Աջակցության այս ծրագրի շրջանակում զինծառայող են հետևյալ կառույցների աշխատակիցները․

• ՀՀ պաշտպանության նախարարության զինվորական կամ քրեակատարողական կամ քաղաքացիական հատուկ ծառայության մեջ գտնվող անձինք, քաղաքացիական ծառայության պաշտոններ զբաղեցնող կամ քաղաքացիական ծառայության կադրերի ռեզերվում գրանցված անձինք, հայեցողական պաշտոն (նշանակովի պաշտոն) զբաղեցնող անձինք.
• Ազգային անվտանգության ծառայությունում զինվորական կամ քրեակատարողական կամ քաղաքացիական հատուկ ծառայության մեջ գտնվող անձինք,
• Պետական պահպանության ծառայությունում զինվորական կամ քրեակատարողական կամ քաղաքացիական հատուկ ծառայության մեջ գտնվող անձինք,
• Ոստիկանությունում զինվորական կամ քրեակատարողական կամ քաղաքացիական հատուկ ծառայության մեջ գտնվող անձինք, քաղաքացիական ծառայության պաշտոններ զբաղեցնող կամ քաղաքացիական ծառայության կադրերի ռեզերվում գրանցված անձինք,
• Քրեակատարողական ծառայությունում զինվորական կամ քրեակատարողական կամ քաղաքացիական հատուկ ծառայության մեջ գտնվող անձինք, քաղաքացիական ծառայության պաշտոններ զբաղեցնող կամ քաղաքացիական ծառայության կադրերի ռեզերվում գրանցված անձինք,
• ՀՀ պաշտպանության մարտական գործողությունների մասնակցի կամ երկրապահ կամավորականի կարգավիճակ ունեցող անձինք,
• պահեստազորայինները:

Աջակցության կարող են դիմել․

• ծառայողական պարտականությունները կատարելու ժամանակ կամ զինվորական ծառայության ընթացքում զոհված զինծառայողի ընտանիքի անդամները,
• հաշմանդամության զինվորական կենսաթոշակի իրավունք ունեցող նախկին զինծառայողները։

Այս ծրագրի շրջանակներում զինծառայողի ընտանիքի անդամ են համարվում․

• ամուսինը/կինը,
• զավակները,
• ծնողները:

Ֆինանսական աջակցություն ստանալու համար դիմումին կից պահանջվող փաստաթղթերը պետք է ներկայացնել համապատասխան գերատեսչության սոցիալական ապահովության խնդիրներ իրականացնող ստորաբաժանում, որը դիմումների ուսումնասիրությունից հետո շահառուների անվանացանկը և վճարվող աջակցության չափը ներկայացնում է ՀՀ աշխատանքի և սոցիալական հարցերի նախարարություն։

Դիմումին կից անհրաժեշտ է ներկայացնել հետևյալ փաստաթղթերը՝

• զինծառայողին հաշմանդամություն ունեցող անձ ճանաչելու մասին որոշումը կամ անձի ֆունկցիոնալության գնահատման որոշումը ու ստացած վնասվածքի կամ խեղման կամ ձեռք բերած հիվանդության պատճառական կապի մասին փորձաքննական ակտը,
• համապատասխան մարմնում ծառայությունից արձակվելուց հետո զոհված զինծառայողի՝ զինվորական ծառայության հետ մահվան պատճառական կապի մասին տեղեկանքը,
• շահառու հանդիսացող անձանց անձնագրերը կամ նույնականացման քարտը, հանրային ծառայությունների համարանիշը կամ հանրային ծառայությունների համարանիշ չստանալու մասին տեղեկանք, ինչպես նաև՝ բնակության հաշվառման վայրի վերաբերյալ տեղեկանք, ամուսնության և ծննդյան վկայականները կամ դատական ակտերը (առկայության դեպքում),
• շահառու հանդիսացող անձանց համաձայնությունը` դրամական օժանդակությունը շահառուներից մեկի անունով բացված բանկային հաշվին փոխանցելու կամ շահառուների ցանկությունը` դրամական օժանդակությունը շահառուների միջև բաժանելու և նրանցից յուրաքանչյուրին առանձին վճարելու վերաբերյալ:

Ուշադրություն

Ֆինանսական աջակցությունը հավասարաչափ բաժանվում է շահառուների միջև, եթե․

• շահառուները չեն համաձայնում դրամական օգնությունը իրենցից մեկի անունով բացված բանկային հաշվին փոխանցելուն,
• կամ չեն ցանկանում ֆինանսական աջակցությունը շահառուների միջև բաժանելուն և նրանցից յուրաքանչյուրին առանձին վճարելուն։

Զինծառայողը կամ նրա ընտանիքի անդամը կզրկվի աջակցություն ստանալու հնարավորությունից, եթե զինծառայողի մահը կամ հաշմանդամությունը հետևանք է այնպիսի արարքի, որը նա գիտակցաբար կատարել է՝ խախտելով օրենքը:

Զոհված զինծառայողի ընտանիքի անդամին ֆինանսական աջակցությունը տրամադրվում է հետևյալ չափով․

• 2,000,000 դրամ, եթե զինծառայողը զոհվել է ծառայողական պարտականությունները կատարելու ժամանակ,
• 1,000,000 դրամ, եթե զինծառայողը զոհվել է զինվորական ծառայության ընթացքում,

Հաշմանդամության կեսնաթոշակի իրավունք ունեցող նախկին զինծառայողին աջակցությունը տրամադրվում է հետևյալ չափով․

• 500,000 դրամ՝ առաջին խմբի հաշմանդամություն ունեցող նախկին զինծառայողին,
• 400,000 դրամ՝ երկրորդ խմբի հաշմանդամություն ունեցող նախկին զինծառայողին,
• 300,000 դրամ՝ երրորդ խմբի հաշմանդամություն ունեցող նախկին զինծառայողին։

Ֆինանսական աջակցությունը տրամադրվում է դիմումին կից փաստաթղթերը ներկայացնելուց հետո մեկ ամսվա ընթացքում։

• Ֆինանսական աջակցություն ստանալու համար զոհված զինծառայողի ընտանիքի անդամը դիմումին կից պահանջվող փաստաթղթերը պետք է ներկայացնի այն գերատեսչություն, որի զինծառայողն է եղել զոհված ընտանիքի անդամը։ Դիմումների ուսումնասիրությունից հետո շահառուների անվանացանկը և վճարվող աջակցության չափը ներկայացնում է ՀՀ աշխատանքի և սոցիալական հարցերի նախարարություն՝ աջակցությունը տրամադրելու համար։
• Ընդ որում՝ զինծառայողի հուղարկավորության ծախսերի փոխհատուցման համար դիմումը բացի անձամբ ներկայացնելուց՝ հնարավոր է ներկայացնել նաև ՀՀ քաղաքացիական կացության ակտերի գրանցման մարմնի (ՔԳԱԿ) կամ միասնական սոցիալական ծառայության (ՄՍԾ) տարածքային ստորաբաժանումների միջոցով։
• Քաղաքացիական կացության ակտերի գրանցման (ՔԳԱԿ) մարմնի միջոցով ներկայացվող դիմումին կից պահանջվող փաստաթղթեր չեն ներկայացվում, իսկ միասնական սոցիալական ծառայության ստորաբաժանումների (ՄՍԾ) միջոցով դիմումին կցվում է միայն մահվան վկայականը և դիմողի անձը հաստատող փաստաթուղթը։

Զինվորական ծառայության ժամանակ զոհված զինծառայողի հուղարկավորության, գերեզմանների բարեկարգման, տապանաքարերի պատրաստման և տեղադրման հետ կապված ծախսերի փոխհատուցման չափերն են․

• 700,000 դրամ՝ հուղարկավորության ծախսերի հատուցման համար,
• 1,400,000 դրամ՝ գերեզմանի բարեկարգման, տապանաքարերի պատրաստման և տեղադրման ծախսերի հատուցում համար։

Ուշադրություն
«Եռաբլուր» պանթեոնում և այլ եղբայրական գերեզմանոցներում հուղարկավորվածների համար այս հատուցումը չի տրվում։

Ֆինանսական աջակցությունը տրամադրվում է դիմումին կից փաստաթղթերը ներկայացնելուց հետո մեկ ամսվա ընթացքում։

Աջակցության ծրագրի շրջանակում նախկին զինծառայող են այն անձինք, ովքեր զինվորական և այլ պետական ծառայության մեջ են եղել և արձակվել են ծառայությունից հետևյալ հաստատություններից․

• ՀՀ պաշտպանության նախարարության,
• Ազգային անվտանգության ծառայություն,
• Պետական պահպանության ծառայություն,
• Ոստիկանություն,
• Քրեակատարողական ծառայություն։

Աջակցության կարող են դիմել․

• հաշմանդամության զինվորական կենսաթոշակի իրավունք ունեցող նախկին զինծառայողները,
• ծառայության ընթացքում զոհված զինծառայողների ընտանիքի անդամները։

Աջակցության դիմելու համար զինվորական հաշմանդամություն ունեցող նախկին զինծառայողը կամ ծառայության ընթացքում զոհված զինծառայողի ընտանիքի անդամը դիմումին կից պահանջվող փաստաթղթերը ներկայացնում է համապատասխան գերատեսչություն։

Աջակցության դիմելու համար անհրաժեշտ է դիմումին կից ներկայացնել․

• դիմումատուի անձը և նախկին զինծառայողի կամ զոհվածի ընտանիքի անդամի կարգավիճակը հաստատող փաստաթղթերի պատճենները, 
• ընտանիքի կազմի մասին տեղեկանքը,
• ՀՀ-ում գործող բանկում դիմումատուի անվամբ բացված բանկային հաշվեհամարը,
• նախկին զինծառայողի կամ զոհվածի ընտանիքի անդամի ամուսնության դեպքում` ամուսնության վկայականը,
• տարերային աղետի հետևանքով նախկին զինծառայողին կամ զոհվածի ընտանիքի անդամին սեփականության իրավունքով պատկանող գույքին վնաս պատճառվելու դեպքում` գույքի սեփականության իրավունքի վկայականի պատճենը և տարերային աղետի ու դրա հետևանքով պատճառված վնասի վերաբերյալ տեղեկանքը,
• նախկին զինծառայողի և նրա ընտանիքի անդամի կամ զոհվածի ընտանիքի անդամի երկարատև հիվանդության դեպքում` առնվազն 21 օր ընդհանուր տևողությամբ (տվյալ տարվա ընթացքում) հիվանդանոցային պայմաններում բուժում ստացած լինելու մասին տեղեկանքը,
• նախկին զինծառայողի ընտանիքի անդամի կամ զոհվածի ընտանիքի անդամի մահվան դեպքում` մահվան վկայականը:

Ֆինանսական աջակցությունը չի տրամադրվում, եթե նախկին զինծառայողը կամ զոհված զինծառայողի ընտանիքի անդամը տվյալ տարվա ընթացքում ստացել է տվայլ կամ պետական այլ աջակցություն։

Հաշմանդամության զինվորական կենսաթոշակի իրավունք ունեցող նախկին զինծառայողին և ծառայության ընթացքում զոհված զինծառայողին մեկ տարվա ընթացքում տրամադրվում է 100,000 դրամ միանվագ դրամական աջակցություն։

Աջակցությունը տրամադրվում է դիմումին կից անհրաժեշտ փաստաթղթերը ներկայացնելուց հետո 30 աշխատանքային օրվա ընթացքում։ Աջակցությունը փոխանցվում է դիմումատուի անվամբ բանկային հաշվեհամարին։