Աջակցության ծրագրին դիմելու համար անհրաժեշտ է մինչև ջերմատան կառուցման աշխատանքների սկսելը դիմել ծրագրին մասնակից ֆինանսական կառույցներին (ցանկ) վարկ ստանալու նպատակով և ներկայացնել անհրաժեշտ փաստաթղթերը։

Ծրագիրը նախատեսված է իրականացնել մինչև 2026 թվականը։

Ծրագրի մասին

• Ջերմատնային տնտեսությունների զարգացման աջակցության ծրագրի շրջանակներում յուրաքանչյուր շահառուի ջերմատան կառուցման համար տրամադրվում է վարկ՝ առավելագույնը 15.0 մլրդ դրամի չափով,
• յուրաքանչյուր շահառուին տրամադրվող վարկի տոկոսադրույքը կսուբսիդավորվի ոչ ավելի, քան ֆինանսական կառույցի կողմից տրամադրված վարկի տոկոսադրույքի չափը։

Ներկայացվող պահանջները

• Ծրագրի շահառու դառնալու համար անհրաժեշտ է լինել ջերմատան կառուցման աշխատանքներ իրականացնող անձ և բավարարել Ֆինանսական կառույցի վարկունակության պահանջներին։
• Յուրաքանչյուր շահառուի կողմից կառուցվող յուրաքանչյուր մեկ ամբողջական ջերմատան մակերեսը պետք է կազմի 1 հա և ավելի։
• Վարկի առավելագույն հանրագումարի շրջանակում յուրաքանչյուր շահառու պետք է վարկավորվի միայն մեկ ֆինանսական կառույցի կողմից։

Պահանջվող փաստաթղթերը 

• Անձը հաստատող փաստաթղթի պատճենը,
• անշարժ գույքի սեփականության կամ հողամասի կառուցապատման իրավունքի պետական գրանցման վկայականի պատճենը, որում ամրագրված է, որ հողամասի նպատակային նշանակությունը արդյունաբերության, ընդերքօգտագործման և այլ արտադրական նշանակության օբյեկտների, իսկ գործառնական նշանակությունը գյուղատնտեսական արտադրական օբյեկտների է։
• Հողամասը կառուցապատման իրավունքով տրամադրված լինելու դեպքում ներկայացվում է նաև հողամասի կառուցապատման իրավունքի պայմանագիրը։
  Ընդ որում, հողամասի կառուցապատման իրավունքի ժամկետը պետք է լինի առնվազն 10 տարի՝ վարկային պայմանագիրն ուժի մեջ մտնելու պահից հաշված։
• Համասեփականատերերի առկայության դեպքում ներկայացվում է նաև նոտարական կարգով վավերացված անշարժ գույքի սեփականատիրոջ (համասեփականատերերի) համաձայնությունը՝ ջերմատան կառուցման համար,
• ծրագրի պահանջներին համապատասխանող ջերմատան նախագիծը,
• նախագիծը թողարկող պատասխանատուի երաշխավորագիրը` ծրագրի պահանջներին նախագծի համապատասխանության վերաբերյալ,
• համաձայնագիր՝ ծրագրի շրջանակում շահառուի մասին տեղեկությունները նախարարությանը կամ այլ պետական մարմնին փոխանցելու մասին։

Աջակցության չափը

Աջակցության ծրագրի շրջանակներում շահառուին ջերմատան կառուցման համար տրամադրվում է վարկ՝ առավելագույնը 15 մլրդ դրամի չափով։

Տրամադրվող վարկի տոկոսադրույքը կսուբսիդավորվի՝

• տրամադրվող վարկի մինչև 3 մլրդ (ներառյալ) դրամ գումարի մասնաբաժինը՝ 10 տոկոսային կետով,
• տրամադրվող վարկի 3 մլրդ դրամից ավել մինչև 9 մլրդ (ներառյալ) դրամ գումարի մասնաբաժինը՝ 9 տոկոսային կետով, 
• տրամադրվող վարկի 9 մլրդ դրամից ավել մինչև 15 մլրդ (ներառյալ) դրամ գումարի մասնաբաժինը՝ 8 տոկոսային կետով։

Օրինակ՝ Եթե տրամադրվող վարկի չափը մինչև 3մլրդ է, ապա վարկը բանկի կողմից 13%-ով տրամադրվելու դեպքում պետության կողմից կսուբսիդավորվի 13%-ից 10%-ը, իսկ մյուս 3%-ը պետք է մարի շահառուն։ 

Տրամադրման տևողությունը և կարգը

• վարկի տրամադրման մասին շահառուն տեղեկացվում է 25 աշխատանքային օրվա ընթացքում, իսկ եթե շահառուի հայտը չի համապատասխանում ծրագրի պահանջներին, ապա նրան դրա մասին տեղեկացնում են 3 աշխատանքային օրվա ընթացքում։ 

Ընդ որում՝

• վարկի մարման առավելագույն ժամկետը 8 տարի է,
• ջերմատան կառուցման համար սահմանված առավելագույն ժամկետը 1,5 տարի է,
• շահառուի դիմումով ֆինանսական կառույցը կարող է սահմանել վարկի մայր գումարի և տոկոսադրույքի համար արտոնյալ ժամկետ՝ առավելագույնը 12 ամիս,
• շահառուի և ֆինանսական կառույցի փոխադարձ համաձայնությամբ ֆինանսական կառույցը կարող է սահմանել վարկի մայր գումարի և տոկոսադրույքի վճարման համար դադարի շրջաններ` տարեկան մինչև 3 ամիս ժամկետով,
  
  

Ուշադրություն
Այս ծրագրի շահառուները նույն հողամասի վրա նույն աշխատանքների իրականացման համար չեն կարող օգտվել ագրոպարենային ոլորտում իրականացվող պետական աջակցության այլ ծրագրերից։

Հղում օրենսդրությանը

• ՀՀ Կառավարության 27 հուլիսի 2023 թվականի N 1284-Լ որոշում
• ՀՀ Կառավարության 6 փետրվարի 2025 թվականի N 122-Լ որոշում

Որոշումները հնարավոր է գտնել arlis.am-ում (անհրաժեշտ է կարդալ ամենավերջին փոփոխված տարբերակները)