Ծրագրի մասին

Այս աջակցության շրջանակում իրականացվում են՝

• ատամի հեռացում, պուլպիտի բուժում (նյարդերի և արյունատար անոթների բորբոքում),
• պերիօդոնտիտի բուժում,
• կարիեսի բուժում,
• մինչև 18 տարեկան երեխաների լորձաթաղանթի հիվանդությունների բուժում, լրիվ կամ մասնակի շարժական թիթեղային պրոթեզի, պրոթեզավորման համար անհրաժեշտ ատամնաշապիկի պատրաստում, տեղադրում և վերանորոգում (յուրաքանչյուր 3 տարին մեկ անգամ)։
  
  

Ներկայացվող պահանջները

Ստոմատոլոգիական բժշկական օգնությունը և սպասարկումը անվճար ստանլու համար պետք է լինել` 

• ընտանեկան նպաստի համակարգում ընդգրկված 28.01 և ավելի բարձր անապահովության միավոր ունեցող նպաստառու,
• հաշմանդամություն ունեցող՝ ֆունկցիոնալության խորը աստիճանի սահմանափակումով, կամ 1-ին խմբի հաշմանդամություն ունեցող անձ,
• մինչև 7 տարեկան երեխա,
• մինչև 18 տարեկան սոցիալապես անապահով և առանձին (հատուկ) խմբերում ընդգրկված երեխա,
• նախազորակոչային և զորակոչային տարիքի անձ,
• Լեռնային Ղարաբաղից բռնի տեղահանված անձ:
   

Համավճարով բժշկական օգնություն և սպասարկում ստանալու համար պետք է լինել սոցիալապես անապահով ու առանձին (հատուկ) խմբերում ընդգրկված՝ 

• հաշմանդամություն ունեցող անձ՝ ֆունկցիոնալության ծանր, միջին աստիճանի սահմանափակումով, 2-րդ կամ 3-րդ խմբի հաշմանդամությամբ,
• Հայրենական մեծ պատերազմի մասնակից, 
• վերարտադրության տարիքի կին՝ հղիության, ծննդաբերության և հետծննդյան շրջանում,
• առանց ծնողական խնամքի մնացած երեխա` մինչև 18 տարեկան, և առանց ծնողական խնամքի մնացած երեխաների թվին պատկանող անձ` 18-23 տարեկան,
• 65 տարեկան և ավելի բարձր տարիքի անձ,
• զինծառայող և նրանց հավասարեցված անձ, նրա ընտանիքների անդամներ, ՀՀ պաշտպանության ժամանակ, ինչպես նաև ծառայողական պարտականությունները կատարելիս զոհված զինծառայողների ընտանիքների անդամներ, երկարամյա ծառայության կամ հաշմանդամության զինվորական կենսաթոշակ ստանալու իրավունք ունեցող նախկին զինծառայող,
• փրկարարական ծառայող և նրա ընտանիքի անդամ, կենսաթոշակի անցնելու կապակցությամբ ազատված կամ հաշմանդամություն ձեռք բերած փրկարարական ծառայող, ծառայության ընթացքում զոհված փրկարարական ծառայողի ընտանիքի անդամներ,
• ձերբակալվածներ, կալանավորված անձինք և ազատազրկման դատապարտվածներ,
• բնակչության սոցիալական պաշտպանության հաստատությունների և ժամանակավոր օթևանների շահառուներ,
• բռնադատվածներ,
• Չեռնոբիլի ատոմակայանի վթարի վերացման աշխատանքների մասնակիցներ,
• մարդկանց շահագործման (թրաֆիքինգի) ենթարկված անձինք,
• հաշմանդամություն ունեցող անձանցից բաղկացած ընտանիքների երեխաներ` մինչև 18 տարեկան,
• բազմազավակ (մինչև 18 տարեկան 4 և ավելի անչափահաս երեխաներ ունեցող) ընտանիքների երեխաներ,
• մինչև 18 տարեկան` շարունակական հսկողության տակ գտնվող երեխաներ,
• մեկ ծնող ունեցող մինչև 18 տարեկան երեխաներ, 
• ապաստան հայցողներ ու նրանց ընտանիքների անդամներ,
• ՀՀ օլիմպիական և օլիմպիական ընտանիքի մարզաձևերի ազգային հավաքականների անդամներ:

Պահանջվող փաստաթղթերը

Անվճար և համավճարով ատամնաբուժական ծառայություններ ստանալու համար անհրաժեշտ է ներկայացնել․

• անձնագիր կամ նույնականացման քարտ,
• հանրային ծառայությունների համարանիշ (ՀԾՀ),
• բնակչության սոցիալապես անապահով ու առանձին (հատուկ) խմբերի ցանկում ընդգրկված խմբերից որևէ մեկին պատկանելիության փաստը հավաստող համապատասխան փաստաթուղթ: