Հյուպատոսական հաշվառում կարող են անցնել ՀՀ բոլոր քաղաքացիները՝ անկախ տարիքից։ Մինչև 16 տարեկան անձի դեպքում դիմումը պետք է ներկայացնի երեխայի ծնողը, խնամակալը կամ հոգաբարձուն, իսկ անգործունակ քաղաքացու դեպքում՝ խնամակալը (այս դեպքում անձը հաշվառվում է խնամակալի հյուպատոսական հաշվառման հասցեով)։

Ժամանակավոր (մինչև 183 օր ժամկետով) հյուպատոսական հաշվառում անցնելու դեպքում ՀՀ քաղաքացին շարունակում է հաշվառված մնալ իր՝ ՀՀ-ում ունեցած հաշվառման հասցեով։ Հաշվառում անցնելու համար անհրաժեշտ է ներկայացնել միայն դիմում՝ լրացնելով անձնական տվյալները։

Պահանջվող փաստաթղթեր

Անհրաժեշտ է ներկայացնել դիմում՝ լրացնելով անձնական տվյալները։

Դիմումը թղթային տարբերակով և փակ ծրարով պետք է անձամբ ներկայացնել կամ փոստով ուղարկել ՀՀ արտաքին գործերի նախարարություն (Վազգեն Սարգսյան 3, Երևան, 0010) կամ համապատասխան ՀՀ դեսպանություն։

Ներկայացված անձնական տվյալների (երկիր, քաղաք, էլ-փոստ, հեռախոս) միջոցով նախարարությունը արտակարգ իրավիճակում կապվում է քաղաքացիների հետ, կարևոր տեղեկություններ հաղորդում, ինչպես նաև տրամարդում անվտանգության վերաբերյալ խորհրդատվություն։

Ուշադրություն
Հյուպատոսական հաշվառման ժամանակ ներկայացվող տվյալները պաշտպանված են օրենքով և կարող են օգտագործվել միայն ՀՀ օրենսդրությամբ սահմանված դեպքերում և կարգով։

Վճարման չափը

Հյուպատոսական հաշվառումն իրականացվում է անվճար։

Տրամադրման ժամկետը և կարգը

Ֆիզիկապես դիմելու դեպքում հյուպատոսական հաշվառումն իրականացվում է 5 աշխատանքային օրվա ընթացքում։

Իրականացվում է անձի տվյալների և փաստաթղթերի համապատասխանության ստուգում, որից հետո դրանք մուտքագրվում են ավտոմատացված համակարգ՝ դիմումն ընդունած դիվանագիտական ներկայացուցչության կամ նախարարության կողմից։ Արդյունքում տեղի է ունենում անձի հյուպատոսական հաշվառման գրանցումը։

Հղում օրենսդրությանը