Ստորև ներկայացված քայլերն անհրաժեշտ է կատարել «Շարունակել» կոճակը սեղմելուց հետո․

• այցելել e-request.am կայք, որը կտանի էլեկտրոնային հարցումների միասնական հարթակ,
• ընտրել «Ուղարկել դիմում հարցում կամ բողոք» բաժինը,
• նույնականացվել «ԵսԵմ» նույնականացման հարթակում կամ գրանցվել կայքում,
• լրացնել դիմումի ձևը, կցել համապատասխան փաստաթղթերը և հանձնել դիմումը։ 

Ծրագրի մասին

• Միանվագ դրամական աջակցությունը տրամադրվում է ձեռք բերվող բնակարանի արժեքի 5%-ի չափով, բայց չի կարող 1 մլն դրամից ավելի լինել։
• Աջակցությանը 3-րդ և հաջորդ յուրաքանչյուր երեխայի համար ավելանում է բնակարանի արժեքի 5%-ի չափով, բայց ոչ ավելի, քան 500,000 դրամը։
• Աջակցության առավելագույն չափը 2 մլն դրամ է։
• Եթե շահառուն հիպոթեքային վարկով բնակելի անշարժ գույքը ձեռք է բերում կամ անհատական բնակելի տունը կառուցում է սահմանամերձ կամ այնպիսի գյուղական բնակավայրում, որտեղ կառուցվում են դպրոցներ կամ մանկապարտեզներ, ապա աջակցությունն ավելացվում է 50%-ով։

Ներկայացվող պահանջները

Ծրագրից կարող են օգտվել այն քաղաքացիները, որոնք բավարարում են հետևյալ պարտադիր պայմաններին․

• շահառուն պետք է լինի ՀՀ քաղաքացի և լինի հիպոթեքային վարկը մարողը՝ վարկառուն,
• նա պետք է ունենա առնվազն 2 անչափահաս երեխա,
• մարզային բնակավայրում գտնվող բնակելի անշարժ գույքը պետք է ձեռք բերված լինի կամ անհատական բնակելի տուն կառուցելու նպատակով հիպոթեքային վարկը տրամադրված լինի 2024 թվականի հունվարի 1-ին կամ դրանից հետո,
• ձեռք բերվող անշարժ գույքի կամ կառուցվող շենքից բնակարան գնելու իրավունքի ձեռքբերման գինը, գնահատված շուկայական գինը կամ նախահաշվային գինը պետք է լինի առավելագույնը 35 մլն դրամ, որը շահառուի 3-րդ և հաջորդ յուրաքանչյուր երեխայի հաշվով 5 մլն դրամով ավելանում է,
• կանխավճարի նվազագույն չափը պետք է լինի (առանց ծրագրի շրջանակներում տրամադրվող աջակցության)՝ երկրորդային շուկայից ձեռք բերվող բնակելի անշարժ գույքի արժեքի առնվազն 10 տոկոսը (բացառությամբ այն դեպքերի, երբ աջակցությունը տրամադրվում է անհատական բնակելի տուն կառուցելու նպատակով հիպոթեքային վարկ ստացած շահառուին) և առաջնային շուկայից ձեռք բերվող բնակելի անշարժ գույքի արժեքի առնվազն 7,5 տոկոսը (բացառությամբ, եթե աջակցությունը տրամադրվում է անհատական բնակելի տուն կառուցելու նպատակով հիպոթեքային վարկ ստացած շահառուին),
• ձեռք բերվող բնակելի անշարժ գույքի կամ կառուցվող անհատական բնակելի տան նկատմամբ սեփականության իրավունքը պետք է գրանցվի շահառուի կամ նրա ամուսնու (եթե առկա է գրանցված ամուսնություն) անունով,
• ձեռք բերվող կամ կառուցվող բնակելի անշարժ գույքը պետք է լինի շահառուին, գրանցված ամուսնության առկայության դեպքում նաև նրա ամուսնուն անձնական կամ ընդհանուր համատեղ կամ ընդհանուր բաժնային սեփականության իրավունքով (50 տոկոս և ավելի մասնաբաժնով) պատկանող միակ բնակելի անշարժ գույքը։

Պահանջվող փաստաթղթերը

Անհրաժեշտ փաստաթղթերի ցանկը սահմանում է բանկը կամ վարկային կազմակերպությունը։

Հղում օրենսդրությանը

ՀՀ Կառավարության 14 մայիսի 2020 թվականի N 968-Լ որոշում

Որոշումը հնարավոր է գտնել arlis.am կայքում։