Ծրագրում ներգրավվելու համար շահառուն իր ընտրությամբ կարող է դիմել հետևյալ բժշկական կազմակերպություններ․  

• Մոր և մանկան առողջության պահպանման գիտահետազոտական ինստիտուտ (Մարգարյան ծննդատուն, Երևան, Մաշտոցի պողոտա, 22 շենք, հեռախոսահամար՝ +374 10 53 06 41),
• Վերարտադրողական առողջության, պերինատոլոգիայի, մանկաբարձության և գինեկոլոգիայի հանրապետական ինստիտուտ (Հանրապետական հիվանդանոց, Երևան
  Մարգարյան փողող, 6/2 շենք, հեռախոսահամար՝ +374 10 34 17 74),
• «Շենգավիթ» բժշկական կենտրոն (Երևան, Մանանդյան փողոց, 9 շենք, հեռախոսահամար՝ +374 11 56 15 61),
• «Աստղիկ» բժշկական կենտրոն (Երևան, Դանիել Վարուժանի փող 28 /1 շենք, հեռախոսահամար՝ +374 11 66 77 88),
• «Ֆերթիլիթի սենթր» վերարտադրողական առողջության կենտրոն (Երևան, Նոր Նորք 2-րդ նրբ. Մոլդովական փողոց, 41/7)։

Պետք է նկատի ունենալ, որ ներկայացված ցանկը կարող է փոփոխվել, այդ պատճառով ցանկալի է նախապես զանգահարել ու ճշգրտել՝ արդյոք տվյալ հաստատությունը մասնակցում է ծրագրին։ 

Ծրագրի մասին

Այս աջակցության ծրագրի շրջանակում մատուցվում են հետևյալ ծառայությունները՝ 

• անպտղության պատճառագիտության ախտորոշում և բուժում,
• վերարտադրողականության օժանդակ տեխնոլոգիաների կիրառման նպատակով մինչ արտամարմնային բեղմնավորումն իրականացվող հետազոտություններ,
• վերարտադրողականության օժանդակ տեխնոլոգիաների կիրառում ամուսնու կամ դոնորական սերմով արհեստական սերմնավորման մեթոդով՝ սերմնավորման փորձեր առավելագույնը 6 դաշտանային ցիկլի ընթացքում,
• արտամարմնային բեղմնավորման իրականացման մեկ փորձ, հավելյալ սաղմերի ստացման դեպքում 4 սաղմի սառեցում` մինչև 6 ամիս պահպանմամբ,
• ապասառեցված սաղմերի 2 հավելյալ տեղադրում արգանդի խոռոչ։

Ներկայացվող պահանջները

Աջակցության ծրագրից օգտվելու համար դիմողները պետք է լինեն ՀՀ քաղաքացի կամ Լեռնային ղարաբաղից բռնի տեղահանված կամ փախստական ճանաչված կանայք, որոնք ՝ 

• 2 տարի և ավելի անպտղություն ունեն (բացարձակ ցուցումների դեպքում՝ առանց 2 տարվա սահմանափակման) և պատկանում են 20-35 տարիքային խմբին,
• 28-42 (ներառյալ) տարեկան են և զավակ չունեն, 
• ունեն մեկ երեխա, սահմանված կարգով գրանցված ամուսնություն, 2 տարի և ավելի երկրորդային անպտղություն (բացարձակ ցուցումների դեպքում՝ առանց 2 տարվա սահմանափակման), 20-36 (ներառյալ) տարիքային խմբին են պատկանում։ Ընդ որում՝ 36 տարեկանում հաշվառվելու և վերարտադրողական օժանդակ տեխնոլոգիաների կիրառման ցուցումների առկայության դեպքում կինը պահպանում է ծրագրի շահառուի կարգավիճակը մինչև 39 տարեկան դառնալը.
• սահմանամերձ բնակավայրերի բնակիչ, գրանցված ամուսնություն և 1 երեխա ունեցող` ՀՀ քաղաքացիներ են, 2 տարի և ավելի երկրորդային անպտղություն ունեն (բացարձակ ցուցումների դեպքում՝ առանց 2 տարվա սահմանափակման), պատկանում է 20-35 (ներառյալ) տարիքային խմբին,
• զինվորական ծառայության ընթացքում կամ զինվորական ծառայության ավարտից հետո զինվորական ծառայության պատճառական կապով զոհված որդու` ՀՀ քաղաքացի մինչև 42 տարեկան ծնող են,
• 2020 թվականի սեպտեմբերի 27-ից ՀՀ պաշտպանության մարտական գործողությունների ընթացքում ծառայողական պարտականությունները կատարելիս զոհված,  դատական կարգով անհայտ բացակայող կամ մահացած ճանաչված, ստացված վնասվածքի, խեղման կամ ձեռք բերված հիվանդության հետ պատճառական կապով հետագայում մահացած զավակի ծնող են։

35 տարեկանում հաշվառվելու և վերարտադրողական օժանդակ տեխնոլոգիաների կիրառման ցուցումների առկայության դեպքում կինը պահպանում է ծրագրի շահառուի կարգավիճակը մինչև 38 տարեկան դառնալը։