Բնակարանի (անշարժ գույքի) առքուվաճառքի պայմանագիրը նոտարական վավերացմամբ կնքելու համար պետք է այցելել նախընտրելի նոտարական գրասենյակ։

Ներկայացվող պահանջները

Բնակարանի (անշարժ գույքի) առքուվաճառքի պայմանագիրը նոտարական վավերացմամբ կնքելուց հետո անհրաժեշտ է 30-օրվա ընթացքում ներկայացնել Կադաստրի կոմիտե պետական գրանցման։

Պահանջվող փաստաթղթերը

Գնորդը և վաճառողը ներկայացնում են՝ 

• կողմերի անձը հաստատող փաստաթղթեր (այլ երկրների քաղաքացիների դեպքում՝ անձնագրերի նոտարական վավերացմամբ հայերեն թարգմանությունները),
• ամուսնության վկայական՝ վաճառվող գույքի ձեռքբերման պահին ամուսնացած լինելու դեպքում (եթե գույքը ձեռք է բերվել հատուցմամբ),
• անշարժ գույքի նկատմամբ իրավունքների պետական գրանցման վկայական (սեփականության վկայական),
• միասնական տեղեկանք,
• ներկայացուցչի լիազորությունները հաստատող փաստաթուղթ (եթե գործարքը կատարվում է ներկայացուցչի միջոցով):
  
  

Անհրաժեշտության դեպքում նոտարը կարող է պահանջել նաև այլ փաստաթղթեր։

Պայմանագրի կնքման կարգը

Պայմանագրում գրանցվում են՝ 

• պայմանագրի կնքման վայրը, ամսաթիվը,
• գնորդի և վաճառողի անձնական տվյալները,
• բնակարանի մասին տվյալներ,
• տվյաներ այն մասին, որ գույքը վաճառված կամ դատական վեճի առարկա չէ, գույքը վաճառելու սահմանափակում չկա,
• անշարժ գույքի գինը,  վճարման ժամկետը (եթե վճարումը դեռ կատարված չէ, վճարման ակնկալվող օրը կամ ժամկետը),
• նշում անշարժ գույքը գնորդին հանձնելու օրվա վերաբերալ,
• նշում գույքային իրավունքների պետական գրանցման ծախսերը կատարող կողմի մասին։  

Վճարման չափը և կարգը

Պայմանագրի կնքման համար անհրաժեշտ է վճարել 5,000 ՀՀ դրամ պետական տուրք։

Վճարումն իրականացվում է հետևյալ եղանակներից մեկով՝

• E-payments համակարգի միջոցով,

• բանկային փոխանցման միջոցով ՀՀ պետական բյուջեի հաշվեհամարին՝ 900015211015։ Փոխանցման նպատակի դաշտում պետք է նշել «Այլ անշարժ գույքի յուրաքանչյուր միավորի օտարման (բացառությամբ` նվիրատվության) պայմանագրերը վավերացնելու համար» (եթե բանկային հավելվածում չի ստացվում փոխանցում կատարել այս հաշվեհամարին, ապա խնդրում ենք ընտրել «Փոխանցում պետական բյուջե» տարբերակը)։
  
  

Անհրաժեշտ է վճարել նաև նոտարական ծառայության համար, որի գինը կարող է տատանվել 10,000 - 15,000 ՀՀ դրամի միջակայքում։

Պայմանագիրը ստորագրվում է գնորդի, վաճառողի առկայության դեպքում՝ նաև մյուս սեփականատերերի կողմից և վավերացվում է նոտարի կնիքով։ 

Հղում օրենսդրությանը

«Նոտարիատի մասին» ՀՀ օրենք

«Պետական տուրքի մասին» ՀՀ օրենք

Իրավական ակտերը հնարավոր է գտնել arlis.am-ում։