Ապրանքային նշանի գրանցման հայտը պետք է ներկայացնել ՀՀ էկոնոմիկայի նախարարության մտավոր սեփականության գրասենյակ՝ հայտում նշելով՝

• հայտատուին կամ նրա ներկայացուցչին նույնականացնող տվյալներ,
• առաջարկված նիշի հստակ պատկերը (ձայնային ապրանքային նշանի դեպքում՝ նոտագրված տեսքով) և նկարագրությունը,
• այն ապրանքների և (կամ) ծառայությունների ցանկը, որոնց համար գրանցվելու է  ապրանքային նշանը, և որոնք խմբավորված են հայտը ներկայացնելու թվականին գործող Նիցայի դասակարգչի դասերին համապատասխան՝ ըստ դասերի համարների աճման,
• տվյալներ այն մասին, որ նիշը եռաչափ է, հոլոգրաֆիկ կամ ձայնային, գունային համակցությունը նշանի տարբերակիչ հատկանիշ է, առկա են չպահպանվող տարրեր։

Ընդ որում՝ անհրաժեշտ է տրամադրել՝

• նիշի կամ դրա բառային մասերի տառադարձությունը և հայերեն թարգմանությունը,
• նշում այն մասին, որ տվյալ նիշը կոլեկտիվ հավաստագրային նշան է,
• նշում խնդրարկվող առաջնության թվականի և դրա հիմքերի մասին,
• նշում, որ հայտարկված նիշը եռաչափ է, հոլոգրաֆիկ կամ ձայնային,
• նշում, որ գունային համակցությունը ապրանքային նշանի տարբերակիչ հատկանիշ է,
• նշում հայտարկված նիշի այն տարրերի մասին, որոնք համարվում են չպահպանվող,
• նիշի կամ դրա բառային տարրերի տառադարձությունը և դրանց հայերեն թարգմանությունը,
• նշում, որ հայտարկված նիշը կոլեկտիվ նշան է,
• նշում, որ հայտարկված նիշը հավաստագրային նշան է,
• նշում խնդրարկվող առաջնության թվականի և դրա հիմքերի մասին (համապատասխան դեպքում)։

Պահանջվող փաստաթղթերը՝ 

• իրավասու մարմնի կողմից տրված թույլտվություն՝ «Ապրանքային նշանների մասին» օրենքով նախատեսված դեպքերում,
• իրավատիրոջ կողմից տրված համաձայնություն՝ օրենքով նախատեսված դեպքերում,
• կոլեկտիվ նշանի կանոնակարգը,
• հավաստագրային նշանի օգտագործման կանոնակարգը։

Անհրաժեշտ է կցել նաև՝ 

• հայտ ներկայացնելու և փորձաքննություն անցկացնելու համար օրենքով սահմանված պետական տուրքի վճարման անդորրագիրը, ինչպես նաև մեկից ավել դասի առկայության դեպքում յուրաքանչյուր դասի համար՝ լրացուցիչ պետական տուրքի վճարման անդորրագիրը, իսկ եթե պետական տուրքը վճարվել է զեղչով, ապա ներկայացվում է նաև աշխատողների թվի մասին տեղեկանքը՝ պետական տուրքի վճարման օրվա դրությամբ,
• հայտատուի ներկայացուցչի իրավասությունները հաստատող փաստաթուղթը, եթե հայտը ներկայացվել է ներկայացուցչի միջոցով,
  
  ինչպես նաև համապատասխան դեպքերում՝
• դիմում՝ առաջնություն խնդրարկելու մասին,
• թույլտվություն և համաձայնություն՝ տրված իրավասու մարմնի կողմից օրենքով նախատեսված դեպքերում,
• կոլեկտիվ նշանի կանոնակարգը,
• հավաստագրային նշանի օգտագործման կանոնակարգը։

Այլ լեզվով փաստաթղթեր կցելիս ՀՀ-ում գրանցված հայտատուները պետք է հայտը ներկայացնելու պահին տրամադրեն նաև դրա հայերեն թարգմանությունը, իսկ օտարերկրյա հայտատուները այն կարող են տրամադրել հայտը ներկայացնելու օրվանից հետո 2 ամսվա ընթացքում։

Եթե հայտը ներկայացուցչի միջոցով է լրացվում, պետք է ունենալ նրա իրավասությունները հաստատող փաստաթուղթ։

Վճարման չափը և կարգը

• հայտ ներկայացնելու համար՝ 30,000 դրամ,
• փորձաքննություն անցկացնելու համար՝ 40,000 դրամ,
• մեկից ավելի յուրաքանչյուր դասի համար՝ 15,000 դրամ։

Գործում են հետևյալ զեղչերը՝

• Ֆիզիկական կամ մինչև 25 աշխատող ունեցող իրավաբանական անձանց կամ անհատ ձեռնարկատերերի դեպքում հայտի արժեքը 7,500, փորձաքննությունը 10,000, իսկ ավել դասը 3,750 ՀՀ դրամ է։
• 25-ից 100 աշխատող ունեցող իրավաբանական անձանց կամ անհատ ձեռնարկատերերի դեպքում գրանցման հայտի արժեքը 15,000, փորձաքննությունը 20,000, իսկ ավել դասը 7,500 ՀՀ դրամ է։
• 100-ից ավելի աշխատող ունեցող իրավաբանական անձանց կամ անհատ ձեռնարկատերերի դեպքում՝ գրանցման հայտի արժեքը 30,000, փորձաքննությունը 40,000, իսկ ավել դասը 15,000 ՀՀ դրամ է։  

Ընդ որում՝ ապրանքային նշանի գրանցման հայտը ներակայացնելիս պետք է նախապես վճարել նախատեսված պետական տուրքերը և վճարման անդորրագրերը կցել հայտին։

Տրամադրման ժամկետը և կարգը

Ներկայացված հայտով փորձաքննությունն անցկացվում է երկու փուլով՝ հայտի նախնական փորձաքննություն, որն անցկացվում է հայտը ներկայացնելու թվականը սահմանելուց հետո 10 աշխատանքային օրվա ընթացքում և հայտի ըստ էության փորձաքննություն, որն անցկացվում է հայտի հրապարակման օրվանից 3-ամսյա ժամկետում։ 

Ապրանքային նշանի հայտ ստանալու, գրանցելու, քննարկելու և վկայագիր տրամադրելու առումով ընդհանուր ժամկետը 5 ամիս է:

Ապրանքային նշանի գրանցման գործողության ժամկետը 10 տարի է՝ հայտի ներկայացման թվականից հաշված:

Հղում օրենսդրությանը

«Ապրանքային նշանների մասին» ՀՀ օրենք