Ինչպե՞ս դիմել

Լիցենզավորման հայտ ներկայացնելու համար «Շարունակել» կոճակը սեղմելուց և նույնականացվելուց հետո անհրաժեշտ է․

• գրանցվել hrh.am համակարգում,
• անձնական էջի «Կրթություն» դաշտում կցել կրթության վերաբերյալ փաստաթղթերը, 
• «Կենտրոնական քննություն» հայտ դաշտում ավելացնել համապատասխան հայտը։

Հետագա քայլերի վերաբերյալ տեղեկատվությունը կտրամադրվի հայտը ներկայացնելուց հետո։

Ո՞վ կարող է դիմել

Լիցենզիա կարող են ստանալ․

• ավագ բուժաշխատողները,
• կլինիկական օրդինատորները (ռեզիդենտները),
• ռազմաբժշկական հետբուհական ուսուցում անցնող անձինք։

Անհատական լիցենզիան տրվում է ավագ բուժաշխատողներին՝ առողջապահության բնագավառում մասնագիտական գործունեություն ինքնուրույն իրականացնելու համար։

Անցումային անհատական լիցենզիան նախատեսված է կլինիկական օրդինատուրայում կամ ռազմաբժշկական հետբուհական հաստատություններում սովորող անձանց համար։ Այն իրավունք է տալիս իրականացնել ոչ ինքնուրույն մասնագիտական գործունեություն՝ միայն հսկողության ներքո և բուժհաստատության սահմանված ծավալով։ 

Ներկայացվող պահանջները

Լիցենզիա ստանալու հիմնական նախապայմաններն են․

• բարձրագույն և հետբուհական մասնագիտական կրթություն,
• համապատասխան քննության հանձնում,
• մասնագիտական գործունեությունը խոչընդոտող հիվանդությունների կամ ֆիզիկական արատների բացակայություն,
• դատվածության բացակայություն,
• դատարանի վճռով անգործունակ կամ սահմանափակ գործունակ ճանաչված չլինելու մասին հավաստում։
  
  

Պահանջվող տվյալները

Հայտը լրացնելիս անհրաժեշտ է ներկայացնել հետևյալ տվյալները․

• անձը հաստատող փաստաթղթի համար,
• սոցիալական քարտի համար,
• շարունակական մասնագիտական զարգացման հավաստագիր (առկայության դեպքում),
• կոնտակտային տվյալներ (հասցե, հեռախոսահամար, էլ. փոստ),
• պետական տուրքի վճարման անդորրագիր (բացառությամբ ուժային կառույցներում ծառայող բուժաշխատողների)։
  
  

Վճարման չափը

Լիցենզիա ստանալու համար անհրաժեշտ է վճարել․

• 3,000 դրամ՝ կլինիկական օրդինատորների համար,
• 6,000 դրամ՝ ավագ բուժաշխատողների համար։
  
  

Տրամադրման ժամկետը և կարգը

• Եթե հայտում թերություններ կան, 2 աշխատանքային օրվա ընթացքում այն վերադարձվում է հայտ ներկայացնողին թերությունները 5 աշխատանքային օրվա ընթացքում շտկելու համար։ Լիցենզիա տրամադրելու կամ մերժելու մասին որոշումն ընդունվում է հայտն ընդունվելուց հետո 23 աշխատանքային օրվա ընթացքում։ Ծանուցումն ուղարկվում է հայտատուի էլեկտրոնային փոստի հասցեին։
• Լիցենզավորման քննությունն անցկացվում է 2 փուլով՝ թեստային ստուգում և սիմուլյացիոն պայմաններում գործնական հմտությունների գնահատում։ Ըստ սահմանված հաջորդականության՝ մասնակիցը գործնական փուլին մասնակցելու իրավունք է ստանում միայն թեստային առաջադրանքների առնվազն 70 տոկոսը հաջողությամբ կատարելուց և անցողիկ շեմը հաղթահարելուց հետո։ Քննական գործընթացի յուրաքանչյուր փուլը հանձնելու համար մասնակիցներին տրվում է երեքական փորձի հնարավորություն։
• Անհատական լիցենզիան տրվում է 5 տարի ժամկետով և ենթակա է երկարաձգման՝ շարունակական մասնագիտական զարգացման պահանջները կատարելու դեպքում։
• Անցումային լիցենզիան ուժի մեջ է միայն ուսումնառության ժամանակահատվածի համար։
  
  

Հղում օրենսդրությանը

• ՀՀ կառավարության՝ 2025 թվականի ապրիլի 17-ի N 437-Ն որոշում
• ՀՀ առողջապահության նախարարի՝ 2025 թվականի սեպտեմբերի 23-ի N 131-Ն հրաման

Իրավական ակտերը հնարավոր է գտնել arlis.am-ում (անհրաժեշտ է կարդալ ակտերի վերջին տարբերակները)։