Հանրապետական նշանակություն ունեցող հուշարձանի փոփոխման և տեղափոխման համար անհրաժեշտ է դիմել ՀՀ կառավարություն, իսկ տեղեկան նշանակություն ունեցող հուշարձանի տեղափոխման և փոփոխման համար՝ պետական կառավարման տարածքային մարմիններ։ Տեղական նշանակություն ունեցող հուշարձանի տեղափոխությունը և փոփոխությունը Երևան քաղաքում տեղի է ունենում քաղաքապետի թույլտվությամբ։

Ներկայացվող պահանջները

Հանրապետական և տեղական նշանակության հուշարձանների տեղափոխումը, հանրապետական նշանակության հուշարձանների փոփոխումը կարող են կատարվել միայն բացառիկ դեպքերում` ՀՀ կառավարության թույլտվությամբ, իսկ տեղական նշանակության հուշարձանների փոփոխումը` պետական կառավարման տարածքային մարմինների թույլտվությամբ:

Նախքան հուշարձանը տեղափոխելը կամ փոփոխելը, իսկ անհրաժեշտության դեպքում նաև դրանք կատարելու ընթացքում, լիազորված մարմինը կազմակերպում է հուշարձանի գիտական ուսումնասիրման, չափագրման և լուսանկարման աշխատանքները:

Պահանջվող փաստաթղթերը

Հուշարձանների փոփոխման և տեղափոխման համար անհրաժեշտ է ներկայացնել․

• դիմում,
• հուշարձանի փոփոխման կամ տեղափոխման նպատակը կամ նախատեսվող աշխատանքների անհրաժեշտությունը, բնույթը և ծավալը։
  
  

Դիմումին կից ներկայացվում են`

• հուշարձանի սեփականատիրոջ գրավոր համաձայնությունը,
• հուշարձանի նկատմամբ սեփականության իրավունքի գրանցման վկայականի պատճենը,
• հուշարձանի տեխնիկական վիճակի մասին ակտը, հուշարձանի փոփոխման առաջադրանքի նախագիծը, էսքիզային առաջարկի նախագիծը և բացատրագիրը։
  
  

Տրամադրման ժամկետը և կարգը

Հուշարձանների տեղափոխման և փոփոխման թույլտվություն տրամադրվում է միայն լիազորված մարմնի եզրակացության հիման վրա դիմումից հետո 19 աշխատանքային օրվա ընթացքում:

Նախատեսված աշխատանքների իրականացման հետ կապված ծախսերը կատարվում են հուշարձանի տեղափոխման կամ փոփոխման թույլտվություն ստացողի հաշվին:

Հղում օրենսդրությանը

«Պատմության և մշակույթի անշարժ հուշարձանների ու պատմական միջավայրի պահպանության և օգտագործման մասին» ՀՀ օրենք

Օրենքը հնարավոր է գտնել arlis.am-ում։