Պետական աջակցության ծրագրին դիմելու համար անհրաժեշտ է ներբեռնել և լրացնել դիմումը և ուղեկցող նամակը։ Այնուհետև՝ ՀՀ բարձր տեխնոլոգիական արդյունաբերության նախարարության պաշտոնական [email protected] էլեկտրոնային հասցեին անհրաժեշտ է ուղարկել լրացված դիմումը, ուղեկցող նամակն ու պահանջվող փաստաթղթերը։

Ընդ որում՝ դիմումը և ուղեկցող նամակը ստորագրվում է կազմակերպության տնօրենի կողմից, եթե դրանք ստորագրում է այլ անձ, ապա պետք է դիմումին կից ուղարկել նաև լիազորագիր՝ տրված կազմակերպության տնօրենի կողմից: 

Ներկայացվող պահանջները՝ 

Պետական աջակցության ծրագրից կարող են օգտվել իրավաբանական անձինք և անհատ ձեռնարկատերերը, ում՝ 

• իրականացվող գործունեությունից ստացվող եկամուտների (իրացման շրջանառության) 90 և ավելի տոկոսը կազմում են տնտեսական գործունեության տեսակների համապատասխան դասակարգիչներում ներառված գործունեություններից եկամուտները (իրացման շրջանառությունը), 
• թիմում ներգրավվել են առնվազն 10 աշխատակից, որոնք 2021 թվականի սեպտեմբերի 1-ից մինչև 2022 թվականի փետրվարի 28-ն ընկած ժամանակահատվածում ՀՀ-ում չեն հանդիսացել որևէ կազմակերպության աշխատողներ և չեն ունեցել կնքված աշխատանքային պայմանագրեր, 
• հարկային մարմնի կողմից վերահսկվող եկամուտների գծով պարտավորությունները պետական աջակցություն ստանալու համար դիմումի ներկայացման օրվան նախորդող օրվա դրությամբ չեն գերազանցում 100,000 դրամը, բացառությամբ եկամտային հարկի գծով պարտավորությունների, որոնք պետք է ամբողջությամբ կատարված լինեն:

Տրամադրման ժամկետը և կարգը

Դիմումների ներկայացման վերջնաժամկետը 2025թ. մարտի 1-ն է: 

Հղում օրենսդրությանը՝ 

ՀՀ կառավարության 21.12.2023թ․ թիվ 2328-Լ որոշումը: (անհրաժեշտ է կարդալ ամենավերջին փոփոխված տարբերակը)