Հայաստանում բնակարան կարող են ձեռք բերել ինչպես Հայաստանի, այնպես էլ օտարերկրյա քաղաքացիները և իրավաբանական անձինք։

Բնակարանը միանվագ վճարմամբ գնելու դեպքում ՀՀ ռեզիդենտ լինելու անհրաժեշտություն չկա։

Օտարերկրյա քաղաքացիները կարող են ձեռք բերել նաև տնամերձ, այգեգործական, անհատական բնակելի տան, հասարակական և արտադրական օբյեկտի կառուցման համար նախատեսված հողամասեր։ Ընդ որում՝ oտարերկրյա ֆիզիկական անձինք չեն կարող ունենալ հողի նկատմամբ սեփականության իրավունք (բացառություն են ՀՀ-ում կացության հատուկ կարգավիճակ ունեցող անձինք)։

Իրավաբանական անձանց դեպքում այդպիսի սահմանափակում չի գործում։  

Եթե բնակարանդ ուզում ես գնել միանվագ վճարման միջոցով և արդեն որոշել ես, թե որքան ես վճարելու, սկսիր ուսումնասիրել քեզ հետաքրքրող տարածքում առկա բնակարանների գները, պարզիր՝ որոնք են լինելու քո քայլերը բնակարանն ընտրելուց հետո, և գնիր բնակարանդ՝ միանվագ վճարելով գումարը։

Վաճառվող բնակարանների մասին տեղեկատվությունը կարող ես գտնել անշարժ գույքի վաճառքով զբաղվող կազմակերպությունների, կառուցապատողների կամ բանկերի կայքերում։

Բնակարանի ընտրության և գնման ողջ գործընթացը դու կարող ես կատարել ինքնուրույն կամ դիմել անշարժ գույքի գործակալների օգնությանը (այս դեպքում անպայման նախապես հստակեցրու՝ որքան ես վճարելու գործակալին)։ 

Բնակարանը առաջնային շուկայից է, եթե այն վաճառվում է առաջին անգամ, անմիջապես կառուցապատողից։

Երկրորդային շուկայից է այն բնակարանը, որն արդեն շահագործված շենքում է և վաճառվում է ոչ առաջին անգամ։

• Առաջնային և երկրորդային շուկաների բնակարանների արժեքները կարող են տարբեր լինել․ սովորաբար երկրորդային շուկայի բնակարանների գներն ավելի ցածր են։

• Առաջնային շուկայից ձեռք բերված բնակարանը սովորաբար կառուցապատման փուլում է լինում, և պետք է սպասես մինչև կառուցապատման ավարտը (կառուցապատումը տևում է 2-4 տարի)։ 

Երկրորդային շուկայից հիպոթեքային վարկով բնակարան ձեռք բերելու դեպքում եկամտային հարկի վերադարձի հնարավորությունից չես կարողանա օգտվել։  

Նոր կառուցվող շենքում (առաջնային շուկա) բնակարան գնելիս հատկապես կարևոր է կառուցապատող ընկերության ընտրությունը․ քանի շենք է արդեն կառուցել այդ ընկերությունը, որքան արագ են ընթանում աշխատանքները։

Շենքն ընտրելիս կառուցապատող ընկերությունից պետք է իմանալ՝

• երբ է նախատեսվում շինարարական աշխատանքների ավարտը, ընկերությունը ունի արդյոք թույլտվություն,

• առկա են արդյոք շենքի համար տրված քաղաքաշինական ու պետական գրանցման փաստաթղթերը, 

• ինչ վիճակում է հանձնվելու բնակարանը (ներքին հարդարում, պատուհաններ, մուտքի դռան առկայություն, կոմունալ հարմարություններ և այլն),

• որ բանկի հետ է համագործակցում կառուցապատող ընկերությունը,

• հիպոթեքային վարկավորման ինչ ծրագրերով են վաճառվում բնակարանները, 

• ներգրավված է արդյոք կառուցապատողը դատական գործընթացներում և այլն։ 

Արդեն շահագործված շենքում (երկրորդային շուկա) բնակարանը գնելու դեպքում պետք է խուսափել կեղծիքներից, որի համար․ 

• ուշադրություն դարձրու վստահելի գործակալների ընտրությանը,

• պարզիր՝ արդյոք բնակարանի բոլոր սեփականատերերը համաձայն են բնակարանի վաճառքին,

• տեղեկացիր՝ ինչ խնդիրներ ունի բնակարանը։