2025 թվականի սեպտեմբերի 1-ից վարորդական քննությունների վերահանձնման գործընթացում փոփոխություններ են նախատեսվում։

Ներկայումս վարորդական վկայական ստանալու քննությունից բացասական գնահատական ստանալու դեպքում քաղաքացին կարող է կրկին հերթագրվել քննությանը 1 շաբաթ անց: Սակայն դիմողների մեծ թվով պայմանավորված՝ բազմաթիվ դիմումների հիման վրա որոշվել է ներդնել արագացված ծառայություն՝ հավելյալ վճարի դիմաց:

Նոր կարգի համաձայն՝ եթե քաղաքացին բացասական գնահատականը ստացել է առաջին անգամ, ապա նա կկարողանա քննությունը վերահանձնել՝

• հաջորդ օրը՝ վճարելով 45,000 դրամ, 
• 3-րդ օրը՝ վճարելով 30,000 դրամ:

Սա հավելյալ հնարավորություն է, և հերթագրման ստանդարտ 7-օրյա ժամկետը պահպանվում է:

Ընդ որում՝ երկրորդ և յուրաքանչյուր հաջորդ անգամ բացասական գնահատական ստանալու դեպքում քաղաքացին կկարողանա քննությունը վերահանձնելու համար հերթագրվել՝

• երկրորդ անգամ բացասական գնահատական ստանալու դեպքում՝ քննության 7-րդ օրը,
• յուրաքանչյուր հաջորդ անգամ բացասական գնահատական ստանալու դեպքում՝ քննության 14-րդ օրը:

Հիշեցնենք, որ նշված բոլոր փոփոխություններն ուժի մեջ կմտնեն 2025 թվականի սեպտեմբերի 1-ից։

Վարորդական իրավունքի ստացման, տրամադրման, վերաթողարկան, տեսական և գործնական քննությունների վերաբերյալ մանրամասները ներկայացված են «Ունենալ և վարել ավտոմեքենա» կյանքի իրադարձության ուղեցույցում։