Անհրաժեշտ է ֆիզիկապես դիմել տվյալ երկրի ՀՀ դեսպանություն կամ հյուպատոսական հիմնարկ և ներկայացնել ՀՀ քաղաքացի ճանաչվելու համար պահանջվող փաստաթղթերը։

Ներկայացվող պահանջները

Նախկին ՀԽՍՀ քաղաքացի ճանաչվելու և անձնագիրը փոխանակելու համար անհրաժեշտ է․

• լինել ՀՀ-ում մշտապես բնակվող նախկին ՀԽՍՀ (Խորհրդային Հայաստանի) քաղաքացի, ով մինչև 1995թ․ հուլիսի 5-ը (ՀՀ Սահմանադրության ուժի մեջ մտնելը) ձեռք չի բերել այլ պետության քաղաքացիություն կամ 1995թ․ նոյեմբերի 28-ից («ՀՀ քաղաքացիության մասին» ՀՀ օրենքի ուժի մեջ մտնելուց) սկսած մեկ տարվա ընթացքում չի հրաժարվել դրանից,

• լինել նախկին ԽՍՀՄ հանրապետությունների քաղաքացի, ով մշտապես բնակվում է ՀՀ-ում, օտարերկրյա քաղաքացի չէ և ՀՀ քաղաքացիություն ձեռք բերելու համար դիմել է մինչև 2026թ․ դեկտեմբերի 31-ը,

• լինել ՀՀ-ից դուրս բնակվող ազգությամբ հայ նախկին ՀԽՍՀ քաղաքացի, ով ձեռք չի բերել այլ պետության քաղաքացիություն։

Պահանջվող փաստաթղթերը

ՀՀ քաղաքացի ճանաչվելու համար արտասահմանում դիմելիս պահանջվում են հետևյալ փաստաթղթերը՝

• դիմում,
• նախկին ՀԽՍՀ քաղաքացու անձնագիր (առկայության դեպքում),
• 1995թ. նոյեմբերի 28-ի դրությամբ ՀՀ սահմաններից դուրս բնակվելը հավաստող փաստաթղթերը (օրինակ՝ օտարերկրյա պետության կողմից տրված կացության կարգավիճակ, օտարերկրյա պետությունում հաշվառված լինելու վերաբերյալ նշում և այլն),
• այլ պետության քաղաքացի չհանդիսանալու մասին տեղեկանք,
• այլ պետության քաղաքացի հանդիսանալու դեպքում՝ օտարերկրյա պետության անձնագիրը, և այլ պետության քաղաքացիություն ձեռք բերելու տարեթվի վերաբերյալ տեղեկանք,
• անձը հաստատող փաստաթղթերը, իսկ դրանց ներկայացնելու անհնարինության դեպքում՝ անձի ինքնությունը հաստատող այլ բնույթի փաստաթղթեր,
• ծննդյան, ամուսնության, երեխաների ծննդյան վկայականները, անհատական տվյալների փոփոխության մասին փաստաթղթեր, ծնողների անձը հաստատող փաստաթուղթ և այլն:

Վճարման չափը և կարգը

ՀՀ քաղաքացի ճանաչվելու համար անհրաժեշտ է վճարել 65,000 դրամ։ Վճարումը կատարվում է տեղում։

Տրամադրման ժամկետը և կարգը

ՀՀ քաղաքացի ճանաչվելու գործընթացը տևում է 3-4 ամիս։ ՀՀ քաղաքացի ճանաչվելուց հետո անձը կարող է դիմել ՀՀ քաղաքացու անձնագիր ստանալու համար։

Անձնագիր ստանալու դիմումը ներկայացնելուց հետո այն ՀՀ արտաքին գործերի նախարարության կողմից ուղարկվում է տվյալ երկրի ՀՀ դեսպանություն կամ հյուպատոսական հիմնարկ։ Այն ստանալու համար անհրաժեշտ է այցելել այն դիվանագիտական ներկայացուցչություն, ուր անձը դիմել է։

Հղում օրենսդրությանը

2011 թվականի հունիսի 23-ի N 974-Ն ՀՀ Կառավարության որոշում

Որոշումը հնարավոր է գտնել arlis.am-ում։