Ծրագրի մասին

Ծրագրով նախատեսվում է հիմնել 3 տիպի խեցգետինների բուծման համալիրներ.

• Փոքր՝ 460 քմ շինությունների ընդհանուր մակերեսով, 6 տոննա հզորությունով արդյունաբերական խեցգետնաբուծարան, համալիրի ներդրումների և արտադրական ծախսերի առավելագույն ցուցանիշը՝ 72000 հազար դրամ:
• Միջին՝ 800 քմ շինությունների ընդհանուր մակերեսով,  12  տոննա հզորությունով արդյունաբերական խեցգետնաբուծարան, համալիրի ներդրումների և արտադրական ծախսերի առավելագույն ցուցանիշը՝ 129900 հազար դրամ:
• Խոշոր՝ 1000 քմ շինությունների ընդհանուր մակերեսով, 18 տոննա հզորությունով արդյունաբերական խեցգետնաբուծարան, համալիրի ներդրումների և արտադրական ծախսերի առավելագույն ցուցանիշը՝ 183790 հազար դրամ:

Ծրագրով կանխատեսվում է յուրաքանչյուր տարի հիմնել 4 փոքր և 1-ական միջին և  խոշոր խեցգետնաբուծական համալիր։ 

Ուշադրություն

Ծրագրի շրջանակներում պետական աջակցությունն իրականացվելու է 2024-2026 թվականներին, ծախսերի մասնակի փոխհատուցման եղանակով փոխհատուցելով ներդրումների համար կատարված ծախսերի 50%-ը (ոչ ավելի, քան յուրաքանչյուր ծախսային հոդվածի համար սահմանված արժեքի 50%-ը)։

Ներկայացվող պահանջները

Ծրագրից օգտվելու համար անհրաժեշտ է՝

• ունենալ բարվոք վարկային պատմություն, այսինքն, ըստ ԱՔՐԱ տեղեկատվության, նախորդող 12 ամիսների ընթացքում չունենալ գումարային 60 օր և ավելի ժամկետով ժամկետանց վարկային պարտավորություններ,
• ունենալ բարվոք հարկային պատմություն (նախորդող 365 օրերի ընթացքում չկատարված հարկային պարտավորությունները գանձելու վերաբերյալ վարչական վարույթ հարուցված չէ, կամ չկա ժամկետանց հարկային պարտավորություններ)։

Պահանջվող փաստաթղթերը

Ծրագրից օգտվելու համար անհրաժեշտ է ներկայացնել՝

• անձը հաստատող փաստաթղթի պատճենը,

• անշարժ գույքի նկատմամբ սեփականության վկայականի պատճենը, եթե լրացուցիչ կառուցապատում է իրականացվել, ապա կառուցապատման իրավունքի պետական գրանցման վկայականի պատճենը կամ վարձակալության պայմանագրի պատճենը,

• եթե անշարժ գույքի նկատմամբ գրանցված իրավունքն ընդհանուր համատեղ կամ ընդհանուր բաժնային սեփականություն է, ապա անշարժ գույքի համասեփականատիրոջ համաձայնությունը՝ նոտարական վավերացմամբ,

• բարվոք վարկային պատմության վերաբերյալ ԱՔՐԱ տեղեկատվություն,

• հարկային պարտավորությունների վերաբերյալ տեղեկանք,

• մատակարարի հետ կնքված պայմանագիր՝ խեցգետնաբուծական համալիրի ամբողջական սարքավորումները, անհրաժեշտ գույքը, ինչպես նաև նստեցման համար մատղաշ խեցգետնիկներ և աճեցման համար մայրական կազմի առանձնյակներ մատակարարելու վերաբերյալ,

• շինարարության թույլտվություն, եթե նախատեսվում է շինարարություն,

• ծրագրով ներկայացված համալիրի չափորոշիչներին համապատասխանող ճարտարապետաշինարարական նախագիծ․ նոր կառուցվող շինությունների կամ վերակառուցման դեպքում՝ համապատասխան Կառավարության 2015 թվականի մարտի 19-ի N 596-Ն որոշման պահանջներին (որոշումը հնարավոր է գտնել arlis.am-ում),

• ջրամատակարարող ընկերության հետ կնքված ջրօգտագործման պայմանագիր։

Տրամադրման ժամկետը և կարգը

Դիմումը և անհարժեշտ փաստաթղթերը Էկոնոմիկայի նախարարություն ներկայացնելուց հետո նախարարությունը 3 աշխատանքային օրվա ընթացքում ուսումնասիրում է փաստաթղթերի ամբողջականությունը և դիմողին տեղեկացնում դրա վերաբերյալ։

Փաստաթղթերի ամբողջական չլինելու, կամ դրանցում սխալների առկայության դեպքում դիմողին առաջարկվում է 5 աշխատանքային օրվա ընթացքում համալրել անհրաժեշտ փաստաթղթերը կամ շտկել սխալները։

Փաստաթղթերի փաթեթն ամբողջականացնելուց հետո 5 աշխատանքային օրվա ընթացքում դիմումատուին գրավոր տեղեկացվում է պայմանագիր կնքելու վերաբերյալ։

Փաստաթղթերի համապատասխանության դեպքում նախարարության և դիմողի միջև 15 օրվա ընթացքում կնքվում է պայմանագիր։

Մինչև փոխհատուցումը, նախարարության ներկայացուցիչն իրականացնում է տեղազննություն՝ սարքավորումները, անհրաժեշտ գույքը, խեցգետնադրման համար մատղաշ խեցգետնիկները և աճեցման համար մայրական կազմի առանձնյակները ստանալու, ինչպես նաև շինարարական մոնտաժային աշխատանքներն ավարտելու և համալիրը շահագործելու փաստերն ուսումնասիրելու նպատակով՝ կազմելով տեղազննության արձանագրություն։

Ծրագրի շրջանակներում հնարավոր չէ օգտվել գյուղատնտեսության ոլորտում իրականացվող պետական օժանդակության այլ ծրագրերից, իսկ յուրաքանչյուր շահառու կարող է ստանալ միայն մեկ միավոր խեցգետնաբուծական համալիրի համար նախատեսված ծախսերի փոխհատուցում։

Հղում օրենսդրությանը

• ՀՀ կառավարության 2023 թվականի ապրիլի 13-ի N 532-L որոշում

• ՀՀ կառավարության 2015 թվականի մարտի 19-ի N 596-Ն որոշում

Իրավական ակտերը հնարավոր է գտնել arlis.am-ում։