Տեղեկանք ստանալու համար կարող է դիմել 18 տարին լրացած յուրաքանչյուր ոք՝ անձամբ կամ լիազորված անձի միջոցով, իսկ անչափահաս կամ անգործունակ անձանց դեպքում դիմումը ներկայացնում է անձի օրինական ներկայացուցիչը (հոգաբարձու, խնամակալ)։

Դիմումը ներկայացնելու համար անհրաժեշտ է այցելել տվյալ երկրի ՀՀ դեսպանություն կամ հյուպատոսական հիմնարկ՝ նախապես այց ամրագրելով։

Այց ամրագրելիս անհրաժեշտ է նշել այն անձի տվյալները, ով անձամբ ներկայանալու է ընդունելության։

• ընտրել այն երկրի դեսպանության կայքը, որտեղ ներկայացվելու է դիմումը,
• էջի ձախ հատվածում սեղմել «Ամրագրել ժամադրություն» կոճակը,
• բացվող պատուհանում ընտրել «Տեղեկանքների տրամադրում» տարբերակը,
• ընտրել հասանելի օրերից և ժամերից ամենահարմար տարբերակը,
• բացվող էջում լրացնել անձնական տվյալները և հաստատել ամրագրումը։
  
  

Ուշադրություն
Անձնական տվյալների վերաբերյալ տեղեկանքները ՀՀ դիվանագիտական մարմինների կողմից ձևակերպվում են հարցումով կամ առանց հարցման: Հարցում իրականացնելու դեպքում դիվանագիտական մարմինն անձի դիմումի համաձայն հարցում է ուղարկում ՀՀ իրավասու մարմին, որտեղից ստացված պատասխանի հիման վրա կազմում է տեղեկանքը։ Առանց հարցման տեղեկանքների դեպքում դիվանագիտական մարմինը տեղեկանքը կազմում է հիմնվելով իր տրամադրության տակ եղած տեղեկատվության վրա՝ առանց հավելյալ հարցում իրականացնելու։

Պահանջվող փաստաթղթերը

Անհրաժեշտ է համապատասխան դեսպանություն կամ հյուպատոսական հիմնարկ ներկայացնել՝

• անձը հաստատող փաստաթուղթ,
• լիազորված անձի միջոցով դիմելու դեպքում՝ լիազորված անձի անձը հաստատող փաստաթուղթը և լիազորագիր։

Կախված տեղեկանքի բնույթից՝ կարող են պահանջվել նաև այլ փաստաթղթեր, ինչի մասին անձը կտեղեկացվի համապատասխան դեսպանությունում։

Վճարման չափը և կարգը

Հարցման հիման վրա տրամադրվող անձնական տվյալների մասին տեղեկանքի համար անհրաժեշտ է վճարել 25,000 դրամ, իսկ առանց հարցման տեղեկանքի դեպքում՝ 10,000 դրամ։

Տրամադրման ժամկետը և կարգը

Կախված տեղեկանքի բնույթից և պայմանավորված հարցման հիման վրա կամ առանց հարցման ձևակերպելու անհրաժեշտությամբ՝ տեղեկանքը կարող է տրամադրվել 1-15 աշխատանքային օրերի ընթացքում: Այն հնարավոր է ստանալ համապատասխան դեսպանությունում կամ հյուպատոսական հիմնարկում։ Դիմողի ցանկությամբ և իր հաշվին տեղեկանքը կարող է նաև հանձնվել փոստով՝ պատվիրված նամակով:

Տեղեկանքը կարող է տրամադրվել հայերեն կամ այն երկրի լեզվով, որտեղ այն տրամադրվում է։