Այց ամրագրելիս անհրաժեշտ է նշել այն անձի տվյալները, ով անձամբ ներկայանալու է ընդունելության: Յուրաքանչյուր այցելուի համար անկախ տարիքից անհրաժեշտ է կատարել անհատական հերթագրում։ 

Առցանց հերթագրվելու համար անհրաժեշտ է՝

• նույնականացումից հետո լրացնել պահանջվող տվյալները (անունն ու ազգանունն անհրաժեշտ է լրացնել հայատառ, ինչպես գրված է անձնագրում) և սեղմել «Հաջորդ էջ» կոճակը,

• բացվող էջում մուտքագրել էլ․ փոստի հասցեն և հեռախոսահամարը, այնուհետև՝ էլ․ փոստին ուղարկված կոդը,

• բացվող էջի «Այցի ամրագրում» դաշտում ընտրել Դավթաշեն, 4-րդ թաղամաս, 17/10 հասցեում գործող բաժանմունքը,

• անհրաժեշտ է լրացնել այն անձի տվյալները, ում համար ներկայացվում է դիմումը,

• «Ընտրել օր և ժամ» պատուհանում ընտրել հասանելի օրերից ու ժամերից ամենահարմար տարբերակը։

Պահանջվող փաստաթղթերը

Նախատեսված այցի օրը և ժամին անհրաժեշտ է քաղաքացիության շնորհման վարչություն (ՀՀ ներքին գործերի նախարարության միգրացիայի և քաղաքացիության ծառայություն) ներկայացնել հետևյալ փաստաթղթերը․

• դիմում- հարցաթերթ,

• 35 x 45 մմ չափսի 6 լուսանկար,

• ծննդյան վկայականը և դրա պատճենը՝ նոտարական կարգով վավերացված և հայերեն թարգմանությամբ,

• փախստականի կոնվենցիոն ճամփորդական փաստաթուղթ (կամ քաղաքացիություն չունեցող անձ հանդիսանալու դեպքում ներկայացում է քաղաքացիության չունեցող անձի կացության վկայականը և դրա պատճենը), 

• պետական տուրքի վճարումը հավաստող փաստաթուղթ (օրինակ՝ անդորրագիր)։ 

Եթե առկա է ամուսնությունը և դիմումատուն կրում է ամուսնու ազգանունը, ապա անհրաժեշտ է ներկայացնել՝

• ամունության վկայականը և դրա պատճենը,

• ամուսնու անձնագրի պատճենը և դրա հայերեն թարգմանությունը։ 

Վճարման չափը և կարգը

ՀՀ քաղաքացիություն ստանալու համար դիմելիս անհրաժեշտ է վճարել  1,000 ՀՀ դրամ։ 

Տրամադրման ժամկետը և կարգը

ՀՀ քաղաքացիություն ստանալու դիմումը դիտարկվում է  90 աշխատանքային օրվա ընթացքում։ Ծառայությունում քաղաքացիություն ստանալու դիմումը ներկայացնելուց հետո անձը ստանում է SMS հաղորդագրություն՝ իր դիմումի համարով, որով կարող է հետևել դիմումի ընթացքին։

Դիմումը բավարարվելու դեպքում անձն այդ մասին տեղեկացվում է SMS հաղորդագրությամբ, որից հետո կարող է դիմել ՀՀ քաղաքացու անձնագիր ստանալու համար:

Հղում օրենսդրությանը

• «Հայաստանի Հանրապետության քաղաքացիության մասին» ՀՀ օրենք
• ՀՀ կառավարության 2007 թվականի նոյեմբերի 23-ի  N 1390-Ն որոշում
• «Պետական տուրքի մասին» ՀՀ օրենք

Իրավական ակտերը հնարավոր է գտնել arlis.am-ում։