Առցանց եղանակով ՀՀ մարզերում (առայժմ միայն Արարատի, Արմավիրի, Կոտայքի և Լոռու մարզերն են սպասարկվում) ընդգրկված անշարժ գույքի նախագծման թույլտվություն ստանալու համար անհրաժեշտ է «Շարունակել» կոճակը սեղմելուց հետո կատարել հետևյալ քայլերը․

• նույնականացվելուց հետո դիմորդի էջում լրացնել անհրաժեշտ տվյալները,
• ընտրել կառուցապատման ենթակա գույքը և հերթականությամբ կատարելով մյուս քայլերը՝ հանձնել դիմումը։ 

Ներկայացվող պահանջները

Նախագծման թույլտվությունը առցանց ստանալու համար կառուցապատողը (ֆիզիկական կամ իրավաբանական անձ) պետք է ունենա պետական գրանցում ստացած հողատարածք կամ անշարժ գույք և դրա սեփականության իրավունքի վկայականը։  

Պահանջվող փաստաթղթերը

Առցանց դիմելու համար անհրաժեշտ է ունենալ՝

• բջջային նույնականացման քարտ կամ նույնականացման քարտ և քարտն ընթերցող սարք,

•  դիմողի անձը հաստատող փաստաթուղթը (իրավաբանական անձի դեպքում՝ պետական ռեգիստրի գրանցման քաղվածքը), իսկ որպես օրինական ներկայացուցիչ հանդես գալու դեպքում՝ նաև համապատասխան լիազորագիրը,

• կառուցապատվող տարածքի հատակագիծը` նախագծվող կամ փոփոխման ենթակա օբյեկտի առաջարկվող տեղանշմամբ, իսկ կառույցի գործառնական նշանակության փոփոխության դեպքում` նաև վերջինիս հատակագիծը (հատակագծերը),

• անշարժ գույքի նկատմամբ սեփականության կամ օգտագործողի՝ անշարժ գույքը փոփոխելու իրավունքը հաստատող փաստաթղթի պատճենը,

• ՀՀ կադաստրի պետական կոմիտեի կողմից տրված հողամասի կադաստրային քարտեզի վրա (1:2000 և 1:500) շինության ուրվագիծը։

Եթե կառուցապատվող հողամասի ինժեներական հետազննումները (ճարտարագիտական ուսումնասիրությունները) անհնարին են առանց քանդման աշխատանքների, հայտին կցվում են նաև քանդման (կամ ապամոնտաժման) թույլտվություն ստանալու մասին դիմումը և այդ թույլտվության համար սահմանված տեղական տուրքի վճարման անդորրագիրը: Ընդ որում՝ տվյալ դեպքում քանդման թույլտվությունը տրվում է առաջադրանքի հետ, իսկ օբյեկտը փաստացի քանդվում է նշված թույլտվությամբ սահմանված պայմաններով:

Թույլտվության տրամադրման կարգը, ժամկետն ու վճարը

Դիմելուց հետո նշված էլեկտրոնային փոստի հասցեին ստացվում է ծանուցում, որտեղ նշված թվային ծածկագրի և հղման միջոցով հնարավոր է առցանց հետևել դիմումի ընթացքին։
Միևնույն ժամանակ, դիմողը նաև տեղեկացվում է դիմումի կարգավիճակի մասին իր կողմից տրամադրված հեռախոսահամարով։

Օբյեկտի ռիսկայնության աստիճանից կախված՝ նախագծման թույլտվությունը ունի 1-2 տարվա գործողության ժամկետ, որի ընթացքում կառուցապատողը պետք է պատվիրի ճարտարապետաշինարարական նախագիծը և դիﬕ տվյալ նախագծի համաձայնեցման և շինարարության թույլտվությունը ստանալու համար (այս երկու գործընթացները կատարվում են միաժամանակ և անհրաժեշտ է ներկայացնել միայն մեկ դիմում)։  

Հղում օրենսդրությանը

•  «Քաղաքաշինության մասին» ՀՀ օրենքը

• ՀՀ կառավարության 2015 թվականի մարտի 19-ի N 596-Ն որոշումը

Իրավական ակտերը հնարավոր է գտնել arlis.am կայքում։