Ծրագրից օգտվելու համար անհրաժեշտ է Էկոնոմիկայի նախարարության հետ կնքել փոխհատուցման պայմանագիր և հողամասերի միավորումից հետո ներկայացնել դիմում՝ փոխհատուցումը ստանալու նպատակով։

Ներկայացվող պահանջները

Ծրագրի շրջանակներում աջակցություն ստանալու նպատակով անհրաժեշտ է համապատասխանել հետևյալ պահանջներին՝ 

• միավորված հողամասերի մակերեսների հանրագումարը պետք է կազմի առնվազն 5 հա և առավելագույնը՝ 200 հա, 

• հողամասերի միավորների քանակը պետք է լինի 5-30 հա միավորված հողամասի դեպքում առնվազն 5 միավոր, 30-100 հա միավորված հողամասի դեպքում առնվազն 10 միավոր, 100-200 հա միավորված հողամասի դեպքում՝ առնվազն 20 միավոր,

• հողամասի ձեռքբերումը պետք է իրականացվի փոխհատուցման պայմանագրի կնքումից հետո, ընդ որում` պետական և համայնքային սեփականության հողերի մակերեսները չեն կարող գերազանցել ձեռք բերվող հողերի ընդհանուր մակերեսի 20%-ը,

• չեն կարող ներառվել ծրագրի շրջանակներում իրավաբանական անձի` որպես ֆիզիկական անձ հանդես եկող մասնակիցներից կամ դրանում ներառված այլ իրավաբանական անձանցից, իսկ ֆիզիկական անձի դեպքում՝ իր մասնակցությամբ իրավաբանական անձանցից ձեռք բերված հողամասը,

• անհատ ձեռներեցը ձեռք բերվող հողերի նկատմամբ չի կարող ունենալ սեփականության կամ համասեփականության իրավունք փոխհատուցման պայմանագրի կնքման օրվան նախորդող 2 տարվա ընթացքում:

Պահանջվող փաստաթղթերը

Ծրագրին մասնակից դառնալու համար անհրաժեշտ է ներկայացնել՝

• դիմողի անձը հաստատող փաստաթղթի պատճենը,

• եթե դիմողն իրավաբանական անձ է, ապա պետական ռեգիստրի վկայականը և տնօրենի անձնագիրը, հիմնադիրների և մասնակիցների համաձայնությունը, որ չեն առարկում մասնակցել ծրագրին։

Հողամասերի միավորման գործընթացն ավարտելուց և փոխհատուցման պայմանագիր կնքելուց հետո փոխհատուցում ստանալու նպատակով անհրաժեշտ է ներկայացնել՝ 

• անձը հաստատող փաստաթղթի պատճենը (իրավաբանական անձի դեպքում՝ պետական ռեգիստրի գրանցման վկայականը և տնօրենի անձնագիրը),

• միավորված հողամասի, ինչպես նաև միավորման անհնարինությամբ պայմանավորված չմիավորվող առանձին հողամասի (հողամասերի) նկատմամբ անշարժ գույքի իրավունքի պետական գրանցման վկայականի պատճենը և շրջադարձային կետերի կոորդինատները,

• միավորված հողամասի նկատմամբ ընդհանուր սեփականության իրավունքի առկայության դեպքում՝ բոլոր սեփականատերերի նոտարական կարգով վավերացված գրավոր համաձայնությունը՝ փոխհատուցման պայմանագիր կնքած շահառուին փոխհատուցումը տրամադրելու վերաբերյալ,

• միավորման անհնարինությունը հավաստող փաստաթուղթ՝ տրամադրված Կադաստրի կոմիտեի կողմից (տվյալ գույքի միավորումը չհաստատելու վերաբերյալ փաստաթուղթ),

• տեղեկանք Կադաստրի կոմիտեի կողմից միավորված հողամասի սահմանափակումների առկայության վերաբերյալ,

• տեղեկանք Կադաստրի կոմիտեի կողմից միավորված հողամասի առանձին գույքային միավորների գնահատման խմբերի և կադաստրային արժեքների վերաբերյալ,

• ձեռք բերված հողամասերի առուվաճառքի պայմանագրերի և անշարժ գույքի իրավունքի պետական գրանցման վկայականի պատճենները,

• տեղեկանք Կադաստրի կոմիտեի կողմից միավորված հողամասի առանձին գույքային միավորների սեփականատերերի վերաբերյալ՝ ձեռքբերման օրվան նախորդող երկու տարիների ընթացքում,

• նախարարության կողմից պահանջվող լրացուցիչ փաստաթղթեր:

Տրամադրման ժամկետը և կարգ

Փոխհատուցման պայմանագրի կնքումից հետո մինչև փոխհատուցում ստանալը՝ յուրաքանչյուր եռամսյակի վերջին աշխատանքային օրը, անհրաժեշտ է Էկոնոմիկայի նախարարություն ներկայացնել հաշվետվություն, որը ներառում է դիմողի կողմից տվյալ եռամսյակի ընթացքում հողամասերի ձեռքբերման և դրանց միավորման գործընթացների վերաբերյալ տեղեկատվություն: 

Հաշվետվությունը չներկայացնելու դեպքում 1 անգամ հնարավորություն է տրվում մինչև տվյալ եռամսյակին հաջորդող ամսվա 20-ը ներկայացնել հաշվետվությունը, հակառակ դեպքում փոխհատուցման պայմանագիրը միակողմանիորեն լուծվում է։

Պայմանագրի կնքման դիմումը ներկայացնելուց հետո նախարարությունը 10 աշխատանքային օրվա ընթացքում մերժման հիմքերի բացակայության դեպքում՝ դիմողի հետ կնքում է փոխհատուցման պայմանագիր։

Պայմանագրի կնքումից հետո անհրաժեշտ է ներկայացնել դիմում՝ փոխհատուցում ստանալու նպատակով, որը նախարարությունը 10 աշխատանքային օրվա ընթացքում հաստատում է, կամ առաջարկում շտկել առկա թերությունները։

35 աշխատանքային օրվա ընթացքում կնքվում է համաձայնագիր՝ դիմողի հաշվին փոխանցելով հաշվարկված փոխհատուցման գումարը։

Բացասական եզրակացության դեպքում 5 աշխատանքային օրվա ընթացքում տեղեկացվում է դրա մասին։

Ուշադրություն

Ծրագիրն իրականացվում է միավորված (կոնսոլիդացված) հողամասերի շահառուի հետ փոխհատուցման պայմանագիր կնքելուց հետո, և փոխհատուցվում է ձեռք բերված առանձին գույքային միավոր հանդիսացող հողամասերի կադաստրային արժեքի 30%-ը։

 

Լրացուցիչ տեղեկություններ

Փոխհատուցումը տրամադրելուց հետո նախարարությունը 5 տարվա ընթացքում իրականացնում է մոնիթորինգ և պահանջների խախտման առկայության պարագայում շահառուն տեղեկացվում է փոխհատուցված գումարները մեկամսյա ժամկետում պետական բյուջե վերադարձնելու վերաբերյալ։

Շահառուն փոխհատուցումն ստանալու պահին հաջորդող 5 տարվա ընթացքում չի կարող՝

• բաժանել սեփականության իրավունքով իրեն պատկանող միավորված հողամասն առանձին միավորների,

• փոփոխել միավորված հողամասի նպատակային նշանակությունը,

• պարտավորվում է ապահովել միավորված հողամասի պարտադիր օգտագործումը գյուղատնտեսական նպատակներով` իրականացնելով գյուղատնտեսական մշակաբույսերի մշակություն,

• կարող է միավորված հողամասը վարձակալության հանձնել միայն այն դեպքում, եթե պարտավորվում է ապահովել ծրագրով և պայմանագրով սահմանված պարտավորությունները,

• պարտավորվում է միավորված հողամասը օտարել միայն նախարարության համաձայնությամբ (նախարարությունը համաձայնություն կտա, եթե օտարվող հողամասի մակերեսը լինի առնվազն դիմողի կողմից ծրագրի շրջանակում միավորված հողամասի մակերեսի չափով), պայմանով, որ միավորված հողամասի օտարման պայմանագրի կողմ է հանդիսանալու նաև նախարարությունը:

Հղում օրենսդրությանը

• ՀՀ կառավարության 2024 թվականի հունիսի 14-ի N 875-Լ որոշում

Որոշումը հնարավոր է գտնել arlis.am-ում։