• Տան վաճառքի նախապատրաստական փուլում անհրաժեշտ է համոզվել, որ հարկային պարտավորություններ չունես անշարժ գույքի նկատմամբ։
• Եթե գույքը ունի միաժամանակ մի քանի սեփականատերեր կամ ձեռք է բերվել ամուսնության ընթացքում, ապա պետք է ստանալ նաև գույքը վաճառելու համաձայնությունը մինչև գործարքը։
• Ստուգիր նաև՝ արդյոք վաճառվող գույքը գործարքի սահմանափակումներ չունի և արգելադրված չէ՝ ստանալով միասնական տեղեկանք։

Գինը որոշելու համար կարող ես վերլուծել վաճառվող տան տարածքում գտնվող նմանատիպ տների շուկայական արժեքը՝ հաշվի առնելով մակերեսը, հարկը և վիճակը։

Առավել ճշգրիտ արդյունքի համար խորհուրդ է տրվում դիմել պրոֆեսիոնալ գնահատողի, որը կհաշվի բնակարանի բոլոր առանձնահատկությունները և կհաստատի իրական շուկայական արժեքը։

Դիմիր Կադաստրի կոմիտե, եթե վաճառքի գործարքը պարզ է, այսինքն՝ 

• գույքի բոլոր սեփականատերերը կարող են ներկա լինել գործարքի ընթացքում,

• գործարքը կատարվում է առանց որևէ լիազորագրի,

• գույքը սեփականատերերի միջև բաժնեմասերի բաժանված չէ,

• գործարքը կատարվում է գումարն ամբողջությամբ վճարելու տարբերակով։
  

Տունը գնելուց առաջ Կադաստրի կոմիտեի կայքում ծանոթացիր Անշարժ գույքի վաճառքի պայմանագրի նմուշին։

Տան վաճառքի պայմանագիրը Կադաստրի կոմիտեում կնքելն անվճար է։ 

Կողմերի ցանկությամբ տան վաճառքը կարելի է կատարել նաև նոտարի միջոցով։

Նոտարին է պետք դիմել նաև այն դեպքում, երբ կան որոշակի խնդիրներ, օրինակ՝ գույքի ոչ բոլոր սեփականատերերն են ներկա, գումարը վճարվելու է մասամբ, կողմերից մեկը անչափահաս է և այլն։

Նոտարական գրասենյակ պետք է ներկայացնել․

• կողմերի անձը հաստատող փաստաթղթեր (այլ երկրների քաղաքացիների դեպքում՝ անձնագրերի նոտարական վավերացմամբ հայերեն թարգմանությունները),
• օտարվող գույքի ձեռքբերման պահին ամուսնացած լինելու դեպքում` ամուսնության վկայական,
• անշարժ գույքի նկատմամբ իրավունքների պետական գրանցման վկայական (բնակարանի սեփականության վկայական),
• միասնական տեղեկանք,
• ներկայացուցչի դեպքում` ներկայացուցչի լիազորությունները հաստատող փաստաթուղթ,
• այլ փաստաթղթեր՝ նոտարի պահանջով։

Միասնական տեղեկանքը Կադաստրի կոմիտեի կողմից տրվող փաստաթուղթ է, որում նշվում են գույքի բոլոր սեփականատերերի անձնական տվյալները, մակերեսը և տեղեկատվություն գույքի նկատմամբ սահմանափակումների վերաբերյալ (օրինակ՝ գույքը կարող է գրավ դրված լինել)։

Տունը վաճառել հնարավոր է միայն առանց այդպիսի սահմանափակումների։

• Տեղեկանքը ստանալու համար անհրաժեշտ է առցանց հայտ ներկայացնել Կադաստրի կոմիտե։
• Այն տրամադրվում է դիմումը ներկայացնելուց հետո առավելագույնը 3 աշխատանքային օրվա ընթացքում, անհրաժեշտ է վճարել 10,000 դրամ։
• Տեղեկանքը հնարավոր է նաև ավելի շուտ ստանալ․ այն 2 օրվա ընթացքում ստանալու համար անհրաժեշտ է վճարել 20,000 դրամ, իսկ 2 ժամվա ընթացքում ստանալու համար՝ 60,000 դրամ։