Զբաղվածության ծրագրից օգտվելու համար անհրաժեշտ է դիմել Միասնական սոցիալական ծառայության ցանկացած տարածքային կենտրոն՝ ներկայացնելով տեղեկատվություն կրթության կամ մասնագիտական փորձի վերաբերյալ։

Ծրագրի մասին

Ծրագրի շրջանակում առաջարկվում է 3 տեսակի աջակցություն։

Աջակցություն 1 - Մասնագիտական ուսուցում և աշխատանքի տեղավորում

• Մասնագիտական ուսուցումը կարող է տևել մինչև 6 ամիս և կազմակերպվում է գործատուի կողմից առաջարկված ուսումնական հաստատությունում կամ գործատուի մոտ, եթե վերջինս համապատասխանում է ուսուցումն իրականացնելու համար անհրաժեշտ պայմաններին։
• Մասնագիտական ուսուցումն ավարտելուց հետո դիմող անձի և գործատուի միջև կնքվում է առնվազն 3-ամսյա ժամկետով աշխատանքային պայմանագիր։
  
  

Աջակցություն 2 - Վճարվող աշխատանքային փորձ և աշխատանքի տեղավորում

• Այս աջակցության շրջանակում դիմող անձի և գործատուի միջև կնքվում է աշխատանքային պայմանագիր՝ առնվազն 6 ամիս ժամկետով։
• Առաջին 3 ամիսն ուղղվում է դիմողի՝ աշխատանքային փորձ ձեռք բերելուն։
• Աշխատանքային փորձ ձեռք բերելուց հետո անձը մյուս 3 ամսվա ընթացքում շարունակում է աշխատել գործատուի մոտ՝ կիրառելով ձեռք բերված գիտելիքները։
  
  

Աջակցություն 3 - Մասնագիտական ուսուցում, վճարվող աշխատանքային փորձ և աշխատանքի տեղավորում

• Մասնագիտական ուսուցումը կարող է տևել մինչև 6 ամիս և կազմակերպվում է գործատուի կողմից առաջարկված ուսումնական հաստատությունում կամ գործատուի մոտ, եթե վերջինս համապատասխանում է ուսուցումն իրականացնելու համար անհրաժեշտ պայմաններին։
• Մասնագիտական ուսուցումն ավարտելուց հետո դիմողի և գործատուի միջև կնքվում է առնվազն 6-ամսյա ժամկետով աշխատանքային պայմանագիր։
• Առաջին 3 ամիսն ուղղվում է դիմողի՝ աշխատանքային փորձ ձեռք բերելուն։
• Աշխատանքային փորձ ձեռք բերելուց հետո անձը մյուս 3 ամսվա ընթացքում շարունակում է աշխատել գործատուի մոտ՝ կիրառելով ձեռք բերված գիտելիքները։
  
  

Ներկայացվող պահանջները

• Ծրագրի շահառու կարող են դառնալ միայն 2023 թվականին Լեռնային Ղարաբաղից բռնի տեղահանված 16-ից 63 տարեկան անձինք։
• Բանկային հաշիվ չունենալու դեպքում ուսուցման դասընթացում ընդգրկվելուց հետո անձը պետք է եռօրյա ժամկետում բացի բանկային հաշիվ և դրա վերաբերյալ տվյալները ներկայացնի Միասնական սոցիալական տարածքային կենտրոն։
• Ծրագրում որպես գործատու կարող են ներգրավվել բոլոր այն կազմակերպությունները (այդ թվում՝ հասարակական կազմակերպությունները), որոնք ունեն թափուր աշխատատեղեր` բացառությամբ հանրային ծառայություն իրականացնող պետական կառավարման համակարգի մարմինների։

Աջակցության չափը

Մասնագիտական ուսուցման համար աջակցությունը տրամադրվում է դիմող անձին, իսկ աշխատանքային փորձի և աշխատանքի տեղավորման համար՝ գործատուին հետևյալ կերպ․

• աշխատողին՝ ամսական առավելագույնը 50,000 դրամ կրթաթոշակ մասնագիտական ուսուցման համար (աջակցության չափը որոշվում է՝ ըստ ամսվա ընթացքում դասերին մասնակցած օրերի),
• աշխատողին՝ ամսական առավելագույնը 50,000 դրամ ուսման վարձի վճարման համար (աջակցության չափը որոշվում է՝ ըստ ամսվա ընթացքում դասերին մասնակցած օրերի),
• գործատուին՝ ամսական 50,000 դրամ՝ աշխատողի աշխատավարձից հաշվարկված հարկերը վճարելու համար (եկամտային հարկ, դրոշմանիշային վճար, սոցիալական վճար),
• գործատուին՝ ամսական 165,000 դրամ աշխատանքային փորձ ձեռք բերելու ամիսներին անձին աշխատավարձ վճարելու համար (աջակցության չափը որոշվում է՝ ըստ ամսվա ընթացքում լրիվ աշխատած օրերի): Ընդ որում՝ եթե աշխատողը գտնվում է ժամանակավոր անաշխատունակության կամ նպատակային արձակուրդում, տվյալ ժամանակահատվածների համար գործատուին փոխհատուցում չի տրամադրվում։

Ուշադրություն
Անձի հետ կնքված աշխատանքային պայմանագիրը մինչև դրա ժամկետի լրանալը լուծելու և նոր պայմանագիր չկնքելու դեպքում գործատուն պետք է Միասնական սոցիալական ծառայությանը վերադարձնի անձին ուսման վարձի փոխհատուցման համար կամ որպես կրթաթոշակ կամ աշխատավարձ վճարված գումարները։