Առևտրային կազմակերպության գործադիր մարմնի ղեկավարի փոփոխությունը գրանցելու համար անհրաժեշտ է պահանջվող փաստաթղթերով դիմել ՀՀ արդարադատության նախարարության իրավաբանական անձանց պետական ռեգիստրի գործակալության տարածքային սպասարկման գրասենյակներ։

Ներկայացվող պահանջները

Դիմելու համար անհրաժեշտ է լինել իրավաբանական անձի գործադիր մարմնի ղեկավար կամ նրա կողմից լիազորված անձ։

Պահանջվող փաստաթղթերը

Գործադիր մարմնի ղեկավարի փոփոխության համար անհրաժեշտ է ներկայացնել․

• իրական շահառուների մասին հայտարարություն,
• դիմում, 
• որոշում գործադիր մարմնի նախկին ղեկավարի լիազորությունները դադարեցնելու և գործադիր մարմնի նոր ղեկավար նշանակելու մասին,
• գործադիր մարմնի նոր ղեկավարի մասին տեղեկություններ՝ անունը, ազգանունը, անձնագրային տվյալները, սոցիալական քարտի համարը կամ սոցիալական քարտից հրաժարվելու մասին տեղեկանքը, էլեկտրոնային փոստի հասցեն, բնակության, հաշվառման վայրի հասցեն,
• կանոնադրության փոփոխությունները, լրացումները կամ նոր խմբագրությամբ կանոնադրությունը հաստատելու մասին որոշումը,
• կանոնադրության փոփոխությունները կամ լրացումները (կամ նոր խմբագրությամբ կանոնադրությունը),
• պետական տուրքի վճարումը հավաստող փաստաթուղթ:

Վճարման չափը և կարգը

Գործադիր մարմնի ղեկավարի փոփոխության պետական գրանցման համար սահմանված է պետական տուրք 20,000 ՀՀ դրամի չափով։ 

Վճարումն իրականացվում է E-payments համակարգի միջոցով կամ բանկային փոխանցմամբ։

E-payments համակարգի միջոցով վճարելու դեպքում անհրաժեշտ է փոխանցել՝

• 10,000 դրամ՝ գրանցման համար,
• 10,000 դրամ՝ կանոնադրության փոփոխության համար։
  
  

Վճարումը բանկային փոխանցմամբ կատարելու դեպքում անհրաժեշտ է փոխանցել՝

• 20,000 ՀՀ դրամ՝ ՀՀ պետական բյուջեի 900005160719 հաշվեհամարին։

Նպատակ՝ «Առևտրային կազմակերպությունների և դրանց առանձնացված ստորաբաժանումների կանոնադրությունների փոփոխությունների ու լրացումների, նոր խմբագրությամբ կանոնադրությունների, գործադիր մարմնի ղեկավարի փոփոխության, պետական միասնական գրանցամատյանում գրառման ենթակա տեղեկությունների փոփոխությունների գրանցման համար (բացառությամբ գործադիր մարմնի ղեկավարի տվյալների և առևտրային կազմակերպության մասնակցի տվյալների փոփոխության)»։

Եթե բանկային հավելվածում չի ստացվում փոխանցում կատարել այս հաշվեհամարին, ապա խնդրում ենք ընտրել «Փոխանցում պետական բյուջե» տարբերակը։

Տրամադրման ժամկետը և կարգը

Գործադիր մարմնի ղեկավարի փոփոխության պետական գրանցումը կատարվում է 2 աշխատանքային օրվա ընթացքում։ 

Հղում օրենսդրությանը

• «Իրավաբանական անձանց պետական գրանցման մասին» ՀՀ օրենք 
• «Պետական տուրքի մասին» ՀՀ օրենք 

Իրավական ակտերը հնարավոր է գտնել arlis.am-ում։