Պահանջվող փաստաթղթերը

Ֆիզիկապես սահմանափակ պատասխանատվությամբ ընկերություն (ՍՊԸ) գրանցելու համար անհրաժեշտ է իրավաբանական անձանց պետական ռեգիստրի գործակալության տարածքային գրասենյակներ ներկայացնել.

ՀՀ քաղաքացի լինելու դեպքում՝

• ՍՊԸ-ի հիմնադրի և գործադիր մարմնի ղեկավարի անձնագրերը կամ նույնականացման քարտերը,
• հանրային ծառայությունների համարը կամ նշում սոցիալական քարտից հրաժարվելու մասին,
• հիմնադրի որոշումը, եթե հիմնադիրը մեկ անձ է, կամ Հիմնադիրների ժողովի արձանագրությունը, եթե հիմնադիրները մի քանիսն են,
• կանոնադրությունը՝ ըստ կանոնադրության նմուշային ձևի կամ ոչ նմուշային ձևով,
• ֆիրմային անվանման գրանցման հայտը։

Այլ երկրի քաղաքացի լինելու դեպքում՝ 

• ՍՊԸ-ի հիմնադրի և գործադիր մարմնի ղեկավարի անձնագրերը՝ նոտարի հաստատմամբ հայերեն թարգմանությամբ։  

Տրամադրման ժամկետը և կարգը

ՍՊԸ-ի գրանցումը տևում է՝

• 1 աշխատանքային օր, եթե հիմնադիրները ֆիզիկական անձինք են,
• 2 աշխատանքային օր, եթե հիմնադիրների թվում կա իրավաբանական անձ,
• գրանցումը կատարվում է անմիջապես, եթե անձը փաստաթղթերը Իրավաբանական անձանց պետական ռեգիստրի գործակալություն ներկայացնելիս օգտվում է օրենքով նախատեսված փաստաթղթերի նմուշային ձևերից։

Սահմանափակ պատասխանատվությամբ ընկերություն գրանցել հնարավոր է նաև ՀՀ-ում գործող բանկերում (նախքան դիմելը բանկից անհրաժեշտ է ճշտել՝ արդյոք տվյալ բանկը իրականացնում է այդ գործառույթը) և Հայփոստի մասնաճյուղերում։ Ընդ որում՝ Ֆինանսական, բանկային, վարկային և ապահովագրական ոլորտի ընկերություն գրանցելու համար անհրաժեշտ է դիմել ՀՀ կենտրոնական բանկ։