաշվառում)»,

• նշել նախընտրելի հաշվառման-քննական բաժինը (ՀՔԲ), անկախ նրանից, թե դիմողը ՀՀ-ում որտեղ է հաշվառված,

• ընտրել հաշվառման օրն ու ժամը,

• մուտքագրել էլեկտրոնային փոստի հասցեն,

• սեղմել «Ամրագրել կտրոն» կոճակը։

Այցի ամրագրումից հետո էլեկտրոնային փոստի հասցեին կուղարկվի կոդ, որի միջոցով հնարավոր կլինի տեղում ակտիվացնել հերթագրումը։

Ուշադրություն
Գործարքի կողմ հանդիսացող առաջին և երկրորդ կարգի հաշմանդամություն ունեցող անձինք ՀՔԲ-ներում սպասարկվում են արտահերթ՝ կարգավիճակը հավաստող փաստաթղթի առկայության դեպքում։

Ներկայացվող պահանջները

Ավտոմեքենայի հաշվառման համար պարտադիր է գրանցված լինել ՀՀ-ի որևէ հասցեում։

Պահանջվող փաստաթղթերը

Ավտոմեքենան հաշվառելիս անհրաժեշտ է ներկայացնել՝

• անձը հաստատող փաստաթուղթ,

• ավտոմեքենայի ձեռքբերման օրինականությունը հավաստող փաստաթուղթ, եթե դրա սեփականության իրավունքը Ճանապարհային ոստիկանությունում գրանցված չէ։

Միաժամանակ ավտոմեքենայի սեփականությունը գրանցելու դեպքում անհրաժեշտ է ներկայացնել նաև՝

• առկայության դեպքում՝ տարանցիկ կամ այլ հաշվառման համարանիշեր,

• օրենքով սահմանված տուրքերի և վճարների անդորրագրերը,

• տեղեկանք գույքահարկի պարտավորությունների ամբողջական կատարման մասին։

Վճարման չափը և կարգը

Ավտոմեքենայի հաշվառման համար տեղում գործող բանկերում կամ նախապես անհրաժեշտ է վճարել 23,000 դրամ, որը ներառում է՝

• 5,000 դրամ՝ հաշվառման համար (վճարման հաշվեհամար՝ 900013150033),
• 6,000 դրամ՝ հաշվառման վկայագրի (տեխնիկական անձնագիր) համար (վճարման հաշվեհամար՝ 900005016135),
• 12,000 դրամ՝ համարանիշերի համար (վճարման հաշվեհամար՝ 900005016127)։

Եթե բանկային հավելվածում չի ստացվում փոխանցում կատարել նշված հաշվեհամարներին, ապա անհրաժեշտ է ընտրել «Փոխանցում պետական բյուջե» տարբերակը։

Վճարումներն առցանց կատարելու դեպքում վճարման անդորրագրերը մյուս փաստաթղթերի հետ անհրաժեշտ է ներկայացնել սպասարկման սրահի աշխատակցին։