Բնակարանի գնման իրավունքի պայմանագիրը․

• եռակողմ է, ստորագրվում է գույքը ձեռք բերողի, բանկի և կառուցապատողի միջև,
• իրավական առումով համարժեք է բնակարանի առուվաճառքի պայմանագրին,
• սահմանում է շենքի կառուցման ավարտից հետո անշարժ գույքը սեփականության իրավունքով հանձնելու կառուցապատողի պարտավորությունը, իսկ պայմանագրի լուծման դեպքում՝ կառուցապատողի կողմից կանխավճարի վերադարձման ձևը:

Բնակարանի գնման իրավունքը գրանցելու համար անհրաժեշտ է ներկայացնել․

• անձնագիր կամ նույնականացման քարտ,
• բնակարանի գնման իրավունքի ձեռքբերման պայմանագիրը (տրամադրվում է կառուցապատողի կողմից),
• պետական տուրքի վճարման կտրոնը։

Բնակարանաի գնման իրավունքի գրանցման համար գանձվում է պետական գրանցման ծառայության վճար՝ 50,000 դրամ, պետական տուրքի վճար՝ 3,000 դրամ։ Իրավունքի վկայականը տրամադրվում է 4 աշխատանքային օրվա ընթացքում։

Ցանկության դեպքում գրանցումը կարող ես կատարվել նաև արագացված կարգով՝ հավելավճարի դիմաց․

• 100,000 դրամ՝ 3 աշխատանքային օրում,
• 150,000 դրամ՝ 2 աշխատանքային օրում,
• 300,000 դրամ՝ 2 ժամում։

Բնակարանի գնման իրավունքի պետական գրանցման մասին ծանուցումն ուղարկվում է դիմումի մեջ նշված էլեկտրոնային փոստի հասցեին և հեռախոսահամարին, իսկ գնման իրավունքի վկայականը՝ էլեկտրոնային փոստի հասցեին դիմումից հետո 4 աշխատանքային օր անց։

Ծանուցմամբ նշվում են իրավունքի գրանցման համարը և գաղտնաբառը, որոնց միջոցով Կադաստրի կոմիտեի կայքում կարող ես առցանց ստուգել նշված գույքի վերաբերյալ տեղեկատվությունը։

Վկայականը ստանալուց հետո դու կարող ես՝ 

• սեփականության հիմքով գրանցվել տվյալ հասցեում՝ այն նշելով որպես բնակության վայր, կամ թույլ տալ, որպեսզի այլ անձինք գրանցվեն տվյալ հասցեում,
• դիմել կոմունալ ծառայությունների համապատասխան գրասենյակներ՝ բաժանորդ դառնալու համար, որից հետո կկարողանաս կատարել կոմունալ վճարումները, 
• բնակարանը վաճառել, վարձակալությամբ տրամադրել կամ կատարել սեփականության իրավունքից բխող այլ գործողություններ։   

Միանվագ վճարման միջոցով բնակարանը ձեռք բերելու դեպքում վաճառքի պայմանագիրը կնքելուց հետո անմիջապես կարող ես դիմել սեփականության իրավունքը գրանցելու համար։ Դա կարող ես կատարել Կադաստրի կոմիտեում կամ նոտարական գրասենյակում։

Նկատի ունեցիր, որ նոտարական գրասենյակ դիմելու դեպքում գործընթացքը կարող է տևել ավելի երկար, քան օրենքով սահմանված ժամկետն Է (3 աշխատանքային օր)։   

Բնակարանը հիպոթեքային վարկով նորակառույց շենքում ձեռք բերելու դեպքում դու պետք է սպասես, մինչև կառուցապատողը շենքի կառուցումն ավարտի և համապատասխան մարմնից ստանա ավարտական ակտը (շահագործման թույլտվություն), որից հետո կարող ես արդեն դիմել նոտարական գրասենյակ բնակարանի սեփականության վկայականը ստանալու համար։

Սովորաբար կառուցապատող ընկերությունն ինքն է պայմանավորվում նոտարական գրասենյակների հետ և քեզ տեղեկացնում է սեփականության իրավունքի գրացման տեղի և ժամկետների մասին։

Սեփականության իրավունքի գրանցման մանրամասների վերաբերյալ տեղեկություններ ստանալու համար հետևողականորեն կապ պահպանիր քո բնակարանի կառուցապուտումն իրականացնող ընկերության հետ։

Երկրորդային շուկայից հիպոթեքային վարկով ձեռք բերված բնակարանի նկատմամբ սեփականության իրավունքի փոխանցման պայմանագիրը պետք է կնքել և վավերացնել նոտարական գրասենյակում, այնուհետև այն գրանցել Կադաստրի կոմիտեում։

Նոտարական գրասենյակում բնակարանի սեփականության իրավունքի պայմանագիրը կնքելու համար անհրաժեշտ է ներկայացնել․

• անձնագիր կամ նույնականացման քարտ,
• բնակարանի գնման իրավունքի վկայականը,
• ծառայության վճարման անդորրագիրը։

Պահանջվող փաստաթղթերի վերաբերյալ անհրաժեշտ տեղեկատվությունը կարող ես ստանալ կառուցապատող ընկերությունից․ հնարավոր է, որ հավելյալ փաստաթղթեր ներկայացնելու անհրաժեշտություն առաջանա։