Ծառայությունից օգտվելու համար անհրաժեշտ է ֆիզիկապես դիմել Միասնական սոցիալական ծառայության տարածքային կենտրոն՝ ներկայացնելով պահանջվող փաստաթղթերը։

Ծրագրի մասին

Ծրագիրն իրականացվում է 3 ուղղություններով։

1. Մասնագիտական ուսուցում (մինչև 5 ամիս)
 
Շահառուն ստանում է՝

• ուսման վարձի փոխհատուցում՝ ամսական մինչև 50,000 դրամ,
• կրթաթոշակ՝ ամսական 37,500 դրամ (նվազագույն աշխատավարձի 50%-ի չափով), ընդ որում՝ կրթաթոշակը տրամադրվում է մասնագիտական ուսուցման այն օրերի համար, որոնց անձը մասնակցել է։
  
  

Ուսման ավարտից հետո գործատուն պետք է շահառուի հետ կնքի 1 տարվա աշխատանքային պայմանագիր, որի համար գործատուն ստանում է ամսական մինչև 50,000 դրամ աջակցություն՝ հարկերի փոխհատուցման համար։

2. Աշխատանքային փորձառություն 

Շահառուի համար աշխատանքային փորձի ձեռքբերման գործընթաց ապահովելու դեպքում գործատուն ստանում է՝

• առաջին 3 ամիսների համար՝ ամսական 75,000 դրամ (նվազագույն աշխատավարձի չափով) շահառուի աշխատավարձի փոխհատուցում և ամսական մինչև 25,000 դրամ հարկերի փոխհատուցում,
• հաջորդ 9 ամիսների համար՝ ամսական մինչև 50,000 դրամ հարկերի փոխհատուցում։
  
  

3. Միանվագ փոխհատուցում

Գործատուն ստանում է միանվագ փոխհատուցում 300,000 դրամի չափով, եթե կնքում է առնվազն 1 տարվա աշխատանքային պայմանագիր շահառուի հետ։

Ուշադրություն
Շահառուն կարող է ծրագրում ընդգրկվել միայն մեկ անգամ՝ նշված աջակցության ուղղություններից միայն մեկով։

Ներկայացվող պահանջները

Ծրագրին դիմելու համար անհրաժեշտ է լինել Ադրբեջանի կողմից 2016, 2020 և 2022 թթ․ սանձազերծված ռազմական գործողությունների մասնակից կամ 2020 թվականից հետո ժամկետային պարտադիր զինվորական ծառայությունից զորացրված գործազուրկ քաղաքացի։

Պահանջվող փաստաթղթերը

Ծրագրին դիմելու համար անհրաժեշտ է զբաղվածության տարածքային կենտրոն ներկայացնել հետևյալ փաստաթղթերը.

• անձնագիր կամ նույնականացման քարտ,
• նույնականացման քարտ չունենալու դեպքում՝ Բնակչության պետական ռեգիստրի կողմից տրված տեղեկանք ՀԾՀ-ի (հանրային ծառայությունների համարանիշ) վերաբերյալ կամ ՀԾՀ չունենալու մասին, իսկ տեղեկանքի բացակայության դեպքում՝ սոցիալական քարտ,
• առկայության դեպքում՝ բուհի դիպլոմ կամ մասնագիտական որակավորումը հավաստող փաստաթուղթ,
• աշխատանքային գրքույկ, անհրաժեշտության դեպքում՝ ստաժը հաստատող այլ փաստաթղթեր կամ արխիվային տեղեկանքներ,
• զինվորական գրքույկ,
• գրավոր դիմում` նշելով տվյալները հետադարձ կապի համար (հեռախոսահամար, էլեկտրոնային փոստի հասցե)։
  
  

 Հղում օրենսդրությանը

ՀՀ կառավարության՝ 2022 թվականի հուլիսի 21-ի N 1179-Լ որոշում

Որոշումը հնարավոր է գտնել arlis.am-ում։