Այց ամրագրելիս անհրաժեշտ է նշել այն անձի տվյալները, ով անձամբ ներկայանալու է ընդունելության։

• ընտրել այն երկրի դեսպանության կայքը, որտեղ ներկայացվելու է դիմումը,
• էջի ձախ հատվածում սեղմել «Ամրագրել ժամադրություն» կոճակը,
• բացվող պատուհանում ընտրել «Քաղաքացիության շնորհում կամ դադարեցում» տարբերակը,
• ընտրել հասանելի օրերից և ժամերից ամենահարմար տարբերակը,
• բացվող էջում լրացնել անձնական տվյալները և հաստատել ամրագրումը։

Ներկայացվող պահանջները

Ամուսնության հիմքով ՀՀ քաղաքացիություն ստանալու համար դիմելիս անհրաժեշտ է՝

• մինչև դիմումը ներկայացնելը վերջին 2 տարվա ընթացքում գրանցված ամուսնության մեջ լինել ՀՀ քաղաքացու հետ և այդ 2 տարիների ընթացքում առնվազն 1 տարի ժամկետով ապրած լինել Հայաստանում կամ ունենալ ՀՀ քաղաքացի երեխա։
  
  

Պահանջվող փաստաթղթերը

Նախատեսված այցի օրը և ժամին անհրաժեշտ է համապատասխան դեսպանություն կամ հյուպատոսական հիմնարկ ներկայացնել հետևյալ փաստաթղթերը․

• դիմում` ուղղված ՀՀ նախագահին,

• անձնագիրը և դրա պատճենը (քաղաքացիություն չունեցող անձը` իր վկայականը և դրա պատճենը, կամ ճամփորդական փաստաթուղթը և ՀՀ-ում կացության կարգավիճակը հաստատող փաստաթուղթը և դրանց պատճենները),

• 35x45 մմ չափսի 6 լուսանկար,

• ամուսնության վկայականը, ամուսնու անձնագիրը և դրանց պատճենները կամ տեղեկանք ամուսնու քաղաքացիության մասին,

• երեխայի ծննդյան վկայականը կամ երեխայի՝ ՀՀ քաղաքացիությունը հաստատող վկայականը կամ երեխայի ՀՀ անձնագիրը (յուրաքանչյուրի դեպքում՝ նաև փաստաթղթի պատճենը),

• պետական տուրքի վճարումը հավաստող փաստաթուղթը։

Վճարման չափը և կարգը

ՀՀ քաղաքացիություն ստանալու համար անհրաժեշտ է վճարել 1,000 դրամ։ Վճարումն անհրաժեշտ է կատարել նախապես՝ առցանց եղանակով։

Տրամադրման ժամկետը և կարգը

Անձի դիմումը դիտարկվում է այն ներկայացնելուց հետո 90 աշխատանքային օրվա ընթացքում, ինչից հետո դիմողն էլեկտրոնային հաղորդագրությամբ տեղեկացվում է քաղաքացիություն ստանալու դիմումի հաստատման կամ մերժման վերաբերյալ։

Դիմումի ընթացքին հնարավոր է հետևել առցանց (դիմումը ներկայացնելուց հետո էլեկտրոնային հաղորդագրությամբ ստացված դիմումի համարով)։

Քաղաքացիություն ստանալու դիմումը բավարարվելուց հետո ՀՀ քաղաքացու անձնագիր ստանալու համար անհրաժեշտ է կրկին դիմել տվյալ երկրի ՀՀ դեսպանություն կամ հյուպատոսություն։ ՀՀ-ում տպագրված անձնագիրը տվյալ երկիր ուղարկվում է Արտաքին գործերի նախարարության կողմից։

Հղում օրենսդրությանը