Ուշադրություն
ՀՀ երկքաղաքացիները կարող են ՀՀ վարորդական վկայական ստանալ առանց տեսական և գործնական որակավորման քննություններ հանձնելու՝ 1 աշխատանքային օրվա ընթացքում։ Անհրաժեշտ է պարզապես այցելել նախընտրելի հաշվառման-քննական բաժին՝ առանց այց ամրագրելու։

Վարորդական վկայականը փոխանակելու համար «Շարունակել» կոճակը սեղմելուց հետո անհրաժեշտ է․ 

• սեղմել «Հաշվառման քննական ծառայություններ» բաժնի ստորին հատվածի «Հերթագրում» կոճակը,

• նշել «Առանց քննության (փոխանակում, կորուստ)» տարբերակը,

• բացված պատուհանում ընտրել հաշվառման-քննական բաժինը (ՀՔԲ),

• լրացնել հանրային ծառայությունների համարանիշը (ՀԾՀ), 

• լրացնել հեռախոսահամարը,

• սեղմել «Հերթագրվել» կոճակը։

Հերթագրման հաստատումը կուղարկվի նշված հեռախոսահամարին։

Ներկայացվող պահանջները

Օտարերկրյա վարորդական վկայականը ՀՀ վարորդական վկայականով փոխանակելու համար օտարերկրացու ազգային վարորդական վկայականը պետք է համապատասխանի «Ճանապարհային երթևեկության մասին» Վիեննայի Կոնվենցիայի պահանջներին (հակառակ դեպքում փոխանակումը հնարավոր չի լինի և անհրաժեշտ կլինի հանձնել տեսական և գործնական քննություն)։

ՀՀ երկքաղաքացիների դեպքում ՀՀ ազգային վարորդական վկայական ստանալու համար օտարերկրյա պետության կողմից տրված վարորդական վկայականը նույնպես պետք է համապատասխանի Վիեննայի Կոնվենցիայի պահանջներին։

Պահանջվող փաստաթղթերը

ՀՀ երկքաղաքացիների դեպքում՝

• այլ պետությունում ստացած վարորդական վկայականի պատճենը,
• անձը հաստատող փաստաթուղթ,
• պետական տուրքի վճարման անդորրագիր։

Օտարերկրյա քաղաքացիների կամ քաղաքացիություն չունեցող անձանց դեպքում՝

• անձը հաստատող փաստաթուղթ (ՀՀ-ում կացության կարգավիճակ ունեցող անձի դեպքում կարող է պահանջվել նաև կացության քարտը, փախստականների դեպքում՝ փախստականի վկայականը, իսկ քաղաքացիություն չունեցող անձի դեպքում՝ կոնվենցիոն ճամփորդական փաստաթուղթը),
• օտարերկրյա վարորդական վկայականի բնօրինակը։

Վճարման չափը և կարգը

Օտարերկրյա վարորդական վկայականը ՀՀ վարորդական վկայականով փոխանակելու, իսկ երկաղաքացիների դեպքում՝ պարզապես ՀՀ վարորդական վկայական ստանալու համար անհրաժեշտ է վճարել 12,000 դրամ։

Վճարումն իրականացվում է հետևյալ եղանակներից մեկով՝

• E-payments համակարգի միջոցով,

• բանկային փոխանցման միջոցով ՀՀ պետական բյուջեի հաշվեհամարին՝ 900005016317։ Փոխանցման նպատակի դաշտում պետք է նշել «Վարորդական վկայական ստանալու համար» (եթե բանկային հավելվածում չի ստացվում փոխանցում կատարել այս հաշվեհամարին, ապա խնդրում ենք ընտրել «Փոխանցում պետական բյուջե» տարբերակը)։
  
  

Տրամադրման ժամկետը և կարգը

• ՀՀ երկաղաքացիներին ՀՀ վարորդական վկայականը տրամադրվում է պարզեցված կարգով՝ 1 աշխատանքային օրվա ընթացքում։ Ընդ որում՝ ազգային վարորդական վկայական տրամադրելիս մյուս երկրի վարորդական վկայականը չի կորցնում իրավական ուժը։
• Օտարերկրյա քաղաքացիներին ՀՀ վարորդական վկայականը տրամադրվում է 2-4 ամսվա ընթացքում։ Այդ ընթացքում ստուգվում է տվյալ երկրի վարորդական վկայականի օրինականությունը, ինչից հետո օտարերկրյա քաղաքացին ստանում է ՀՀ վարորդական վկայական, իսկ իր ազգային վարորդական վկայականը կորցնում է իրավական ուժը։

Հղում օրենսդրությանը

• ՀՀ կառավարության՝ 2008 թվականի սեպտեմբերի 18-ի N 1158-Ն որոշում

• «Պետական տուրքի մասին» ՀՀ օրենք

Իրավական ակտերը հնարավոր է գտնել arlis.am-ում։