Նախ անհրաժեշտ է գրանցվել հարկային մարմնի հաշվետվությունների ներկայացման էլեկտրոնային համակարգում։ Դրա համար անհրաժեշտ է «Շարունակել» կոճակը սեղմելուց հետո՝ 

• սեղմել ներքևում գտնվող «Ներկայացնել հայտ» կոճակը,
• մուտքագրել էլեկտրոնային փոստի հասցեն,
• անցնել էլ․ փոստի հասցեին ուղարկված հղումով,
• լրացնել անհրաժեշտ տվյալները, ընդ որում՝ հեռախոսահամարը անհրաժեշտ է լրացնել հետևյալ ֆորմատով` +(374) xx xx xx xx, իսկ օգտվողի անունը պետք է կազմված լինի փոքրատառ լատինատառերից և կարող է ներառել թվեր,
• սեղմել «Էլեկտրոնային պայմանագրի կնքում» կոճակին և ներբեռնել համակարգում գրանցվելու վերաբերյալ պայմանագիրը, ստորագրել թվային եղանակով և վերբեռնել այն՝ սեղմելով «Ընտրեք ֆայլը» կոճակին։

Այնուհետև նոր աշխատակցի գրանցելու համար անհրաժեշտ է՝

• մուտք գործել անձնական էջ,
• ընտրել «Հաշվետվություններ» բաժինը,
• ընտրել թիվ 79 «Վարձու աշխատողի և պայմանագրային եկամուտ ստացող ֆիզիկական անձի անհատական տվյալների» գրանցման հայտը,
• լրացնել անհրաժեշտ տվյալները, սեղմել «Գրանցել» կոճակը, և հաշվետվությունը կհայտնվի «Լրացված  հաշվետվություններ» բաժնում,
• հաշվետվությունը հնարավոր է նաև ժամանակավորապես պահպանել՝ սեղմելով «Հիշել ժամանակավորապես» կոճակը․ այն կհայտնվի «Անավարտ հաշվետվություններ» բաժնում և հնարավոր կլինի խմբագրել,
• այնուհետև ներբեռնել լրացված հաշվետվությունը, ստորագրել թվային ստորագրությամբ, վերբեռնել և սեղմել «Հանձնել ՊԵԿ» կոճակը։
  
  

Պահանջվող փաստաթղթերը

Նոր աշխատողին գրանցելիս անհրաժեշտ է նշել՝

• աշխատողի անձնագրի կամ նույնականացման քարտի տվյալները,  
•  հանրային ծառայությունների համարանիշը (ՀԾՀ)։

Օտարերկրյա քաղաքացու դեպքում անհրաժեշտ կլինեն օտարերկրյա անձնագրի կամ կացության քարտի տվյալները։

Ուշադրություն
Նոր աշխատողին անհրաժեշտ է գրանցել Պետական եկամուտների կոմիտեում առնվազն աշխատանքի ընդունվելու նախորդ օրը։

Տրամադրման ժամկետը և կարգը

Աշխատողի գրանցման մասին ծանուցումն ուղարկվում է անմիջապես հայտը ներկայացնելուց հետո։

Հղում օրենսդրությանը

ՀՀ կառավարության՝ 2017 թվականի սեպտեմբերի 28-ի N 1214-Ն որոշում

Որոշումը հնարավոր է գտնել arlis.am-ում։