Առցանց դիմելու համար անհրաժեշտ է՝

• առցանց գրանցվել Աշխատանքի թույլտվության էլեկտրոնային համակարգում որպես գործատու (հարթակում գործողություններ կարող են իրականացնել գործատուի գործադիր մարմնի կողմից լիազորված անձինք),
• «նոր դիմում» բաժնի «աշխատանքի թույլտվություն» պատուհանում լրացնել թափուր աշխատատեղին վերաբերող տեղեկատվությունը և հաստատել դիմումը։

15 աշխատանքային օրվա ընթացքում Աշխատանքի և սոցիալական հարցերի նախարարության կողմից կտրվի օտարերկրացուն աշխատանքի ընդունելու համաձայնություն։ 

Համաձայնությունը ստանալուց հետո անհրաժեշտ է միևնույն հարթակի «Ընթացիկ գործեր» բաժնում լրացնել օտարերկրացու տվյալները։

Հարթակում աշխատանքային թույլտվության դիմում կարելի է ներկայացնել նաև կամավորության սկզբունքով աշխատողների համար։ Այս դեպքում դիմումը ներկայացվում է դիմումների «Կամավոր» բաժնում։

Պահանջվող փաստաթղթերը

Կան որոշ դեպքեր, երբ աշխատանքի թույլտվությունը տրամադրվում է լրացուցիչ փաստաթղթերի հիման վրա։ Տվյալ դեպքերը թվարկված են դիմումի ներկայացման «Բացառությունների ցուցակում ընդգրկված մասնագիտություններ» բաժնում:

Ուշադրություն
ՀՀ-ում աշխատանքային գործունեություն իրականացնող ԵԱՏՄ անդամ պետությունների քաղաքացիները և նրանց ընտանիքի անդամներն ազատված են որևէ թույլատրող փաստաթուղթ ներկայացնելու պահանջից։ Այնուամենայնիվ, բնակության օրինականությունը հավաստելու նպատակով ԵԱՏՄ անդամ երկրների քաղաքացիները նույնպես դիմում են առցանց:

Վճարման չափը և կարգը

Օտարերկրացի աշխատակցի համար ժամանակավոր կացության քարտ թողարկելու վճարը կազմում է 105,000 դրամ։ Վճարումը կատարում է գործատուն կամ աշխատակիցը՝ ըստ ձեռք բերված համաձայնության։

Տրամադրման ժամկետը և կարգը

Կացության քարտը տրամադրվում է գործատուի դիմելուց հետո 2 ամսվա ընթացքում։

Օտարերկրացին ստանում է էլեկտրոնային նամակ՝ աշխատանքային գործունեության հիմքով իրեն ժամանակավոր կացության կարգավիճակի տրամադրման վերաբերյալ։ Կացության քարտը ստանալու համար վերջինս պետք է այցելի Վազգեն Սարգսյան 3 հասցեում գտնվող Հանրային ծառայությունների միասնական գրասենյակ (երկուշաբթիից ուրբաթ՝ 09։00-18։00, ընդմիջում՝ 14։00-15։00)։