Աջակցություն կարող են ստանալ 1-ին և 2-րդ խմբի հաշմանդամության զինվորական կենսաթոշակի իրավունք ունեցող նախկին զինծառայողների և զոհված զինծառայողների ընտանիքները, որոնք․

• չունեն բնակարան ՀՀ-ում սեփականության իրավունքով,
• ունեն 4-րդ աստիճանի վթարային բնակարան, որը ենթակա է քանդման, և անվտանգության տեսանկյունից բնակելի չէ,
• առաջին կարգի հաշմանդամություն ունեցողները ունեն մեկ անձի հաշվով 5․5 քմ-ից պակաս բնակելի տարածք։ Օրինակ՝ եթե բնակելի տան մակերեսը 20 քմ է, և անտեղ բնակվում է 5 հոգի, ապա մեկ անձն այս բնակարանային պայմաններում ունի 4 քմ (20/5) տարածք, ինչը քիչ է ծրագրի շրջանակում տրամադրվող 5․5 քմ-ից։ 

Ընդ որում աջակցության կարող են դիմել զինծառայողների այն ընտանիքները, որոնք զինծառայողի՝ հաշմանդամության կենսաթոշակի իրավունքը ստանալու օրվա կամ զոհվելու օրվա դրությամբ վերջին 5 տարվա ընթացքում․

• չեն վաճառել սեփական բնակարանը,
• չեն փոխել բնակարանի նպատակային նշանակությունը,
• չեն բնակվում չգրանցված բնակարանում,
• չունեն ժառանգական իրավունք բնակելի տարածության նկատմամբ։

Երբ կենսաթոշակի իրավունք ունեցող կամ զոհված զինծառայողի ընտանիքի անդամը մինչև աջակցության դիմելը տեղափոխվում է նոր բնակավայր, նա կարող է բնակարանային պայմանների բարելավման հաշվառման ընդունվել բնակության նոր վայրում: Այս իրավունքն առաջանում է այն դեպքում, երբ անձը հին բնակավայրից հանվել է հաշվառումից, նոր տեղում դիմել է հաշվառման համար, և նոր վայրում հաշվառվել է զինծառայողի զոհվելուց կամ հաշմանդամություն ստանալուց հետո:

Բնակարանային պայմանների բարելավման հաշվառումը կատարվում է նոր բնակավայրի համայնքապետի կողմից: Այլ կերպ ասած՝ երբ անձը պաշտոնապես տեղափոխվում է նոր համայնք, հենց այդ համայնքի ղեկավարն է պատասխանատու նրա հայտի քննարկման և հաշվառման համար:

Աջակցության կարող են դիմել զոհված կամ 1-ին և 2-րդ կարգի հաշմանդամության կենսաթոշակի իրավունք ունեցող զինծառայողի ընտանիքի հետևյալ անդամները․

• ամուսինը կամ կինը և 18 տարին չլրացած երեխաները,
• անգործունակ ճանաչված զավակները,
• 18-26 տարեկան ուսանող զավակները (ցերեկային ուսուցմամբ),
• 18 տարեկանից բարձր հաշմանդամ զավակները (եթե հաշմանդամությունը ստացել են մինչև 18 տարեկանը),
• խնամքի տակ գտնվող քույրերը և եղբայրները,
• ծնողները։

Աջակցություն ստանալու համար դիմումին կից անհրաժեշտ է ներկայացնել․

• չափահաս անձանց անձնագրերի պատճեններ (հաշվառման էջերով),
• ամուսնության կամ ամուսնալուծության վկայականները (առկայության դեպքում),
• անչափահաս երեխաների ծննդյան վկայականները, ուսումնառություն և հաշմանդամություն ունենալու, խնամքի ներքո գտնվելու վերաբերյալ տեղեկանքները,
• հաշմանդամություն ունենալու մասին բժշկասոցիալական փորձաքննության տեղեկանք,
• զինծառայողի հիվանդության, վնասվածքի զինվորական ծառայության հետ պատճառական կապի վերաբերյալ ռազմաբժշկական փորձաքննական եզրակացության պատճենը,
• սոցիալական ապահովության մասին տեղեկանք (եթե դիմողը պաշտպանության նախարարության աշխատակից է, ապա տեղեկանքը տրամադրվում է համապատասխան ստորաբաժանումից, իսկ եթե Ազգային անվտանգության աշխատակից է, ապա տեղեկանքը ստանում է ազգային անվտանգությունից),
• տեղեկանք Կադաստրի կոմիտեից՝ շահառուի անվամբ սեփականության իրավունքով բնակելի տարածք ունենալու և վերջին 5 տարում այն վաճառելու մասին,
• տեղեկանք՝ բնակարանային պայմանների մանրամասն նկարագրությամբ,
• զինվորական կենսաթոշակի իրավունքի կամ զոհվելու փաստի հավաստում։

Աջակցությունը տրամադրվում է համապատասխան հանձնաժողովի կողմից դիմումը ուսումնասիրելուց հետո մեկ ամսվա ընթացքում։ Աջակցության հաստատումը կախված է նաև պաշտպանության նախարարության բնակարանային առկա ֆոնդից և առաջնահերթություններից։

Պետությունը տրամադրում է սեփականության իրավունքով անհատույց բնակարան, որն իրավական կերպով դառնում է շահառուի սեփականությունը։ Բնակարանաը տրվում է՝ առանց գումարային փոխհատուցման պարտավորության։

• Բնակարանի գնման վկայագիրը իրավական փաստաթուղթ է, որով կարող ես գնել բնակարան պետական ֆինանսավորմամբ՝ ֆիզիկական կամ իրավաբանական անձից։
• Վկայագիրը ենթակա չէ վաճառքի կամ գրավադրման՝ բացառությամբ, եթե դիմողը բնակարան կամ բնակեի տուն ձեռք բերելու նպատակով ներգրավում է հիփոթեքային վարկի միջոցներ։
• Վկայագրի միջոցով բնակարանի ձեռքբերման ժամկետը 6 ամիս է` վկայագիրը շահառուին տրամադրելու օրվանից սկսած` առանց ժամկետի երկարաձգման հնարավորության: Այդ ժամկետի ընթացքում բնակարան ձեռք չբերելու դեպքում վկայագիրը մարվում է, և պայմանագիրը համարվում է լուծված, իսկ աջակցության իրավունք ունեցող անձը պահպանում է բնակարանային հաշվառման մեջ գտնվելու իրավունքը:

Աջակցության չափը որոշվում է որոշում ընդունելու օրվա դրությամբ՝ ընտանիքի անդամների քանակից և նրանց համար անհրաժեշտ բնակելի մակերեսից:

• 1 սենյականոց բնակարանը՝ առավելագույնը 45 քմ-ով, հատկացվում է միևնույն սեռի 2 անձանց, տարբեր սեռի 2 անձանց, եթե երեխան 9 տարեկանից փոքր է և ամուսիններին։
• 2 սենյականոց բնակարան՝ առավելագույնը 65 քմ-ով հատկացվում է 9 տարեկանից մեծ տարբեր սեռի 2 անձանց (բացի ամուսիններից), 3 անձից բաղկացած ընտանիքին։
• 3 սենյականոց բնակարան՝ առավելագույնը 85 քմ-ով հատկացվում է 4-5 անձից բաղկացած ընտանիքներին։
• 4 սենյականոց բնակարան՝ առավելագույնը 105 քմ-ով հատկացվում է 6 և ավելի անձից կազմված ընտանիքներին:

Աջակցության չափը հաշվարկվում է․

• Երևանում՝ շուկայական միջին գնով (ներկայիս շուկայական գների համաձայն),
• այլ քաղաքներում՝ տեղական շուկայական գնի բազայով,
• գյուղական վայրերում՝ մարզի, քաղաքների բնակարանների գների 90%-ի չափով։

• Մինչև 18 տարեկան 5 և ավելի երեխա ունեցող ընտանիքները կարող են ընտրել 5-սենյականոց բնակարան կամ առանձին 3-սենյականոց և 2-սենյականոց բնակարաններ։
• 20-շաբաթյա հղիության դեպքում կինը հաշվառվում է որպես լրացուցիչ անդամ, և մեկ առանձին սենյակ ավելի է հաշվարկվում։
• Առանձին սենյակ է նաև հաշվարկվում նյարդային, հոգեկան, ինֆենկցիոն, շնչառական հիվանդությունների դեպքում։

Աջակցությունը տրամադրվում է ըստ բնակարանային պայմանների բարելավման հաշվառման վերցնելու տարիների՝ հետևյալ հաջորդական առաջնահերթությամբ`

• զոհված զինծառայողների ընտանիքներ,
• 1-ին և 2-րդ խմբի զինվորական հաշմանդամություն ունեցող նախկին զինծառայողների ընտանիքներ,
• 2-րդ և 3-րդ խմբի հաշմանդամության զինվորական կենսաթոշակի իրավունք ունեցող նախկին զինծառայողների ընտանիքներ, որոնք ՀՀ-ում ունեն սեփականության իրավունքով բնակելի տարածք, սակայն ընտանիքի յուրաքանչյուր անդամի հաշվով բնակելի տարածքի մակերեսը կազմում է 5.5 քմ մետրից պակաս,
• 3-րդ խմբի հաշմանդամության զինվորական կենսաթոշակի իրավունք ունեցող նախկին զինծառայողների ընտանիքի անդամներ, որոնք ՀՀ-ում չունեն սեփականության իրավունքով բնակելի տարածք կամ ունեն սեփականության իրավունքով բնակելի տարածք, որը սակայն 4-րդ աստիճանի վթարային է և ենթական է քանդման։