Նախատեսված բուժումը ստանալու համար պետք է այցելել ինֆեկցիոն կամ աղեստամոքսաբանության մասնագիտացում ունեցող բժիշկ-մասնագետի՝ հետևյալ բժշկական կազմակերպություններում.

• Ինֆեկցիոն հիվանդությունների ազգային կենտրոն (Երևան Բաբաջանյան փողոց, 21 շենք, թեժ գիծ 8424),
• «Միքայելյան» համալսարանական հիվանդանոց (Երևան, Հասրաթյան 9, հեռախոսահամար՝ 010 282020),
• «Աստղիկ» բժշկական կենտրոն (Դանիել Վարուժանի 28 /1 շենք, հեռախոսահամար՝ +374 11 66 77),
• «Էրեբունի» բժշկական կենտրոն (Երևան, Տիտոգրադյան 14, թեժ գիծ 8119),
• «Նաիրի» բժշկական կենտրոն (Երևան, Պարոնյան 21 շենք),
• «Արմենիա» հանրապետական բժշկական կենտրոն (Երևան, Մարգարյան 6, հեռախոսահամար՝ +374 10 31 81 90),
• «Էլիտ-Մեդ» բժշկական կենտրոն (Երևան, Հակոբ Հակոբյան 3/15, հեռախոսահամար՝ +374 99 99 55 64),
• «Վիոլետա» բժշկական կենտրոն (Երևան, Գուսան Շերամի փողոց, 2-րդ շենք, հեռախոսահամար՝ +374 43 33 08 88)
• «Նիկոմեդ» բժշկական կենտրոն (Երևան, Դավիթ Բեկի 142, տեղեկատու հեռախոսահամար՝ 113)։
  
  

Ծրագրի մասին

Աջակցության այս ծրագրով բժշկական օգնություն ու դեղորայք է տրամադրվում հեպատիտ Ց ախտորոշմամբ պացիենտներին։ 

Ներկայացվող պահանջները

Ծրագրի շրջանակներում բժշկական օգնությունը և սպասարկումը տրամադրվում է.

• 12 տարեկանից բարձր հեպատիտ Ց ախտորոշմամբ պացիենտներին, (որակական ՊՇՌ մեթոդով «Ց» վիրուսի փաստացի պատասխան),
• լյարդի ֆիբրոզ  0 – 4 (այդ թվում՝ լյարդի ցիռոզի Child-Pugh A դաս, MELD <20) ունեցող պացիենտներին` 12 շաբաթ տևողությամբ,
• լյարդի ցիռոզ (Child-Pugh B կամ C դաս, MELD<20) ունեցող պացիենտներին` 24 շաբաթ տևողությամբ:
   

Նախքան բուժումը պետք է կատարել հետևյալ հետազոտությունները և ունենալ դրանց արդյունքները․ 

• հեպատիտ Ց վիրուսի հայտնաբերում (դրական) որակական պոլիմերազային շղթայական ռեակցիայի (ՊՇՌ) մեթոդով,
• ֆիբրոզի աստիճանի որոշում՝ լյարդի էլաստոգրաֆիա (ֆիբրոսկան) և/կամ APRI և/կամ FIB-4, ընդ որում, 3-րդ և 4-րդ աստիճանի ֆիբրոզի դեպքում որոշվում է նաև AFP,
• արյան ընդհանուր հետազոտություն լեյկոբանաձևով, կենսաքիմիական հետազոտություն (բիլիռուբին ընդհանուր/կապված, ԱԼՏ, ԱՍՏ, ալբումին, գլյուկոզ, կրեատինին, պրոտրոմբինային ժամանակ/ինդեքս/INR),
• HBsAg և/կամ հակա-HBc ու հակա-HIV (հակամարմիններ ՄԻԱՎ-ի նկատմամբ),
• որովայնի խոռոչի օրգանների ուլտրաձայնային հետազոտություն: