Ինչպե՞ս դիմել

Աջակցություն ստանալու համար անհրաժեշտ է «Շարունակել» կոճակը սեղմելուց հետո՝

• անցնել «ԵսԵմ» նույնականացում,

• լրացնել պահանջվող տվյալները,

• ներկայացնել առցանց հայտ։

Ներկայացվող պահանջները

Աջակցություն ստանալու համար հողակտորի մակերեսը պետք է կազմի՝

• 0․5 հա և ավելի՝ ոռոգման արդիական համակարգերի դեպքում,

• 0․5 - 3 հա՝ խաղողի, ինտենսիվ պտղատու այգիներում կամ հատապտղանոցներում կարկտապաշտպան ցանցերի ներդրման դեպքում։

Ընդ որում՝ ոռոգման արդիական համակարգերը պետք է նպատակային նշանակությամբ շահագործվեն առնվազն 4 տարի, կարկտապաշտպան ցանցերը՝ առնվազն 5 տարի՝ առանց օտարման իրավունքի։

Պահանջվող փաստաթղթերը

Հայտը ներկայացնելու համար անհրաժեշտ տեղեկությունները կլրացվեն ինքնաշխատ եղանակով։

Տեղազննությունից և պայմանագրի կնքումից հետո կարող են պահանջվել հավելյալ փաստաթղթեր՝

• եթե հողատարածքը համատեղ սեփականություն է կամ օգտագործվում է վարձակալությամբ, ապա անհրաժեշտ կլինի ներկայացնել սեփականատիրոջ կամ համասեփականատիրոջ համաձայնությունը ծրագրին մասնակցելու վերաբերյալ՝ նոտարական վավերացմամբ,

• կատարված ծախսերը հիմնավորող փաստաթղթեր,

• համակարգերի նպատակային շահագործումը հիմնավորող փաստաթղթեր։

Աջակցության չափը

Ոռոգման արդիական համակարգերի ներդրման դեպքում կփոխհատուցվի ծախսերի՝

• 50%-ը,

• 60%-ը՝ գերնորմատիվային ջրապահանջարկ ունեցող հողատարածքներում ներդրման դեպքում,

• 50%-ը՝ շարժական համակարգի ձեռքբերման դեպքում։

 Կարկտապաշտպան ցանցերի ներդրման դեպքում կփոխհատուցվի ծախսերի՝

• 75%-ը՝ ցանկում ներառված բնակավայրերի դեպքում,

• 50%-ը՝ ցանկում չներառված բնակավայրերի դեպքում։

Ծախսերի առավելագույն սահմանաչափերն են՝

• 2․3 մլն դրամ՝ կաթիլային համակարգերի ներդրման 1 հա-ի համար,

• 2․6 մլն դրամ՝ անձրևացման համակարգերի ներդրման 1 հա-ի համար,

• 15 մլն դրամ՝ շարժական 1 համակարգի ներդրման համար,

• 12․1 մլն դրամ՝ կարկտապաշտպան ցանցերի ներդրման 1 հա-ի համար։

Տրամադրման ժամկետը և կարգը

Առցանց հայտը ներկայացնելուց հետո 15 աշխատանքային օրվա ընթացքում կատարվում է տարածքի տեղազննություն։

Տեղազննության դրական եզրակացության դեպքում 5 աշխատանքային օրվա ընթացքում դիմողը ծանուցվում է այդ մասին և 10 աշխատանքային օրվա ընթացքում Էկոնոմիկայի նախարարության հետ կնքում պայմանագիր։

Ծախսերի փոխհատուցումը տրամադրվում է դրանք հիմնավորելու դեպքում։

Հղում օրենսդրությանը

ՀՀ կառավարության՝ 2021 թ․ N 927-Լ որոշում։

Որոշումը հնարավոր է գտնել arlis.am-ում (անհրաժեշտ է կարդալ ակտի վերջին տարբերակը):