Ծրագրի մասին

Ծրագիրն իրականացվում է 2026-2027 թվականների ընթացքում և նախատեսված է 1-2 միլիոն դրամ գումարի չափով վարկավորման համար։ Վարկը տրամադրվում է մինչև 3 տարի (36 ամիս) մարման ժամկետով, որից առաջին 6 ամիսը սահմանվում է որպես պարտադիր արտոնյալ ժամանակահատված։ Այդ ընթացքում շահառուն ազատված է թե՛ մայր գումարի և թե՛ տոկոսագումարների վճարումից, ինչը հնարավորություն է ընձեռում արդյունավետ կազմակերպել գործունեությունը նախքան մարումները սկսելը։

Ինչպե՞ս դիմել

Ծրագրից օգտվելու համար անհրաժեշտ է անձամբ այցելել ծրագրի գործընկեր ֆինանսական կառույցներից (բանկեր կամ վարկային կազմակերպություններ) որևէ մեկի մասնաճյուղ։ Այցելության ընթացքում իրականացվում են հետևյալ գործողությունները.

• Վարկային հայտի լրացում տեղում՝ մասնագետի օգնությամբ։

• Անհրաժեշտ փաստաթղթերի և տվյալների ներկայացում ֆիզիկական տարբերակով։

• Վարկունակության գնահատումից հետո վարկային պայմանագրի ստորագրում բանկի մասնաճյուղում։

Ներկայացվող պահանջները

• Վարկային միջոցների նպատակային օգտագործում բացառապես ագրոպարենային ոլորտում (բուսաբուծություն, անասնապահություն, վերամշակում)։

• Վերջին 12 ամսվա ընթացքում 60 օրից ավելի հանրագումարային ժամկետանց պարտավորությունների բացակայություն։

• Բոլոր գնումների և վճարումների իրականացում բացառապես անկանխիկ եղանակով (փոխանցումներով)։

• Նույն շահառուի վարկավորում միայն մեկ ֆինանսական կառույցի կողմից։

Պահանջվող փաստաթղթերը և տվյալները

• Անձը հաստատող փաստաթուղթ (անձնագիր կամ նույնականացման քարտ)։

• Ծրագիր-տեղեկանք վարկային միջոցների ծախսման ուղղությունների վերաբերյալ։ Դիմումի այս ձևաչափը սահմանվում է տվյալ ֆինանսական կառույցի կողմից։

• Տվյալներ գյուղատնտեսական գործունեության իրականացման վայրի և տեսակի վերաբերյալ։

• Համայնքի կամ բնակավայրի վարչական ղեկավարի կողմից տրամադրված տեղեկանք ագրոպարենային ոլորտում զբաղված լինելու մասին։

Աջակցության չափը

• Տոկոսադրույք. 0% շահառուի համար (պետությունը սուբսիդավորում է բանկի սահմանած մինչև 14% տոկոսադրույքը)։

• Լրացուցիչ վճարներ. Ֆինանսական կառույցի կողմից վարկի սպասարկման կամ այլ ծառայությունների համար լրացուցիչ վճարների բացակայություն։

Տրամադրման ժամկետը և կարգը

• Հաղորդակցում. Վարկային հայտի հաստատումից հետո ֆինանսական կառույցը 5 աշխատանքային օրվա ընթացքում տվյալները ներկայացնում է լիազոր մարմնին (նախարարությանը)։

• Տրամադրում. Վարկը տրամադրվում է պայմանագրի կնքումից հետո՝ բացառապես անկանխիկ եղանակով։

• Օգտագործում. Վարկային միջոցները շահառուի կողմից պետք է օգտագործվեն վարկի ստացման պահից սկսած 6 ամսվա ընթացքում։

• Սուբսիդավորման դադարեցում. Վճարումների 60 օրից ավելի ուշացման կամ միջոցների ոչ նպատակային օգտագործման դեպքում պետական սուբսիդավորումը դադարեցվում է, և վարկի տոկոսների վճարման պարտավորությունը փոխանցվում է շահառուին։

Հղում օրենսդրությանը

ՀՀ կառավարության 2026 թվականի ապրիլի 9-ի N 468-Լ որոշում