Ստորև ներկայացված քայլերն անհրաժեշտ է կատարել «Շարունակել» կոճակը սեղմելուց հետո:

Վարորդական վկայականը փոխանակելու համար անհրաժեշտ է՝

• այցելել www.roadpolice.am,

• սեղմել «Վարորդական վկայական» կոճակը, որը գտնվում է էկրանի կենտրոնում,

• բացված պատուհանում ընտրել հաշվառման քննական նախընտրելի բաժինը (ՀՔԲ), 

• նշել «Առանց քննության (փոխանակում, կորուստ)» տարբերակը,

• լրացնել հանրային ծառայությունների համարանիշը (ՀԾՀ), 

• լրացնել հեռախոսահամարը,

• սեղմել «Հերթագրվել» կոճակը։
  
  

Այս գործողությունները կատարելուց հետո հեռախոսահամարին կուղարկվի հաղորդագրություն այն մասին, որ հերթագրումը հաստատված է։

Ներկայացվող պահանջները

Օտարերկրյա վարորդական վկայականը ՀՀ վարորդական վկայականով փոխանակելու համար անհրաժեշտ է լինել «Ճանապարհային երթևեկության մասին» Վիեննայի Կոնվենցիայի անդամ երկիր, հակառակ դեպքում փոխանակումը հնարավոր չէ․ պետք է հանձնել գործնական և տեսական քննությունն և ստանալ ՀՀ վարորդական վկայական։

Վիեննայի Կոնվենցիայի անդամ երկրներն են․

Ավստրիա, Ադրբեջան, Բահամներ, Բահրեյն, Բելոռուս, Բելգիա, Բուլղարիա, Բոսնիա և Հերցոգովինա, Բրազիլիա, Մեծ Բրիտանիա, Հունգարիա, Վենեսուելա, Գայանա, Գանա, Գերմանիա, Հունաստան, Վրաստան, Դանիա, Զաիր, Զիմբաբվե, Իսրաել, Ինդոնեզիա, Իրան, Իսպանիա, Իտալիա, Ղազախստան, Կիրգիզիա, Կոստա-Ռիկա, Կոտ դ ‘Իվուար, Կուբա, Քուվեյթ, Լատվիա, Լիտվա, Լյուքսեմբուրգ, Մակեդոնիա, Մարոկկո, Մեքսիկա, Մոնակո, Նիգերիա, Նորվեգիա, Արաբական Միացյալ Էմիրություններ, Պակիստան, Լեհաստան, Պորտուգալիա, Կորիայի Հանրապետություն, Մոլդովայի Հանրապետություն, Ռուսաստանի Դաշնություն, Ռումինիա, Սան-Մարինո, Սեյշելներ, Սենեգալ, Սլովակիա, Տաջիկստան, Թաիլանդ, Թուքմենստան, Ուզբեկստան, Ուկրաինա, Ուրուգվայ, Ֆիլիպիններ, Ֆինլանդիա, Ֆրանսիա, Խորվատիա, Կենտրոնական Աֆրիկյան Հանրապետություն, Չեխիա, Չիլի, Շվեյցարիա, Շվեդիա, Էկվադոր, Էստոնիա, Հարվաֆրիկյան Հանրապետություն, Հարավսլավիա:

Պահանջվող փաստաթղթերը

Օտարերկրյա վարորդական վկայականը ՀՀ վարորդականով փոխանակելիս անհրաժեշտ է ՀՀ ճանապարհային ոստիկանություն ներկայացնել․

• անձը հաստատող փաստաթուղթ,
• օտարերկրյա վարորդական վկայականի բնօրինակը։
  
  

Անհրաժեշտության դեպքում ՀՀ ճանապարհային ոստիկանությանը պետք է ներկայացնել նաև․

• կացության քարտ,
• ապաստան հայցողի անձը հաստատող վկայական,
• կոնվենցիոն ճամփորդական փաստաթուղթ և այլն։
  
  

Վճարման չափը և կարգը

Օտարերկրյա վարորդական վկայականը ՀՀ վարորդական վկայականով փոխանակելու համար անհրաժեշտ է վճարել 12,000 ՀՀ դրամ պետական տուրք։

Վճարումն իրականացվում է հետևյալ եղանակներից մեկով՝

• E-payments համակարգի միջոցով,

• բանկային փոխանցման միջոցով ՀՀ պետական բյուջեի հաշվեհամարին՝ 900005016317։ Փոխանցման նպատակի դաշտում պետք է նշել «Վարորդական վկայական ստանալու համար» (եթե բանկային հավելվածում չի ստացվում փոխանցում կատարել այս հաշվեհամարին, ապա խնդրում ենք ընտրել «Փոխանցում պետական բյուջե» տարբերակը)։
  
  

Տրամադրման ժամկետը և կարգը

• Տրամադրված հեռախոսահամարին ուղարկվում է հաղորդագրություն փոխանակման համար անհրաժեշտ փաստաթղթերը և դիմում ներկայացնելու վերաբերյալ։
• Փոխանակումը տևում է 2-4 ամիս․ ճանապարհային ոստիկանությունը հարցում է ուղարկում այն երկրի լիազոր մարմնին, որի ազգային վարորդական վկայականը պետք է փոխանակվի հայկականով։ Հարցման նպատակն է պարզել օտարերկրյա վարորդական վկայականի օրինականությունը։ 
• Հարցումից հետո, եթե դիմողի տվյալները հավաստի են, ապա նա ստանում է ՀՀ վարորդական վկայական, իսկ իր ազգային վարորդական վկայականը կորցնում է իրավական ուժը։
  
  

Հղում օրենսդրությանը

• ՀՀ կառավարության՝ 2008 թվականի սեպտեմբերի 18-ի N 1158-Ն որոշում

• «Պետական տուրքի մասին» ՀՀ օրենք

Իրավական ակտերը հնարավոր է գտնել arlis.am-ում։