Աջակցության ծրագրին դիմելու համար նախ անհրաժեշտ է գրանցվել Էլեկտրոնային հարցումների միասնական հարթակում։ Դրա համար անհրաժեշտ է՝ 

• այցելել e-request.am,
• սեղմել էջի վերին աջ անկյունում գտնվող «Մուտք» կոճակը, այնուհետև անցնել բացվող էջի ներքևում գտնվող «Գրանցվել հիմա» հղումով, 
• գրանցվել «ԵսԵմ» նույնականացման կամ էլեկտրոնային փոստի միջոցով,
• նշել քաղաքացիությունը, այնուհետև լրացնել անհրաժեշտ տվյալները,
• մուտքագրել էլեկտրոնային փոստի հասցեին ստացված կոդը, այնուհետև՝ բջջային հեռախոսահամարին ստացված կոդը,
• ստեղծել գաղտնաբառ և հաստատել այն:
  
  

Հարթակում գրանցվելուց հետո աջակցություն ծրագրին դիմելու համար անհրաժեշտ է՝

• մուտք գործել հարթակ «ԵսԵմ» նույնականացմամբ կամ լրացնելով էլեկտրոնային փոստի հասցեն և գաղտնաբառը,
• սեղմել «Ուղարկել դիմում, հարցում կամ բողոք» պատուհանի «Ուղարկել» կոճակը,
• բացվող էջում ընտրել «Դիմում» տարբերակը,
• ընտրել դիմումատուի տեսակը՝ «Անհատ»,
• բացվող էջում ընտրել «ՀՀ աշխատանքի և սոցիալական հարցերի նախարարություն» պետական մարմինը, որին ուղղված է դիմումը,
• լրացնել նշված դիմումի ձևը, կցել անհրաժեշտ փաստաթղթերը և սեղմել «Առաջ» կոճակը։

Դիմումի ընթացքին հնարավոր է հետևել անձնական էջում առկա հսկիչ կոդի միջոցով։

Ներկայացվող պահանջները

Աջակցող միջոցների հավաստագիր ստանալու համար անհրաժեշտ է ունենալ բժշկական կազմակերպության կողմից տրված և հաստատված հաշմանդամության կարգ։

Պահանջվող փաստաթղթերը

Անվասայլակների, քայլակների, հենակների, ձեռնափայտերի, ստորին և վերին վերջույթների պրոթեզների, լսողական սարքերի և այլ աջակցող միջոցների պետական հավաստագիր ստանալու համար անհրաժեշտ է ներկայացնել հետևյալ փաստաթղթերի լուսապատճենները՝

• դիմում,
• անձը հաստատող փաստաթուղթ,
• սոցիալական ապահովության քարտ կամ հանրային ծառայությունների համարանիշ կամ հանրային ծառայությունների համարանիշ չստանալու վերաբերյալ տեղեկանք,
• ներկայացուցչի դիմելու դեպքում՝ շահառուի  կողմից գրավոր լիազորագիր և ներկայացուցչի անձնագիր,
• ՀՀ մշտապես բնակվող քաղաքացիություն չունեցող անձ հանդիսանալու դեպքում՝ ՀՀ-ում մշտապես բնակվող քաղաքացիություն չունեցող անձի կացության վկայականը,
• ապաստան հայցողի դեպքում՝ ապաստան հայցողի վկայականը,
• փախստականի կարգավիճակ ունենալու դեպքում՝ կոնվենցիոն ճամփորդական փաստաթուղթ,
• բժշկասոցիալական փորձաքննական որոշումը կամ ֆունկցիոնալության գնահատման որոշումը։
  
  

Անհրաժեշտության դեպքում հնարավոր է հավելյալ փաստաթղթեր ներկայացնելու կարիք առաջանա։

Աջակցության չափը

Աջակցող միջոցների հավաստագիրը դրամադրվում է անվճար։ Սակայն, եթե շահառուի նախընտրած աջակցող միջոցների գինը բարձր է հավաստագրի համար սահմանված գնային արժեքից, ապա շահառուն իր ցանկությամբ կարող է ձեռք բերել նշված աջակցող միջոցները` վճարելով արժեքի տարբերությունը:
 

Տրամադրման ժամկետը և կարգը

• Ներկայացված փաստաթղթերում անճշտություններ կամ անհամապատասխանություններ հայտնաբերելու դեպքում ՄՍԾ-ն 5 աշխատանքային օրվա ընթացքում տեղեկացնում է դիմողին: Ճշտված և լրացված փաստաթղթերն ստանալուց հետո հավաստագիրը ձևավորվում է 5 աշխատանքային օրվա ընթացքում:
• Հավաստագիրը ձևավորվելուց հետո դիմողին տրամադրվում է հավաստագրի պատճենը և այն կազմակերպությունների ցանկը, որտեղից կարող են ձեռք բերել իրենց անհրաժեշտ աջակցող միջոցը։
• Հավաստագիրն ուժի մեջ է տրամադրելուց հետո 180 օրացուցային օր:
• Դեկտեմբերի 15-31-ը ընկած ժամանակահատվածում աջակցող միջոցներ չեն տրամադրվում, ընդ որում՝ նշված օրերը հավաստագրի հիման վրա տրվող աջակցող միջոցների դեպքում օրացուցային օրերի մեջ չեն հաշվարկվում։
  
  

Հղում օրենսդրությանը

• ՀՀ կառավարության՝ 2024 թվականի հունիսի 27-ի N 1004-Ն որոշում

• «Անձի ֆունկցիոնալության գնահատման մասին» ՀՀ օրենք

• «Հաշմանդամություն ունեցող անձանց իրավունքների մասին» ՀՀ օրենք

Իրավական ակտերը հնարավոր է գտնել Arlis.am-ում։