Ստորև ներկայացված քայլերն անհրաժեշտ է կատարել «Շարունակել» կոճակը սեղմելուց հետո.

• այցելել armed.am,
• «ՄՈՒՏՔ ՀԱՄԱԿԱՐԳ» դաշտի ներքևում սեղմել «Գրանցվելու համար սեղմեք այստեղ» հղումը,
• բացված պատուհանում լրացնել պահանջվող տվյալները՝ հաշվի առնելով, որ հեռախոսահամար դաշտում պետք է լրացնել այն հեռախոսահամարը, որը տրամադրվել է վերջին անգամ բուժհաստատություն կատարած այցի ժամանակ,
• տվյալները լրացնելուց և գաղտնաբառը ստեղծելուց հետո սեղմել «ՇԱՐՈՒՆԱԿԵԼ» կոճակը։

Լրացված հեռախոսահամարին կուղարկվի 6-նիշանոց ծածկագիր, որը պետք է լրացնել բացվող պատուհանում։ Այդ գործողությունը կատարելուց հետո անձը հաջողությամբ կգրանցվի համակարգում։

Ի դեպ՝ միևնույն հեռախոսահամարով հնարավոր է ստեղծել մի քանի հաշիվ և ամրագրել այց այլ անձի համար, օրինակ՝ երեխայի համար։ Այդ նպատակով անհրաժեշտ է գրանցվել միևնույն եղանակով՝ լրացնելով այն անձի տվյալները, ում համար պետք է ամրագրել այցը։ Նոր ստեղծվող հաշվի համար պետք է ստեղծել նոր գաղտնաբառ։

Հետագայում միևնույն հեռախոսահամարով մուտք գործողին կառաջարկվեն բոլոր այն հաշիվները, որոնք ստեղծված են տվյալ հեռախոսահամարով։ Այդ դեպքում պետք է ընտրել հաշիվը, լրացնել համապատասխան գաղտնաբառը և օգտվել էլեկտրոնային առողջապահության համակարգից։

Անձը իր ամբողջական տվյալներին հասանելիություն ունենալու համար պետք է համակարգ մուտք գործի «ԵսԵմ» նույնականացմամբ։

ԱՐՄԵԴ համակարգի միջոցով կարելի է նաև առցանց հերթագրվել տեղամասային բժշկի մոտ՝ նրա աշխատանքային ժամանակացույցից ընտրելով հարմար ժամը և ամրագրելով այց։

Համակարգում կարելի է տեսնել նաև նախկինում կատարված այցերի, բուժումների և հետազոտությունների մասին մանրամասն տեղեկություններ, որոնք յուրաքանչյուր այցի ժամանակ լրացվել են բժշկի կողմից։