2025 թվականի փետրվարի 1-ից անհուսալի վարկեր ունեցող անձինք կարող են դիմել անհուսալի վարկերի մարման աջակցություն ստանալու համար։ Վարկերի անհուսալիության ժամկետը պետք է լինի նվազագույնը 3 տարի, իսկ դրանց մայր գումարները միասին չպետք է գերազանցեն 1 միլիոն դրամը։ Աջակցությունից օգտվելու համար անհրաժեշտ է լինել գրանցված աշխատող։

Այն անձինք, որոնց վարկերի հանրագումարը գերազանցում է 1 միլիոն դրամը, կարող են օգտվել աջակցությունից, եթե մինչև ծրագրին դիմելը այդ հանրագումարը նվազեցնեն մինչև 1 միլիոն դրամ։

Շահառու դառնալու դեպքում աջակցությունը կտրամադրվի հետևյալ կերպով․

• անձի եկամտային հարկը կուղղվի նրա վարկային պարտավորության մարմանը,

• աշխատավարձից նախկին 50%-ի փոխարեն կբռնագանձվի 20%-ը (հարկադիր),

• բանկերը մինչև 80%-ի չափով կզիջեն վարկերի գծով առաջացած տույժերը և տուգանքները:

Ֆինանսական աջակցությունը կտրամադրվի դիմելուն հաջորդող ամսվա 1-ից՝ առավելագույնը 24 ամիս ժամկետով։

Ծրագրի շրջանակներում փետրվարի 1-ից գործարկվելու է թվային հարթակ, որի միջոցով անձը կարող է առցանց ներկայացնել իր դիմումը։