Նվագարանի ժամանակավոր արտահանման վկայական ստանալու համար անհրաժեշտ է դիմել ՀՀ կրթության, գիտության, մշակույթի և սպորտի նախարարության «Մշակութային արժեքների պահպանության գործակալություն»՝ ներկայացնելով պահանջվող փաստաթղթերի փաթեթը։

Ներկայացվող պահանջները

Նվագարանի ժամանակավոր արտահանման վկայականը տրամադրվում է՝

• սահմանված կարգով անհրաժեշտ փաստաթղթերի և նվագարանի ներկայացման դեպքում,
• նվագարանի՝ կորած, գողացված, հափշտակված արժեքների ցանկում չլինելու դեպքում,
• փորձագիտական եզրակացություն ներկայացնելու դեպքում (առանձնակի դեպքերում)։ 
  
  

Պահանջվող փաստաթղթերը

Նվագարանի ժամանակավոր արտահանման վկայական ստանալու համար անհրաժեշտ է ներկայացնել՝

• հայտ,
• նվագարանի փորձագիտական եզրակացության բնօրինակն ու պատճենը՝ բացառությամբ մինչև 75 տարվա վաղեմություն ունեցող թվակիր մշակութային նշանակության առարկա համարվող նվագարանների,
• նվագարանի` դիմացի ամբողջական տեսքով 2 գունավոր լուսանկար՝ 10x15 սմ չափսի, աղեղնային նվագարանների դեպքում՝ նաև դրանց հակառակ կողմի ամբողջական տեսքով 2 գունավոր լուսանկար (գործարանային համարանիշ ունեցող փողային նվագարանների դեպքում լուսանկար չի պահանջվում)։ 
  
  

Վճարման չափը և կարգը

Նվագարանի ժամանակավոր արտահանման վկայականը տրամադրվում է անվճար։

Տրամադրման ժամկետը և կարգը

• Հայտին կից ներկայացված փաստաթղթերի հիման վրա 1 աշխատանքային օրվա ընթացքում իրականացնում է հայտագրված առարկայի և հափշտակված, կորած, գողացված մշակութային առարկայի շտեմարանի տվյալների համեմատական ստուգում: 
• Նվագարանի գողացված չլինելու մասին տեղեկանքի հիման վրա 1 աշխատանքային օրվա ընթացքում քննարկվում և նախապատրաստվում է նվագարանը արտահանելու վերաբերյալ որոշումը։
• Մշակութային արժեքի արտահանման կամ ժամանակավոր արտահանման իրավունքի վկայագիրը տրամադրվում է 3 աշխատանքային օրվա ընթացքում։
• Արտահանման իրավունքի վկայագիրն ուժի մեջ է 1 տարի:
  
  

Հղում օրենսդրությանը

ՀՀ կառավարության՝ 2005 թվականի հունիսի 23-ի N 981-Ն որոշում

Որոշումը հնարավոր է գտնել arlis.am-ում։